Ձեր վստահելի աղբյուրը

Ըստ Հայոց ցեղասպանության թանգարան-ինստիտուտի նոր տնօրենի կողմից արված հիմնական ֆոնդում կառուցվածքային փոփոխությունների առաջարկի՝ հիմնական ֆոնդում գրանցված  գրքերը, մամուլը պետք է համապատասխան ընթացակարգով հանվեն հիմնական ֆոնդից ու ընդգրկվեն նոր ձևավորվող գրադարանում։ Ազգային ժողովում կառավարության հետ հարց ու պատասխանի ժամանակ ասաց «Լուսավոր Հայաստան» խմբակցության պատգամավոր Աննա Կոստանյանը։

Նրա խոսքով, այս դեպքում պետք է գործի «Գրադարանների մասին» ՀՀ օրենքը, հետևաբար, կփոխվի նաև դրանց կարգավիճակը, այսինքն, հնարավորություն է տրվելու նաև ֆոնդային նյութերի դուրս բերումը թանգարանային սենյակներից, չի բացառվում նաև թանգարանից։ 

Այնուհետև նա հարցադրումներով դիմեց Կրթության, գիտության, մշակույթի և սպորտի հարցերի նախարար Արայիկ Հարությունյանին՝ արդյոք մասնագիտական հանձնաժողով ձևավորվել է կառուցվածքային փոփոխություններ իրականացնելու համար, քանի որ սա զուտ թանգարան չէ, ինչ-որ առումով գաղափարախոսական հիմնարկ է, որքանո՞վ եք գնահատում հետևյալ քայլերը նպատակային, արդյոք այստեղ չեք տեսնում ազգային անվտանգության հարց, քանի որ նյութերը  կարող են դուրս բերվել ինստիտուտից, պատահաբար, ինչ -որ հանգամանքներում կորեն։

Նախարարն իր պատասխանում նախ ասաց. «Այս հարցը, իմ խորին համոզմամբ, որոշակի շրջանակների քաղաքական շահարկման հարց է դարձել»։

Ա.Հարությունյանի խոսքով, այս գործընթացներում կարուստների որևէ վտանգ չկա։

«Ավելին՝ տարիներ առաջ ամբողջ ֆոնդը, որը ձևավորվել է Ցեղասպանության թանգարան-ինստիտուտում, մտցվել է որպես ֆոնդային նմուշներ, այդ թվում նաև գրադարանի նմուշները։ Ըստ էության, դրանցից անհնար էր օգտվել։ Հիմա, մասնագիտական հանձնաժողովի միջոցով, որը ձևավորել էր ինստիտուտի տնօրենը, որոշում է  կայացրել ձևավորել գրադարան, որը հասանելի կլինի բոլորին, այդ գրադարանից կարող են օգտվել բոլոր այն հետազոտողները, որոնք  ցանկություն ունեն ուսումնասիրություններ իրականացնել կոնկրետ ոլորտում։ Ինչ վերաբերում է  կորուստին, հիմա այնտեղ ֆոնդի ուսումնասիրություն է գնում, պարզվել է, որ նույնիսկ փակ ֆոնդից որոշ նմուշներ կորել են կամ այս պահին հայտնաբերված չեն։ Հունիսին եզրակացությունը կտրամադրեն։

Այստեղ իմ ասածի տրամաբանությանն այն է, որ եթե որևէ բան կորցնելու միտում կա, կարող է կորել և բաց, և փակ ֆոնդերից։ Նման տրամաբանությամբ մտածելը նշանակում է պետք է փակենք Ազգային գրադարանը, մնացած գրադարանները։ Մենք լիարժեք կապահովենք այդ ֆոնդերի անվտանգությունը»,- ասաց Ա.Հարությունյանը։

Նա ընդգծեց, որ Հայոց ցեղասպանության թանգարան-ինստիտուտի խորհրդով է հաստատված այն ծրագիրը, որն իրականացվում է։