Ձեր վստահելի աղբյուրը

«Այօրվանից դիմակների կրումը խիստ կերպով վերահսկվելու է, նաև վարչական տուգանքներ կան չկրելու կամ չունենալու հետ կապված, ուզում եմ հասկանալ՝ արդյո՞ք ոչ բարեխիղճ մրցակցություն կա դիմակի շուկայում, կա՞ն ընկերություններ, որոնք մոնոպոլ դիրք են զբաղեցնում»,- խորհրդարանական լսումների ընթացքում նման հարց հնչեցրեց ԱԺ «Իմ քայլը» խմբակցության պատգամավոր Նազելի Բաղդասարյանը՝ դիմելով ՏՄՊՊՀ նախագահ Գեղամ Գևորգյանին։

Պատասխանելով պատգամավորի հարցին՝ Գ. Գևորգյանն ասաց, որ ուսումնասիրությունն անցկացվել և ավարտվել է, ու վաղը հանձնաժողովի հերթական նիստում ընդգրկված է գերիշխող դիրքի չարաշահման և հակամրցակցային  համաձայնության փաստի հիմքով վարույթի հարուցումը։

«Հետևյալ երևույթն է տեղի ունեցել, մենք վերցրել են դեկտեմբերից մինչև մայիս ժամանակահատվածը, քանի որ դեկտեմբերին դիմակի գները, կարծես թե, կարգավորված էին, և որևէ խնդիր չկար։ Համեմատել ենք բոլոր մեծածախ և մանրածախ վաճառք իրականացնող խոշոր յոթ ընկերությունների գնային քաղաքականությունները։ Ունենք հետևյալ պատկերը, որ դիմակի ներկրումը մոտ տասը անգամ թանկացել է, բայց բացի այդ թանկացումից, մեծածախ ձեռքբերում է իրականացվել, որտեղ մարժա է գումարվում, և դրա չափը մեզ անհանգստացրել է։ Դրա հիման վրա էլ իրականացրել ենք ուսումնասիրություն»,- տեղեկացրեց Գ. Գևորգյանը։

Նա շեշտեց, որ մեկ-երկու օրվա ընթացքում հնարավոր չէր պատկերացում կազմել դիմակի գների մասին։

«Հայաստանում դիմակի ֆիքսված ամենաբարձր գինը 220 դրամն է։ Ամենահասարակ և ամենալայն սպառման դիմակի մասին է խոսքը։ Ձեռքբերման համար երկու արտադրություն կա, դրանց ինքնարժեքներն են ուսումնասիրել։ Կա արատավոր երևույթ, որ ՀՀ-ում արտադրված դիմակը տնտեսվարող սուբյեկտները մեծածախ վաճառքով ձեռք են բերում, հետո տալիս են դեղատների ցանցերին»,- նշեց Գ. Գևորգյանը, ապա հավելեց, որ ամբողջ աշխարհում կա դիմակի գնի բարձրացման խնդիր։

Ն. Բաղդասարյանն էլ հորդորեց ուշադրությունը հատկապես մարզերի վրա սևեռել, քանի որ եթե այս պահին Երևանում հնարավոր է 150 դրամով ձեռք բերել դիմակ, ապա մարզերում անբարեխղճության տարրը կա։

Գ. Գևորգյանն արձագանքեց, որ մարզերում երրորդ  միջնորդներն էլ են հայտնվում, և գաղափար կա, որ դիմակները հանրային վայրերում ավտոմատ ապարատների միջոցով վաճառվեն, ըստ որի՝ դիմակի գինը մոտ 100 դրամով կիջնի, որովհետև միջնորդները դուրս կգան։