Ձեր վստահելի աղբյուրը

Ուրբաթ օրը Երևանի քաղաքապետի մոտ տեղի է ունեցել քննարկում վարչական շրջանների ղեկավարների մասնակցությամբ, հիմնականում քննարկվել է մանկապարտեզների բացման հարցը։ Ասուլիսում ասաց Երևանի փոխքաղաքապետ Տիգրան Վիրաբյանը։ Նա նշեց, որ Երևանում մանկապարտեզները բացվելու են մայիսի 20-ից, գործելու են հատուկ կանոնակարգով։

«Առաջնահերթություն ենք տալիս այն երեխաներին, որոնց ծնողները գործնականում չեն կարողանում ապահովել  երեխաների խնամքը տանը կապված իրենց աշխատանքների հետ, որոնք հեռավար իրականացնելու հնարավորություն չունեն։ Մանկապարտեզ գնալու հարցում առաջնահերթություն են ունենալու այն երեխաները, որոնց ծնողներն աշխատում են, միայն մայրն է աշխատում կամ սոցիալապես  անապահով ընտանիքի երեխաներ են»,- ասաց փոխքաղաքապետը։

Տ.Վիրաբյանի խոսքով, 161 մանկապարտեզի կողմից հարցում է արվել 31 հազար ծնողների, 11 հազարը գտնվում են այս կարգավիճակում, ցանկությունն են հայտնել երեխային բերել մանկապարտեզ։

«Մշակվել են անվտանգության բոլոր կանոնները՝ սկսած մանկապարտեզի բակային տարածքների նշագրումից, որպեսզի  ծնողներն պահպանեն սոցիալական հեռավարությունը երեխաներին մանկապարտեզ բերելուց։  Բացառում ենք ծնողների մուտքը մանկապարատեզ, դիմավորում են երեխաներին մանկապարատեզի աշխատակիցները, հեռավար  ջերմաչափում են անում, համոզվելով, որ երեխան չունի ջերմություն, ընդունում են մանկապարտեզ։ Երեխաները ջերմաչափվում են նաև օրվա ընթացքում, եթե ընթացքում առաջացել է ջերմություն, հորդորում են երեխային վաղը չբերել մանկապարտեզ։ Այս պարագայում 8-10 հոգի են լինելու խմբերում։ Մանկապարտեզում հրաժարավելու ենք այն խաղերից ու խաղալիքներից, որոնց վրա վարակը  կարող է  երկար մնալ, հրաժարվում ենք այն միջոցառումներից, որոնք ենթադրում են սերտ շփում»,- ասաց Տ.Վիրաբյանը։

Երևանի փոխքաղաքապետն ասաց, որ մանկապարտեզների՝ ռիսկային գոտում գտնվող աշխատակիցները կազմում են ընդհանուր աշխատակիցների 20-22 տոկոսը, հորդորել են նրանց  չգնալ աշխատանքի։ Նա ընդգծեց, որ  բոլոր աշխատակիցները շարունակելու են վճարվել  այնպես, ինչպես մինչ այդ։

Տ.Վիրաբյանն ասաց, որ այսօր և վաղն ախտահանվելու են Երևանի բոլոր մանկապարտեզները, ամեն օր աշխատանքային ժամի ավարտից հետո մանկապարտեզներն ու այն տարածքները, որտեղ երեխաները շփում ունեն, կախտահանվեն։

Սննդի հետ կապված, Երևանի փոխքաղաքապետն ասաց, որ  կիրառելու են սնունդը նույն կերպ, ինչպես նախկինում, բայց որոշակի կանոնների խստացմամբ։

«Մատակարարների հետ քննարկում ենք ունեցել, նոր ձևաչափ ենք մշակել։  Որոշակի սննդատեսակներում կատարել ենք փաթեթավորման փոփոխություն, կիրառվելու են մի շարք այլ նորմեր, որոնք մեզ կպաշտպանեն վարակից»,- ասաց նա։

Տ.Վիրաբյանը նշեց, որ Երևանի քաղաքապետարանն արդեն իսկ պատվիրել է մեկ ամսվա համար 160 հազարից ավելի դիմակ, մի քանի հազար լիտր ալկոգել, հնարավորություն կտա բոլոր աշխատակիցներին ապահովել համապատասխան պարագաներով։

Երևանի փոխքաղաքապետն ասաց, որ բոլոր աշխատակիցները պարտավոր են պահպանել անվտանգության կանոնները, այլապես կազատվեն աշխատանքից։

«Սա մեզ համար փորձություն է, պետք է կարողանանք լավագույնս հաղթահարենք»,- ասաց Տիգրան Վիրաբյանը։