Ձեր վստահելի աղբյուրը

ԱԺ «Իմ քայլը» խմբակցության պատգամավոր Նիկոլայ Բաղդասարյանին հեծանիվով վրաերթի եթարկելու գործով կալանավորված Արթուր Ալեքսանյանն ազատ է արձակվել։

«Շնորհիվ փաստաբաններ Էմին Բեգլարյանի, Կարեն Մեժլումյանի, ԿԱՄՔ-ի իմ անկոտրում ընկերների, հարազատների, գաղափարակիցների ջանքերի խափանվեց կալանքի անարդարացի և անօրինական որոշումը և երեկվանից գտնվում եմ հարաբերական ազատության մեջ։
Շնորհակալություն բոլորին։ Լանզարոտեի կոնվենցիայի թաքնված նպատակները չպետք է իրականություն դառնան մեր երկրում»,-գրել է Արթուր Ալեքսանյանը։

Հիշեցնենք, որ մայիսի 11-ին պատգամավոր Նիկոլայ Բաղդասարյանը հաղորդում է ներկայացրել այն մասին, որ իր ծառայողական պարտականությունները կատարելու պատճառով, 2020թ. ապրիլի  11-ին՝ ժամը 17:10-ի սահմաններում, անհայտ անձն իր վրա է վարել հեծանիվը, որից հետո իր հասցեին հնչեցրել է բռնություն գործադրելու սպառնալիք:

Հարուցվել է քրեական գործ, Էջմիածին քաղաքի բնակչին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով և միջնորդություն էր ներկայացվել դատարան՝ նրա նկատմամբ որպես խափանման միջոց կալանավորում ընտրելու  վերաբերյալ,  ինչը բավարարվել էր:

Փաստաբանների պալատի նախագահ Արա Զոհրաբյանը հայտարարել էր, որ Ա. Ալեքսանյանին անհիմն մեղադրանք է առաջադրվել։