Ձեր վստահելի աղբյուրը

ԱԺ մեծամասնությունը ներկայացնող ուժը առաջարկում է «Հանրաքվեի մասին» օրենքում ներառել հետևյալ նոր դրույթը. ««Հանրաքվեի մասին» սահմանադրական օրենքի 6-րդ հոդվածի 3-րդ մասով նախատեսված դեպքում պատգամավորների ընդհանուր թվի առնվազն մեկ քառորդը կարող է ներկայացնել Ազգային ժողովի կողմից Սահմանադրության փոփոխությունների նախագիծը հանրաքվեի դնելու վերաբերյալ որոշումը ուժը կորցրած ճանաչելու մասին Ազգային ժողովի որոշման նախագիծ, որը Կանոնակարգի 100-րդ եւ 101-րդ հոդվածներով սահմանված կարգով Ազգային ժողովի նիստում քննարկվում, ընդունվում է»:

Պատգամավոր Նաիրա Զոհրաբյանը  օրինագիծը զեկուցող Վահագն Հովակիմյանին հարցրեց, թե  հնարավո՞ր է այդ տրամաբանությամբ ստեղծվի իրավիճակ, որ ֆորսմաժորային իրավիճակում չեղարկեն խորհրդարանական ընտությունները, Հայաստանը հռչակեն միապետություն կամ ինչ ուզեն անեն, որովհետև այդ պահի ֆորսմաժորային վիճակը թելադրում է այդ պահի նպատակահարմարությունը:

Նաիրա Զոհրաբյանը ենթադրեց, որ այն արվում է ՍԴ-ի վերաբերյալ հանրաքվեի հարցը ոչ թե հանրաքվեով, այլ խորհրդարնում լուծելու համար:

«Տիկին Զոհրաբյան ջան, ԱԺ ընտրությունների ճակատագիրը Սահմանադրությամբ ամրագրված է, որտեղ ասվում է, որ ռազմական կամ  արտակարգ դրության պայմաններում ընտրություններ չեն անցկացվում և սահմանված է, թե այդ դրության  ավարտից հետո ինչպես են անցկացվում դրանք»,- նկատեց Վահագն Հովակիմյանը:

Նաիրա Չոհրաբյանը պնդեց, որ նախագծով սահմանադրական քայլ է աարվում չեղարկելու առաջիկա հանրաքվեի անցկացումը, ինչը իր տեսակետն է և այն կպնդի ելույթի ժամանակ:

Վահագն Հովակիմյանը նկատեց. «Տիկին Զոհրաբյան, ես կյանքս կտայի, որ դուք միշտ Ձեր տեսակետը պնդելու հնարավորություն ունենաք, բայց դա չի նշանակում, որ Ձեր տեսակետը ճիշտ է»:

Ըստ պատգամավորի, Սահմանադրությունը չի կարգավորում օրինագծով ներկայացված խնդիրը, դրա համար էլ իրենք հանդես են եկել նախաձեռնությամբ:

«Պարոն Հովակիմյան, դուք երկու անգամ պատրաստակամություն հայտնեցիք ձեր կյանքը զոհաբերել: Պետք չէ որևէ մեկի կյանքը զոհաբերել, պետք է ընդամենը կեղծ օրակարգեր չբերել այս ամբիոնից»,-իր ելույթում արձագանքեց Զոհրաբյանը:

Վերջինս պնդեց, որ օրինագծով խորհրդարանին տրվում է լիազորություն չեղարկել հանրաքվեն, որից հետո փորձելու են լուծել սահմանադրական դատարանի հարցը, ինչը կեղծ օրակարգ է:
Նաիրա Զոհրաբյանը նկատեց, որ այսօր կորոնավիրուսով վարակվածների  թիվը 372  է եղել, սոցիալական բազմաթիվ խնդիրներին լուծում չի տրվում:

«Այս իրավիճակում փորձում եք «Հրայր Թովմասյան» անունով կեղծ օրակարգ բերել, թիթեռ եք նկարում այստեղ, մեզ համար չկա նման օրակարգ»,- նկատեց Զոհրաբյանը և հավելեց, որ իրենց համար Հ. Թովմասյանի և սահմանադրական դատարանի այս կազմի հարց չկա և հիշեցրեց, որ «Բարգավաճ Հայաստան» խմբակցությունը Թովմասյանին դեմ է քվեարկել:

«Ինչու եք վախենում հանրաքվեից, հանրաքվեն կավարտիվի և ժողովրդի ձայնով կորոշեք ՍԴ խնդիրը: Իսկ ներկայացված նախագիծը հակասում է սահմանադրությանը»,- եզրափակեց պատգամավորը:

«Իմ քայլը» խմբակցության պատգամավորները չհերքեցին, որ օրինագիծը վերաբերում է նաև ապրիլի 5-ի հանրաքվեին: