Ձեր վստահելի աղբյուրը

Փաստաբան Նորայր Նորիկյանը, անդրադառնալով փաստաբան Տիգրան Աթանեսյանի տան վրա կատարված հարձակմանը, ֆեյսբուքյան իր էջում գրել է.

«Որևէ փաստաբանի և վերջինիս ընտանիքի նկատմամբ դրսևորած ցանկացած ոտնձգություն իրական սպառնալիք է մարդու իրավունքների, իրավական պետության և պետության ապագայի դեմ։

Փաստաբանը, նրա ընտանիքի անդամները և նրանց գույքը գտնվում են պետության պաշտպանության ներքո։

Պետական իրավասու մարմինները պարտավոր են ձեռնարկել փաստաբանի պաշտպանության համար անհրաժեշտ` օրենքով սահմանված միջոցներ, եթե իր մասնագիտական պարտականությունների կատարման հետ կապված՝ նրան կամ նրա ընտանիքի անդամներին սպառնացել են ֆիզիկական բռնությամբ, գույքի ոչնչացմամբ կամ այլ անօրինական գործողություններով:

Խստորեն դատապարտում եմ ՀՀ փաստաբանների պալատի անդամ, փաստաբան Տ․ Աթանեսյանի բնակարանի վրա տեղի ունեցած հարձակումը և ընտանիքի անդամների նկատմամբ իրականացված սպառնալիքները՝ հորդորելով իրավապահ մարմիններին ձեռնարկել կոնկրետ քայլեր՝ մեղավոր անձանց պատասխանատվության ենթարկելու համար։

Այսպիսի ՛«Բեսպրեդելը՛» պետք է մեկընդմիշտ արմատախիլ արվի մեր կյանքից»։