Ձեր վստահելի աղբյուրը

«Վերաքննիչ քրեական դատարանում քննվում էր Գագիկ Խաչատրյանի կալանքի երկարացման վերաբերյալ բողոքը։ Ներկայացրեցինք բոլոր հիմքերն ու հիմնավորումները, որոնց համաձայն, Գագիկ Խաչատրյանը պետք է անհապաղ ազատ արձակվի»,-Վերաքննիչ քրեական դատարանի դիմաց Խաչատրյանների փաստաբանական խմբի անդամ Երեմ Սարգսյանը լրագրողների հետ ճեպազրույցում։

Քննությունն իրականացրել է դատավոր Արմեն Դանիելյանը։ Դատարանը հեռացել է խորհրդակցական սենյակ։ Դատարանի որոշումը կհրապարակվի երկուշաբթի օրը։

Երեմ Սարգսյանն ընդգծեց, որ իրենք մշտապես հայտարարել են, որ Գագիկ Խաչատրյանը վիրահատության կարիք ունի, մինչդեռ վարույթն իրականացնող մարմինը, մեղադրանքի կողմը  կասկածելի պայմաններում ձեռք է բերում ու  ներկայացնում միջգերատեսչական հանձնաժողովի եզրակացությունը, ըստ որի Գագիկ Խաչատրյանը ոչ միայն վիրահատության կարիք չունի, այլև բուժման կարիք չունի։

Նա հիշեցրեց, որ 2019-ի ամռանը երկու անգամ առաջատար մասնագետների մասնակցությամբ կոնսիլիում էր եղել ու եզրակացություն էին տվել, որ այո, Գագիկ Խաչատրյանն ունի վիրահատության կարիք։

Փաստաբանն ասաց, որ մեկ ամիս առաջ էլ կոնսիլիում է հրավիրվել, որտեղ առաջատար մասնագետներն ասել են՝ առկա է ողնաշարի ստենոզ, կա վիրահատության անհրաժեշտություն։
«Սա մենք ներկայացրել ենք դատարան։ Եթե անձն ունի բուժման կարիք և այնպիսի հիվանդություն է, որը անձին կարող է պահել մշտական ցավերի մեջ ու հանգեցնել անդառնալի հետևանքների, ապա պետությունը պարտավոր է կանխել այն»,-ասաց փաստաբանը։

Փաստաբանն ասաց, վիրահատությունը Հայաստանում հնարավոր չէ, «Աստղիկ» ԲԿ-ում ստացած թերապիաների նպատակը եղել է ոչ թե բուժումը, այլ ցավերի մեղմացումը։