Ձեր վստահելի աղբյուրը

Ադրբեջանագետ Անժելա Էլիբեգովան քննադատել էր Հանրային խորհրդիրկ նախագահ Ստյոպա Սաֆարյանի գործունեությունը, ՀԽ նախագահը՝ նրա արտաքինը, գրառման մեջ խոսել կնոջ մարմնի մասերի մասին, նաև նշել, թե Էլիբեգովան փողի դիմաց էր տեղեկատվական պայքար մղում թշնամու դեմ։

Էլիբեգովան հորդորեց Սաֆարյանին դիմել իրավապահներին։ Ադրբեջանագետ կնոջն աջակցության, զորակցության խոսքեր հայտնեցին քաղաքական, հասրակական, մշակութային գործիչներ, լրագրողներ, քաղաքացիներ։

Երևանի Մամուլի ակումբի նախագահ Բորիս Նավասարդյանը, դիմելով Սաֆարյանին, երեկ երեկոյան մասնավորապես գրել էր. «Եվ ընդհանրապես, չի կարող լինել այնպիսի առիթ, որին համաչափ կհամարվեին պատասխաններիդ որոշ ձևակերպումները: Ամենը, ինչ անում ես այս «երկխոսության» շրջանակներում, լիքը այլ անողներ կան բոլոր կողմերից, չարժե խառնվել նրանց անպատվաբեր գործին: Տեսնելով շուրջս կատարվողը, մեծ հույսեր չունեմ, որ կհետևես հորդորիս, բայց փորձեմ` մի արա... Առայժմ այսքանը: Եթե դա էլ չգրեի, քնելս կհարամվեր»։

Բորիս Նավասարդյանն իր գրառման մեջ նշել էր մի քանի հասարակական գործիչների, որոնք հաճախ բարձրաձայնում են կանանց իրավունքների մասին, և հույս հայտնել, որ կլսի նրանց գնահատականնեը կատարվածի վերաբերյալ։

ՄԻՊ Արման Թաթոյանը դատապարտեց Ս. Սաֆարյանի խոսքը՝ խիստ մտահոգիչ համարելով, երբ մարդու արժանապատվությունը վիրավորող, նսեմացնող գրառում է անում երկրի Հանրային խորհրդի նախագահը։

ՄԻՊ-ն իր հայտարարության մեջ նշել էր.

«Պետք է դադարեցնել իրար վիրավորելու, իրար արժանապատվություն նսեմացնելու վտանգավոր սովորությունը: Դա բերում է վտանգավոր հետևանքների, դա բազմապատկում է վիրավորանքն ու ատելությունը, դա ի վերջո սադրում է բռնություն:

Սա հատկապես վերաբերում է հանրային գործունեություն ծավալող ու մանավանդ հանրային պաշտոն զբաղեցնող անձանց, ովքեր պետք է լինեն զսպված և թույլ չտան վիրավորանք, ատելություն գեներացնող, լարվածություն առաջացնող որևէ խոսք: Հանրային պաշտոնյաների դեպքում պահանջներն առավել խիստ են, քանի որ նրանք ունեն կոնկրետ կարգավիճակ ու սահմանափակված են այդ կարգավիճակի սահմաններով: Ցանկացած շեղում կարող է առաջացնել իրավական հետևանքներ, այդ թվում՝ պատասխանատվություն:

Խիստ մտահոգիչ երևույթ է, երբ մարդու արժանապատվությունը վիրավորող, նսեմացնող գրառում է անում երկրի Հանրային խորհրդի նախագահը՝ որպես հանրային պաշտոն զբաղեցնող և օրենքով ստեղծված ու կոնկրետ խնդիրներ, իրավական կոնկրետ կարգավիճակ ունեցող մարմնի ղեկավար, ում պաշտոնի հրամայականով թելադրված պարտադիր խնդիրն է հասարակությունում փոխադարձ վստահության, երկխոսության և գործընկերային հարաբերությունների ձևավորմանը նպաստելը:
Հանրային խորհրդի ղեկավարի գրառման ուսումնասիրությունը վկայում է, որ դա արվել է կնոջը վիրավորելով՝ նրա սեռի թիրախավորմամբ: Առավել մտահոգիչ է, որ այդ գրառման ներքո արվում են արժանապատվությունը նսեմացնող ու ատելություն գեներացնող մեկնաբանություններ, որոնք ոչ միայն չեն հեռացվում, այլ նաև ակնհայտ խրախուսվում են:
Ցանկացած տեսակի բանավեճում պետք է քննարկել միայն բովանդակային կամ առարկայական հարցեր՝ առանց ընդդիմախոսին վիրավորանք հասցնելու կամ նրա արժանապատվությունը նսեմացնելու:
Սրանք կանոններ են, որ կնպաստեն հասարակությունում համերաշխության մթնոլորտի և փոխադարձ հարգանքի երշախավորմանը»։

