Ձեր վստահելի աղբյուրը

ԱԺ Տարածաշրջանային և եվրասիական ինտեգրման հարցերի մշտական հանձնաժողովում ՊԵԿ նախագահի տեղակալ Միքայել Փաշայանը ներկայացրեց «Եվրասիական տնտեսական միության մաքսային տարածք ներմուծված ապրանքների հետագծելիության մեխանիզմի մասին» համաձայնագիրը , որը ստորագրվել է 2019 թվականի մայիսի 29-ին Նուր-Սուլթանում:

Բանախասը հայտնեց, որ համաձայնագրի կնքման հիմնական նպատակը ԵԱՏՄ մի անդամ պետության տարածքից մեկ այլ անդամ պետության տարածք հետագծելիության մեխանիզմի կիրառման միջոցով տեղափոխվող ապրանքների շրջանառության օրինականության ապահովումն է, ինչպես նաև մաքսային և հարկային վճարների վճարումից խուսափելու տարբեր սխեմաների օգտագործումը բացառող պայմանների ստեղծումը:

Համաձայնագրով սահմանվում է Եվրասիական տնտեսական միությունում հետագծելիության մեխանիզմի ստեղծման և գործունեության կարգը:

Հաշվառումը, ըստ Փաշայանի, ԵԱՏՄ տարածք ապրանքների ներմուծման փաստաթղթերի փոխկապակցվածության ամրագրումն է, ինչը նշանակում է, որ ապրանքը մի ընկերությունից մյուսին վաճառելու դեպքերում, նախորդող հարկային հաշիվները պետք է ներառվեն և տեսանելի լինեն միասնական համակարգում:

Համաձայնագրով սահմանվում է, որ հետագծելիության մեխանիզմի գործունեության շրջանակներում անդամ պետություններն ապահովում են տեղեկատվական փոխգործակցություն էլեկտրոնային տեսքով այն տեղեկությունները փոխանակելու միջոցով, որոնք պարունակվում են հետագծելիության ազգային համակարգերում:

Հետագծելիության ազգային համակարգերի միջև տեղեկատվության փոխանակումն իրականացվում է Եվրասիական տնտեսական հանձնաժողովի կողմից հաստատվող տեխնոլոգիական փաստաթղթերին համապատասխան, որոնցով կանոնակարգվում է տեղեկատվական փոխգործակցությունը` արտաքին և փոխադարձ առևտրի ինտեգրացված տեղեկատվական համակարգի միջոցներով ընդհանուր գործընթացներ իրականացնելիս:

Ըստ Փաշայանի, համաձայնագրով նախատեսվում է, որ հետագծելիությունն իրականացվելու է Եվրասիական տնտեսական հանձնաժողովի կողմից հաստատվելիք ցանկում ներառված ապրանքների նկատմամբ:

Համաձայնագրի գործողությունը տարածվում է «բացթողում` ներքին սպառման համար» մաքսային ընթացակարգին համապատասխան բացթողումից հետո, մյուս հարաբերությունններին չի առնչվում:

Տեղեկացնելով, որ հետագծելիության մեխանիզմը նախատեսվում է ներդնել հաջորդական փուլերի միջոցով՝ բանախոսը հայտնեց, որ առաջին փուլում այն գործելու է պիլոտային ծրագրի շրջանակներում, որի իրականացման ժամկետները և պայմանները կսահմանվեն Եվրասիական տնտեսական հանձնաժողովի կողմից:

Համաձայնագրի 14-րդ հոդվածով նախատեսված ապրանքների հետագծելիության ազգային համակարգի ստեղծումը, ըստ ՊԵԿ նախագահի տեղակալի, կարող է ՀՀ պետական բյուջեից լրացուցիչ ֆինանսավորման անհրաժեշտություն առաջացնել:

Միքայել Փաշայանը հայտնեց, որ համաձայնագրի գործողությունը չի տարածվում հետագծելիության ենթակա այն ապրանքների վրա, որոնք իրացվել են մանրածախ առևտրում: Նման վաճառքից հետո այդ ապրանքի համար համակարգը կանգնում է և դադարեցվում է տեղեկատվության տեղադրումը:

«Երկրորդ, ԵԱՏՄ տարածքում վերամշակման ռեժիմով ներմուծվող ապրանքների վրա չի տարածվում այն և չի տարածվելու նաև ֆիզիկական անձանց նկատմամբ, որոնք ապրանքները ներմուծել են անձնական օգտագործման նպատակով»,- հայտնեց բանախոսը:

Հանձնաժողովը դրական եզրակացություն տվեց համաձայնագրին: