Ձեր վստահելի աղբյուրը

Կառավարությունն ընդունեց Հայաստանի Հանրապետության հարկային օրենսգրքում փոփոխություններ և լրացումներ կատարելու վերաբերյալ որոշման նախագիծը։
Ֆինանսների նախարար Ատոմ Ջանջուղազյանը նշեց, որ  նախագծով առաջարկում են փոփոխություններ կատարել Հարկային օրենսգրքում այն տրամաբանությամբ, որպեսզի հնարավոր լինի հարկել տեսանելի հարստությունը համարժեքորեն։

Նա ասաց, որ անշարժ գույքի հարկման բազայի համար հիմք է  ընդունվում կադասրտային արժեքը, որը, ինչպես հայտնի է, էականորեն տարբերվում է  դրանց շուկայական արժեքներից։  Նախարարի խոսքով, առաջարկվող փոփոխության արդյունքում ակնկալվում է, որ գույքային հարկերի հարկման  պոտենցիալը մոտ 4,3 անգամ կաճի:

«Սա նշանակում է, որ հնարավորություն կընձեռվի համայնքներին՝ իրենց առաջ ծառացած խնդիրների այլ որակի լուծման հասնել», - ասաց նախարարը:

Ա.Ջանջուղազյանի խոսքով, ներկայում մինչև 3 միլիոն դրամ գնահատված բնակելի տների համար հարկ չի գանձվում և հիմա առաջարկվում է թեկուզ փոքր, բայց որոշակի  դրույքաչափ սահմանել ցանկացած արժեք ունեցող անշարժ գույքի համար։ Առաջարկվել  է, որ համակարգը ներդրվի աստիճանաբար՝ երեք տարվա ընթացքում:

Վարչապետ Նիկոլ Փաշինյանն ասաց, թե նախագիծը կարևորագույն ռեֆորմներից մեկն է, որ ստանձնում է իրենց կառավարությունը։

«Այստեղ, իմ կարծիքով, տեղի են ունենում մի շարք կարևոր հեղափոխական նշանակության փոփոխություններ: Առաջինը՝ չհարկվող անշարժ գույք հասկացությունը վերացվում է», - ասաց նա։

Նիկոլ Փաշինյանի խոսքով, պետական բյուջեի նկատմամբ կա երկու վերաբերմունք. «Երբ պետական պաշտոնյաները կամ համակարգը դա համարում են իրենցը, իսկ հանրությունը բյուջե վճարած ամեն կոպեկ համարում է, ըստ էության, կորսված փող ենթագիտակցության մեջ։ Սա ունի օբյեկտիվ և սուբյեկտիվ պատճառներ:  Մենք ասում ենք, որ պետական և տեղական բյուջեի նկատմամաբ պետք է վերաբերմունք փոխվի։ Դա մեր համախառն ազգային գրպանն է, որը պատկանում է բոլորիս և մեր յուրաքանչյուրի բարեկեցությունը և անվտանգությունը կախված է նրանից, թե ինչքան գումար է հավաքվում այդտեղ, հետևաբար, մենք պետական բյուջեին պետք է վերաբվենք այնպես, ինչպես վերաբերվում ենք ընտանեկան բյուջեին»:

Կառավարության ղեկավարի խոսքով, հաշվարկները ցույց են տվել, որ  կլինի գույք, որի հարկը կլինի տարեկան 100 դրամ. «Ֆիսկալ առումով սա որևէ նշանակություն չունեցող հարաբերություն է, բայց հոգեբանական, քաղաքական, քաղաքացիական առումով հսկայական նշանակություն ունեցող հարաբերություն է»։

Ն.Փաշինյանն ընդգծեց, որ ընդհանուր առմամբ գույքահարկն ավելանալու է և առավելապես ավելանալու է այն գույքերի վրա, որոնք «մենք պայմանականորեն անվանում ենք դղյակներ, ապարանքներ և այդպես շարունակ»:

Վարչապետի խոսքով,  մեծադղիրդ առանձնատներն այսօր  սիմվոլիկ գույքահարկ են վճարում։

«Այստեղ ճոխության հարկի կոմպոնենտ նույնպես կա: Սա շատ կաևոր դեր է խաղալու Հայաստանում քաղաքաշինական կուլտուրայի զարգացման գործում։ Հիմա մարդիկ տներ կառուցում են առանց որևէ հարակից գործոն հաշվի առնելու, մտածում են՝ ինչքան մեծ, ինչքան բարձր, ինչքան ուրիշներին ճնշող, այնքան ավելի լավ: Եթե այդպես է, ուրեմն պետք է վճարեն այդպիսի սեփականությունների տնօրինողները»,-ասաց Ն. Փաշինյանը:

Վարչապետի խոսքով, ըստ էության,  չորս փուլային հարկային բարեփոխումների համակարգ են ներդնում և ճգնաժամային այս ժամանակահատվածում առաջին տարում մոտավորապես 500 հազար շահառուի գույքահարկը կնվազի, հաջորդ տարվանից կսկսի կամաց-կամաց ավելանալ։
Ն. Փաշինյանի խոսքով, 2021 թվականին ճգնաժամային տրամաբանաության մեջ կլինեն գույքահարկի առումով, իսկ հետագայում տնտեսական ակտվությունն ու աճի տեմպը կվերականգնեն և բարձրացրումը կլինի իրավիճակին համարժեք:

«Մենք հանել ենք  կամայական հասցեներ և համեմատել ենք այսօրվա գույքահարկի կիրառումն ապագա գույքահարկի վճարի հետ: Մենք զուտ բանաձևով ստանում էինք դեպքեր, երբ գույքահարկը 300-400 անգամ բարձրանում է: Որոշեցինք տեղայնացնել և պարզեցինք, օրինակ, որ դա այն դեպքերն են, երբ այսօր վճարվում է 1 դրամ, օրենքի փոփոխությունից հետո պետք է վճարի 300 դրամ: Կամ հարկը 200 տոկոսով բարձրանում է, պարզեցինք, որ  վճարում է 500 դրամ, հիմա պետք է վճարի տարեկան 1000 դրամ: Իհարկե, ունենք դեպքեր, երբ  հարկը 2-3 անգամ ավելանում է, բայց  արդարացի ենք համարում, որովհետև այսօր դղյակներ կան, որոնք տարեկան վճարում են 800 հազար դրամ, բայց օրենքի փոփոխությունից հետո պետք է վճարեն 15 միլիոն դրամ: Ակնհայտ է, որ այդ սեփականատերերի համար այդ 15 միլիոն  դրամը ոչ մի բան է, ըստ էության: Եթե մարդը այդ կարգի դղյակ է կառուցել, պետք է այդպես էլ լինի»,-ասաց Նիկոլ Փաշինյանը: