Ձեր վստահելի աղբյուրը

Հասարակական-քաղաքական գործիչ Արման Սաղաթելյանը՝ 168 TV-ի «Ռեվյու» հաղորդաշարի եթերում խոսելով արտակարգ դրության պայմաններում իշխանության կողմից իրականացվող քայլերի և իրար հակասող որոշումների մասին, շեշտել է՝ մարդիկ, ովքեր այսօր կոչված են երկրի համար կարևորագույն որոշումներ կայացնելու, երբեք նման բան չեն արել, նրանց հիմնական մասը չգիտի՝ ինչ է պետական համակարգը։

Ըստ նրա, այդ մարդիկ որևէ նշանակալից հասարակական պետական ձեռքբերում չեն ունեցել, բանակում չեն ծառայել, ուստի ակնկալել, որ իրենք ճգնաժամային պայմաններում կկարողանան հավասարակշռված և ադեկվատ որոշումներ կայացնել, պետք չէ։

«Օրինակ, երբ Իրանում համավարակի տարածումը լայն թափ էր առել, բազմաթիվ փորձագետներ պնդում էին՝ անհապաղ պետք է միջոցներ ձեռնարկել, Իրանի հետ տեղաշարժը սահմանափակել, բայց դրան ի պատասխան՝ իշխանություններն արեցին դեմագոգիկ հայտարարություններ, թե ինչպե՞ս կարելի է, մեր հարևանն է, և այլն, սակայն ասելու հաջորդ իսկ օրը կայացրեցին այդ որոշումը։ Կամ ընդունած առաջին փաստաթղթում բավականին մեծ սահմանափակումներ էին նախատեսված լրատվամիջոցների համար, և դա՝ այն դեպքում, երբ անգամ 2016 թվականի ապրիլյան մարտական գործողությունների ժամանակ, երբ դաշտում ակնհայտ և փաստացի կային կառույցներ, որոնք ուղղակիորեն թարգմանում էին Ադրբեջանի քարոզչությունը և ապատեղեկատվությունը ու դա բերում ազգային տեղեկատվական դաշտ, անգամ այդ դեպքում պետությունը սահմանափակումների չի գնացել։

Հիմա կիրառված սահմանափակումներն իրավական տեսանկյունից այնքան անորոշություններ են պարունակում, որ չի կարելի ասել, որ դրանք որակական գնահատականների վրա են հիմնված։ Առանձին խոսակցության թեմա է նաև՝ արդյո՞ք մեր Սահմանադրությունից բխում է՝ պարետին օժտել այնպիսի լիազորություններով, որոնցով նա արձակում էր իրավական ակտեր»,- ասել է Ա. Սաղաթելյանը։

Նա նշել է, որ իշխանությունը տապալել է նաև մարդկանց հեռախոսազանգերի և կարճ հաղորդագրությունների միջոցով տեղորոշելու իր իսկ ընդունած օրենքի կիրառումը, քանի որ դա չնպաստեց վարակի տարածումը կանխելուն։

«Ինչի՞ն ծառայեց այդ օրենքը, մենք չիմացանք»,- ասել է Ա. Սաղաթելյանը։

Ինչ վերաբերում է վարչապետ Նիկոլ Փաշինյանի հռչակած ապակենտրոն պայքարին, ապա, ըստ Սաղաթելյանի, հռչակված ապակենտրոն պայքարը ստացվում է ապակենտրոն պատասխանատվություն։

«Այսինքն՝ ասում են՝ ժողովուրդ ջան, ոնց գիտեք՝ փրկվեք, եթե հանկարծ ինչ-որ բան էլ լավ չգնա, վարակվեք, հիվանդանաք, կամ ունենանք մարդկային կորուստներ, իմացեք, որ դա ձեր խնդիրն է ու տնտեսվարողներինը»,- նշել է Ա. Սաղաթելյանը։

Մանրամասները՝ սկզբնաղբյուր կայքում։