Ձեր վստահելի աղբյուրը

Պարետատան նիստից  հետո  վարչապետ Նիկոլ Փաշինյանն առցանց ճեպազրույցի շրջանակում ներկայացրեց հանրապետությունում կորոնավիրուսով պայմանավորված ընթացիկ իրավիճակը:
Վարչապետի խոսքով՝  համաճարակի շուրջ իրավիճակը շարունակվում է լարվել՝ երեկ 442 նոր դեպք ենք ունեցել, մահացել է ևս 15 քաղաքացի:

«Վերլուծությունը ցույց է տալիս, որ վարակի ամենամեծ օջախը Երևանն է: Վարակի պոտենցյալ աղբյուրներն ամենուր են ՝ աշխատանքի վայրերում,փողոցում, հանրային սննդի օբյեկտներում, բանկերում և այլուր: Շարունակում ենք մնալ այն համոզմանը, որ այս իրավիճակից ելքը  հակահամաճարակային կանոնների պահպանումն է ՝ դիմակի համատարած և ամենուրեք կրումը, ձեռքերի ախտահանումը և սոցիալկան հեռավորության պահպանումը»,-ասաց Փաշինյանը: 

Վարչապետը նաև կոչ արեց տեղի չտալ  դիմակի շուրջ  տեղի ունեցող բոլոր շահարկումներին  և ընդհանրապես ապատեղեկատվությանը ՝ կորոնավիրուսի հետ կապված, քանի որ իրավիճակը շատ լուրջ է:

«Մենք ոչ ոքի չենք ասել դիմակ գնել, կարող  եք պատրաստել նաև տնային պայմաններում: Մասնագետների վերլուծությունը ցույց է տալիս , որ  նույնիսկ տնային պայմաններում պատրաստված դիմակի որակյալ կրումը կարող  է զրոյացնել վարակի տարածումը»,-ավելացրեց Փաշինյանը:

Դիմակների էֆեկտիվության հետ կապված  վարչապետը նաև նկատեց, որ  ամբողջ աշխարհը չունի կորոնավիրուսի հետ կապված ամբողջական գիտելիք: Եվ այն գիտելիքը  պարբերաբար համալրվում է: «Փորձով ապացուցվել է դիմակների էֆեկտիվությունը՝ համատարած կիրառման դեպքում»,-ընդգծեց Նիկոլ Փաշինյանն ու հավելեց.«Բազմաթիվ վարակակիրներ չգիտեն, որ իրենք վարակակիր են: Մեզնից յուրաքանչյուրը  չգիտի, վարակակիր է ,թե ոչ, քանի որ հիվանդության 70 և ավելի  տոկոսը տեղի է ունենում ասիմտոմ, բայց այս ընթացքում նա կարող է վարակել շատ մարդկանց :Աստված չանի, որ բախվենք  այն իրավիճակին, երբ վերակենդանացման բաժնում տեղ չլինի:  Հիշեք, որ այդ պակասող տեղը կարող է անհրաժեշտ լինել ձեր հարազատին»:

Թեև կառավարության ղեկավարի  հույսը հանրային վարքագծի փոփոխության վրա է, այդուհանդերձ այս ընթացքում  կիրառվում են նաև  վարչական լծակներ :   

«Փակվում են ձեռնարկություններ, արգելվում են նրանց գործունեությունը: Չի  բացառվում, որ առաջիկայում արգելքի ժամկետները երկարացվեն, այսինքն՝ հիմա 24 ժամով է, կրկնակի խախտման դեպքում կլինի  գուցե  մեկ շաբաթով»,-տեղեկացրեց վարչապետը:

ՀՀ վարչապետ Նիկոլ Փաշինյանը նաև չբացառեց,որ իրավիճակից կախված անհրաժեշտ կլինի վերադառնալ կարանտինային խիստ ռեժիմին: 

«Մեր խնդիրն է՝ կարողանալ կարանտինին չվերադառնալով, կառավարելի պահել իրավիճակը: Չափանիշը վերակենդանացման բաժանմունքի տեղերի առկայությունն է: Այստեղ իրավիճակն ամեն օրվա հետ ավելի ծանրանում է: Ընդհանուր վիճակագրության հետ ավելանում է նաև ծայրահեղ ծանր հիվանդների թվաքանակը: Ոչ ոք չի կարող բացառել, որ մենք ստիպված կլինենք նորից վերադառնալ կարանտինի, սա կախված է այն իրավիճակից, որ մենք կունենանք»,- ասաց Փաշինյանը:

Փաշինյանի ծոսքով՝ մինչ կարանտինային ռեժիմի վերադառնալը, կարող են կիրառվել խստացման այլ մեթոդներ, որոնցից մեկը ամենուրեք դիմակի կրումը պարտադիր դարձնելն է: