Ձեր վստահելի աղբյուրը

Կառավարության այսօրվա նիստում արդարադատության փոխնախարար Ռաֆիկ Գրիգորյանը ներկայացրեց ՀՀ վարչական դատավարության օրենսգրքում փոփոխություններ ու լրացումներ կատարելու մասին նախագիծը։

Նա նշեց, որ ներկայումս թե վարչական ակտի վերաբերյալ վարչական բողոք ներկայացնելը և թե վիճարկման հայց ներկայացնելը հանգեցնում են վարչական ակտի կատարման կասեցման։ Խնդիրը նրանում է, որ երրորդ անձանց կողմից հաճախ վիճարկվում է այլ անձի համար բարենպաստ վարչական ակտը, որը Վարչական դատավարության օրենսգրքի 83-րդ հոդվածի ուժով ինքնաբերաբեր հանգեցնում է վարչական ակտի կատարման կասեցման։

Փոխնախարարան ասաց, որ խնդիրը բարձրացավ շինարարական  թույլտությունների վիճարկումից, որի հետևանքով շինաշխատանքները կասցեվում է։ Մոտավորապես 400-500 միլիոն դոլարի շինարարական աշխատանքներ են այժմ կասցված, իսկ Երևանի քաղաքապետարանի  կողմից տված տեղեկանքի համաձայն, մոտ 125 հազար քառակուսի մետր տարածքում գտնվող  շինաշխատանքները կասեցված են։

Նախագծով առաջարկվում է Վարչական դատավարության օրենսգրքի 83-րդ հոդվածում կասեցման ազդեցությունից բացառություն նախատեսել այլ անձանց կողմից վարչական ակտի հասցեատիրոջ համար բարենպաստ վարչական ակտերի կամ զուգորդող վարչական ակտի բարենպաստ մասի վիճարկման դեպքերի համար։ Արդյունքում երրորդ անձանց կողմից այլ անձին ուղղված վարչական ակտի վիճարկումն ինքնաբերաբար չի հանգեցնի վարչական ակտի կատարման կասեցման։ Դրա փոխարեն վարչական դատարանը հայցվորի միջնորդությամբ գործի քննության ընթացքում կարող է ամբողջությամբ կամ մասամբ կասեցնել նշված վարչական ակտի կատարումը՝ Վարչական դատավարության օրենսգրքի 83-րդ հոդվածով նախատեսված ընդհանուր կարգով։

«Մեր ռազմավարական ուղղություններից է օրենսդրությամբ մաքրել բոլոր այն հնարավոր միջանցքները, որոնք հնարավորություն են տալիս որոշակի իրավունքի չարաշահման դեպքերով ծանրաբեռնել դատական համակարգը», - ասա Ռ. Գրիգորյանը։

Վարչապետ Նիկոլ Փաշինյանն ասաց, որ այս նախագիծը երկար ու տխուր պատմություն ունի։

«Հայաստանում պրակտիկա կա, երբ մարդկանց սահմանափակելու հայտնի մեխանիզմները դադարել են գործել ու հարյուրավոր դեպքեր ունենք, երբ ընթացող շինարարությունների վերաբերյալ մոտակայքում որևէ գործունեության տեսակ ունեցող սուբյեկտ ուղղակի վարչական դատարան է դիմում ու այդ փաստի բերումով շինարարությունն ամբողջությամբ կասեցվում է: Այս պահի դրությամբ մոտավորապես 450 միլիոն դոլարի կանգնած շինարարություն ունենք», - նշեց Ն. Փաշինյանը։

Նրա խոսքով, հիմա էլ դատարանը հնարավորություն ունի շինարարությունը կասեցնելու, բայց ոչ թե ինքնաբերաբար, այլ ամեն առանձին դեպքով միջնորդություն ներկայացնեն, քննարկում են ու եթե դա հիմնավոր է լինում, տեղի է ունենում կասեցման որոշում։

Վարչապետն ասաց, որ օր առաջ է պետք է ընդունել այս նախագիծը, հատկապես ճգնաժամային տարում կապիտալ շինարարության խթանման շատ մեծ ազդակ կլինի, պետք է խորհրդարանի գործընկերներին խնդրել հնարավորինս շուտ ընդունեն այս նախագիծը։ Նա համոզված է, որ այս նախագծի ընդունմամբ հազարավոր աշխատատեղեր կստեղծվեն Հայաստանում։

Նիկոլ Փաշինյանը հետաքրքրվեց. «Եթե մարդը 10 միլիոն դոլար վարկ է  վերցրել ու սկսել շինարարություն, կողքի մի տաղավարի սեփականատեր դատարան է դիմում, դատավարւթյունը տևում է հինգ տարի։ Այդ ընթացքում վարկառուն, որը հույս ուներ, որ պետք է կառուցի հինգ տարում, վարկը վճարի, վերջում դատարանը որոշում է, որ ամեն ինչ նորմալ է, հայցն անհիմն է, վարկ վերցրած  քաղաքացու վնասները ո՞վ է փոխհատուցում, որևէ մեկը փոխհատուցո՞ւմ է»:

«Ոչ, հարգելի դատարան», - պատասխանեց փոխնախարարը:

«Մասնագիտական է», - արձագանքեց վարչապետը։

Նախագիծը ընդունվեց։