ԱԺ «Լուսավոր Հայաստան» խմբակցության պատգամավոր Աննա Կոստանյանն իր տարածած հայտարարության մեջ նշել էր. «Հաշվի առնելով այն հանգամանքը, որ հանրային դեպք լինելը նաև ենթադրում է հասարակության մեջ էտալոնային վարքագծի և խոսքի դրսևորման պարտավորություն` կարծում եմ, որ այս և այլ դեպքերում հանրային պաշտոններ զբաղեցնող անձինք պետք է իրավական պատասխանատվության ենթարկվեն` համամարդկային, համընդհանուր էթիկական կանոնների, համերաշխության մթնոլորտի և փոխադարձ հարգանքի խախտման պարագայում, այլապես այսօրինակ վարքագիծը մուլտիպլիկատիվ էֆեկտ կարող է ունենալ հասարակության ամենալայն շերտերում` ոչ ցանկալի օրինակ ծառայելով։ Ուստի կանխելու համար նման անթույլատրելի վարքագծի նեգատիվ ազդեցությունը` պահանջում եմ օր առաջ հեռացնել Հանրային խորհրդի նախագահին յուր ստանձնած, սակայն օրենքով նախատեսված պարտավորությունները չկատարելու և հանրության կոնկրետ անձանց պարբերաբար թիրախավորելու և նսեմացնելու համար»։

Աննա Կոստանյանն ու նրա գործընկեր Անի Սամսոնյանն իրենց հայտարարություններից հետո դարձան Սաֆարյանի քննադատության հաջորդ թիրախը։

Էլիբեգովային, ինչպես նշեցին աջակցության խոսքեր հղեցին ներկա ընդդիմադիր պատգամավորներ, նախկին պատգամավորներ։

Ինչ վերաբերում է Ադրբեջանագետի կատարած աշխատանքը կասկածի տակ դնելուն, ապա ՄԻԵԴ-ում Ադրբեջանի դեմ ներկայացվող դիմումներում հայաստանցիների շահերը ներկայացնող փաստաբան Արա Ղազարյանը գրեց.

«Ի պատասխան Հանրային խորհրդի նախագահի գրառմանը Անժելա Էլիբեկովայի վերաբերյալ, մասնավորապես, երբ կասկածի տակ է դրվում նրա գործունեությունը որպես ադրբեջանագետի: Արդեն երկար ժամանակ է, ինչ Ադրբեջանի դեմ ՄԻԵԴ ներկայացվող բոլոր գանգատներում Անժելա Էլիբեգովայի և Արմինե Ադեբեկյանի հեղինակած АРМЯНОФОБИЯ В АЗЕРБАЙДЖАНЕ" գիրքը ներկայացվում է որպես հավելված: Կրկնում եմ՝ որպես հավելված:, այլ ոչ թե որպես տողատակի հղում:

Այս աշխատության ապացուցողական նշանակությունը դժվար է գերագնահատել: Իրավաբանների համար դրա ամենամեծ արժեքը նրանում ինֆորմացիայի առատությունն է ու համակարգվածությունը: Դա հենց այն է, ինչ անհրաժեշտ է իրավաբանին միջազգային ատյանում հիմնավորելու համար ռասիզմի առկայություն մեկ այլ պետությունում: Իմ իրավաբան գործընկերները դա կհաստատեն:

Ե՛վ մեթոդաբանության, և՛ բովանդակության առումով ես դեռ չեմ հանդիպել առավել հիմնավոր աղբյուր, քան վերը նշված հետազոտությունն է՝ առնվազն իմ ոլորտում՝ դատավարության մեջ օգտագործելու նպատակով: Այդ աշխատության մեջ դեռ ոչ մի փաստ չի հերքվել մեր հակառակորդների կողմից:

Ու այդ գիրքը արդեն տվել է իր պտուղները, երեք ամիս առաջ, ու դեռ շատ խոչընդոտներ է օգնելու մեզ հաղթահարելու այդ գիրքը: Շնորհակալություն Անժելա Էլիբեգովային ու Արմինե Ադիբեկյանին այդ հետազոտությունը կատարելու համար»։