Ձեր վստահելի աղբյուրը

Միքայել Մինասյանի առաջարկածը տեխնոլոգիական առումով առաջին տարբերակն է, որ խնդիրը լուծվի հենց իշխանության ներսում։ Panorama.am-ի հետ զրույցում անդրադառնալով Սուրբ Աթոռում նախկին դեսպան Միքայել Մինասյանի գրառմանն՝ ասաց քաղտեխնոլոգ Վիգեն Հակոբյանը։

«Մինասյանը չի առաջարկում արտաիշխանական, լուրջ վիրահատական քայլեր։ Նրա առաջարկած տարբերակը կարող է լինել։ Ես կարծում եմ, որ նման սխեմաներ հնարավոր են, երբ իշխանության լիդերի վարկանիշն այնքան է նվազում, որ չի կարողանում, այսպես ասած, իրար ցեմենտել իշխանության տարբեր թևերին, որոնք ունեն տարբեր ծագումնաբանություն»,- կարծիքն այսպես հիմնավորեց քաղտեխնոլոգը։

Նա նկատեց՝ գաղտնիք չէ, որ այսօրվա իշխանությունը հեղափոխության ծնունդ է, որտեղ կան քաղաքական, հասարակական, գաղափարական տարբերություններ ու նույնիսկ հակասություններ ունեցող ուժեր, որոնք ընդհանուր բան չունեն, բացի Նիկոլ Փաշինյանի լեգիտիմությունից։

«Նրանք միայն դեպքերի բերումով են հայտնվել իշխանության մեջ, նրանց ցեմենտողը միայն Նիկոլ Փաշինյանն է։ Հիմա, եթե Նիկոլ Փաշինյանի վարկանիշը կորոնավիրուսի համավարակի ու դրա սոցիալ-տնտեսական ճգնաժամի, կոմպրոմատային պայքարի, ինֆորմացիոն պատերազմի պատճառով զգալիորեն նվազի, ապա, ես չեմ կասկածում, որ կլինեն բավականին շատ կենտրոնախույս ուժեր, որոնք կփորձեն խորտակվող նավից րոպե առաջ հեռանալ։ Նման պայմաններում տարբերակներից մեկն էլ այն է, որ քաղաքական ուժը կարող է փորձել միջանկյալ տարբերակ»,- նշեց նա։

Քաղտեխնոլոգը իշխանության մեջ կարող կադրեր, որոնք կարող են լինել վարչապետ, չի տեսնում։

«Բայց ոնց հասկանում եմ, այս առաջարկը ներկայացրած մարդը մեկ-երկու հոգու տեսնում է։ Մամուլում անուններ հնչում են, ես չգիտեմ՝ նրա՞նց ի նկատի ունի Մինասյանը, թե՞ ոչ։ Փոխարինող տեսնում եմ, քանի որ այնպես չէ, որ Նիկոլ Փաշինյանը վարչապետի իդեալ է, նա հեռու է իդեալ լինելուց»,- մանրամասնեց Հակոբյանը։

Քաղտեխնոլոգն ընդգծեց, բայց այն մարդը, ում մասին խոսվում է, պետք է ունենա կամ Փաշինյանի նույն վարականիշը, կամ առավելություն, որպեսզի կարողանա միավորել իշխանության մեջ եղած տարբեր ուժերի, հոսանքների։

«Ես անձամբ այս պահի դրությամբ եղածների  մեջ նման մարդ չեմ տեսնում։ Ժամանակավոր բոլորը կարող են լինել։ Այս իշխանությունը հիմնված է Նիկոլ Փաշինյանի վրա, ապա Փաշինյանի փոփոխության մասին խոսելը նշան է, որ շատ շուտով ընտրություններ են լինելու»,- նման կարծիք հայտնեց Հակոբյանը։

Քաղտեխնոլոգը նկատեց՝ Փաշինյանի վարկանիշն ընկնում է։

«Նրա մոտ ցուցվանգային իրավիճակ է, պետք է ինչ-որ քայլեր անի, բայց արդյունավետ ու օգտակար քայլեր չի կարողանում անել, յուրաքանչյուր քայլը քաղաքական նոր պրոբլեմ է առաջացնում, դա նաև քայլ է տալիս իր քաղաքական ընդդիմախոսներին։ Գաղտնիք չեմ ասում երևի, որ նրա ամեն լայվը, հայտարարությունն աշխատում է իր դեմ։ Եթե խոսում ենք միտումների մասին, ես կարծում եմ, որ այս պահի դրությամբ, երբ ճգնաժամն ավելի է խորանում, երբ կորոնավիրուսի դեմ պայքարի ծրագիրը տապալված է, բերելու է նրան, որ Փաշինյանի վարկանիշն էլի է ընկնելու, եթե կտրուկ փոփոխություններ դրական առումով չարվեն»,- հնարավոր հետևանքները ներկայացրեց Հակոբյանը։

Նա համեմատություն արեց, օրինակ, նախագահական կառավարման դեպքում նման իրավիճակներում վարչապետ են փոխում, բայց այս պարագայում իշխանությունը չի կարող խնդիրը լուծել կամ հասարակության տրամադրությունը փոխել, նրա մոտ նոր հույսեր արթնացնել նախարար փոխելով։

«Պետք է փորձեն կտրուկ քայլերի գնալ։ Եվ ահա այս կոնտեքստում կարելի է Մինասյանի առաջարկած քայլին գնալ։ Ես կարող եմ կանխատեսումներ անել, թե ով կարող է լինել փոխարինողը, բայց դա անշնորհակալ գործ կլինի»,- խոսքն ամփոփեց նա։