Ձեր վստահելի աղբյուրը

«Վերջին մի քանի օրերին Հայաստանում աճում են կորոնավիրուսով վարակի դեպքերը։ Համաճարակաբանական վերլուծությունների արդյունքները փաստում են այն մասին, որ թվերի աճը պայմանավորված է նաև լաբորատոր կարողությունների ընդլայնմամբ՝  ներառվել են և մարզային  մակարդակի լաբորատորիաները, առանձին բժշկական կենտրոնների լաբորատորիաները»,-ասուլիսում ասաց առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի վարակիչ հիվանդությունների համաճարակաբանության բաժնի պետ Լիանա Թորոսյանը։

Նա նշեց, որ ունեն լայն աշխարհագրական տարածվածությամբ դեպքեր, օջախային՝ ընտանեկան, առանձին տնտեսվարող սուբյեկտների մոտ արձանագրված։

«Ունենք դեպքեր մեր իսկ կողմից կազմակերպված միջոցառումների արդյունքում, երբ մեկ կազմակեպված միջոցառումը հետագայում նաև փոքր ձնագնդից մեծանում դառնում է ավելի մեծ, ձևավորվում են նոր օջախներ»,- նշեց նա։

Հարց- Վրաստանի «Ինֆեկցիոն պաթոլոգիաների, ՁԻԱՀ-ի և կլինիկական իմունոլոգիայի կենտրոնի» գլխավոր տնօրեն, պրոֆեսոր Թենգիզ Ցերտցվաձեն հայտարարել է, որ պատրաստ է կիսվել  կորոնավիրուսի դեմ պայքարում Վրաստանի փորձով՝ Վրաստան հրավիրելով Հայաստանի առողջապահության նախարար Արսեն Թորոսյանին  և այլ հետաքրքրված անձանց։ Պատրաստվո՞ւմ եք արդյոք ընդունել հրավերը։

Լ. Թորոսյան- Այս հարցը, կարծեմ, մեր ղեկավարության և որոշում կայացնողների տիրույթում է։ Իհարկե, այն կարողությունները, որոնք ձևավորված են Վրաստանում, նաև Հայաստանում են։ Իհարկե, կարող են լինել հսկողական համակարգի որոշակի առանձնահատկություններ։ Բայց եթե առաջարկն ընդունվի, կարծում եմ՝ կարելի է։

Հարց- Կարո՞ղ եք մանրամասնել՝ Սևանում կորոնավիրուսի օջախն ինչպե՞ս է բռնկվել, ինչո՞ւ քաղաքում ավելի շուտ խիստ միջոցառումներ չիրականացվեցին, քանի որ, մեր տեղեկություններով, մոտ տաս օր առաջ այնտեղ դեպքերը շատ էին։ Եթե Սևանում կորոնավիրուսի մասսայական դեպք է գրանցել, ի՞նչ եք կարծում՝ կարո՞ղ է հաջորդ օջախը Քաջարանը լինել՝ հաշվի առնելով երեկվա բազմամարդ հավաքը։

Լ. Թորոսյան- Ոչինչ չեմ կարող բացառել կամ հաստատել հարցի վերջին մասով։ Իհարկե, հնարավոր է, որովհետև տեսանք բոլորն ակտիվ շփվում էին, սոցիալական հեռավարությունը չէին պահպանել, կային մարդիկ, որոնք առանց դիմակների էին, ինչը կարող է հանդիսանալ նոր օջախի  ձևավորման առիթ։

Ինչ  վերաբերում Սևանին, կարող է լինել հենց մարզում ձևավորված օջախների շարունակականությունը։ Միջոցառումները մշտապես են իրականացվել բոլոր մարզերի ու համյանքների համար։ Իհարկե, այստեղ նաև մարդկային գործոնն է։

Հարց- Շատ երկրներում հիվանդների թիվը ոչ թե ավելանում է, այլ նվազում է։ Ի՞նչն է պատճառը, որ տարածաշրջանում մեր երկիրն ամենավատ ցուցանիշն ունի, ի՞նչ է հարկավոր, որ այն կանգ առնի կամ գոնե նվազի։

Լ.Թորոսյան- Որպես Հայաստանի քաղաքացի, ես էլ եմ շրջում, իհարկե, երբ ազատ ժամանակ է  լինում, այն վերաբերմունքը, որ տեսնում եմ մեր ազգաբնակչության կողմից... Դիմակ կրելը մեկ այլ բան է, ճիշտ կրելը՝ մեկ այլ բան, որպեսզի կարողանանք ավելի արդյունավետ այս միջոցառումն իրականացնենք։

Բոլոր երկրներում արվում են այն միջոցառումները, ինչը որ արվում է Հայաստանում, ուղղակի այստեղ մի փոքր կարգապահության հարց է։ Կարգապահությունից զուտ նաև այս  հիվանդությունն աչալրջություն ու վերաբերմունք է պահանջում։ Ուղղակի պետք է ականջալուր լինել հորդորներին, պետական ատյանների կողմի ներկայացվող առաջարկություններին ու իրականացնել։

Յուրաքանչյուրս պետք է վերցնենք պատասխանատվությունը մեզ վրա, որպեսզի կարողանանք այս իրավիճակից դուրս գանք հավուր պատշաճի։