Ձեր վստահելի աղբյուրը

«Արտակարգ իրավիճակի հիմքով հայտարարված արտակարգ դրության ընթացքում ազատ տեղաշարժման պայմանները խախտելու համար կսահմանվի տուգանք՝ նվազագույն աշխատավարձի 10-ապատիկի չափով»,- ԱԺ արտահերթ նիստի ընթացքում ասաց ՀՀ արդարադատության նախարարի տեղակալ Վահե Դանիելյանը՝ ներկայացնելով Կառավարության կողմից ներկայացված «Վարչական իրավախախտումների վերաբերյալ ՀՀ օրենսգրքում լրացում և փոփոխություն կատարելու մասին» օրենքի նախագիծը։

Ներկայումս գործող օրենքով, նշված վարչական տուգանքը նվազագույն աշխատավարձի 100-250-ապատիկի չափ է։

«Այսինքն՝ այժմ առաջարկում ենք, որ արտակարգ դրության ընթացքում սահմանված սահմանափակումները խախտելու դեպքում մարդուն տուգանեն ոչ թե 100-250 հազար դրամով, այլ՝ 10 հազար դրամով։ Խոսքը վերաբերում է բաց տարածքներում դիմակ չկրելու համար նախատեսված տուգանքին»,- շեշտեց Վ. Դանիելյանը։

Նա ասաց, որ, ըստ առաջարկի, օրենքն ուժի մեջ է մտնելու ընդունման պահից։

ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը հարցրեց՝ բաց տարածքներում դիմակ չդնելու համար տուգանք է սահմանվում, իսկ փակ տարածքներում չկրելու համար՝ ո՞չ։

Պատասխանելով պատգամավորի հարցին՝ Վ. Դանիելյանն ասաց, որ փոխվարչապետի որոշմամբ՝ սահմանվել է բաց տարածքներում դիմակի առկայության պարտադիրություն, հետևաբար, այդ պահանջին է վերաբերում առաջարկվող օրենքի նախագիծը։

«Ինչ վերաբերում է փակ տարածքներում դիմակի կրելուն, ապա գործող օրենքը նման պատասխանատվություն սահմանում է, մասնավորապես՝ փակ տարածքներում դիմակ չկրելու համար կա վարչական տուգանք 100-300 հազար դրամի չափով։ Այսինքն՝ փակ տարածքներում դիմակ չդնելու համար պատասխանատվության է ենթարկվում տնտեսվարող սուբյեկտը։ Նա պետք է արգելի իր տարածք առանց դիմակի մուտք գործել, եթե թույլ է տալիս, ապա պետք է նաև պատասխանատվության ենթարկվի»,- պարզաբանեց Վ. Դանիելյանը։