Ձեր վստահելի աղբյուրը

Փաստաբան Ինեսա Պետրոսյանը  վարակված է կորանավիրուսով։ «Ազատություն» ռադիոկայանի հետ զրույցում նա պատմել է, որ տարբեր հետազոտություններ է անցել, արյան անալիզ է հանձնել, 12 օր բուժում է ստացել, սակայն  դրական դինամիկա չէր գրանցում, թույլ է իրեն զգացել։ Այնուհետև որոշել են ստուգել՝ կորոնավիրուսի վարակ կա թե չէ։ Մայիսի 20-ին թեստավորվել է, մայիսի 22-ին պատասխանը եկել է՝ դրական։

Նա դժվարանում է նշել, թե որտեղ է վարակվել, քանի որ պահել է կանոնները, դիմակ է կրել, ձեռքերն անընդհատ ախտահանել է. «Կասկածներ ունեմ միգուցե  բժշկական հիմնարկներից լինի, որտեղ բազմաթիվ այցելություններ է ունեցել հետազոտությունների հետ կապված։ Բժշկական կենտրոններ այցելել եմ մայիսի 8-ից հետո»։

«Ուրբաթ օրը, երբ  այդ կենտրոնից զանգեցին ու ինձ տեղեցարեցին, որ թեստի արդյունքը դրական է, դա եղավ վերջին զանգը, որ կատարեցին բուժհաստատությունները»,- ասում է Ի. Պետրոսյանը։

Հարցին՝ այն պահից, որ հաստատվել է վարակակիր եք, պետությունը չի՞ հետաքրքվել ձեր առողջությամբ, ինչպե՞ս եք մեկուսացել, նա ասում է. «Բոլորովին, որևէ զանգ,  թեինչ վիճակում եմ գտնվում։ Որևէ մեկը վիճակի գնահատում չի անում, որևէ մեկը չգիտի, թե ես ինչ վիճակում եմ։ Հարցն իմ մասին չէ, իմ հարցերն ինչ-որ կերպ կարողանում եմ լուծել, բայց շատ քաղաքացիներ կան, վստահ եմ, իրենց տներում ուղղակի  միայն մի բան են անում՝ չափում են ջերմություն։  Նախարարը հրաման էր արձակել՝ թեթև ընթացքով և ասիմպտոմ  վարակված քաղաքացիները մնում են տներում, բայց  ով է դա որոշում։ Ես մնացել եմ տանը, բայց իմ ամբողջ ընտանիքն էլ է տանը, կարող է առողջների համար վտանգ ներկայացնեմ»։

Նա նշում է, երբ որ պարզ է դարձել, որ պոլիկլինիկաները պետք է զբաղվեն այդ ամենով, իր նախաձեռնությամբ զանգել է թեժ գիծ, ուղղորդել են պոլիկլինիկաներ։

«Ինչ կարող են անել պոլիկլինիկայի աշխատակիցները, որոնց նույնիսկ դիմակ  չեն տալիս։ Ես որևէ կերպ չեմ կարող մեղադրել իմ պոլիկլինիկայի բժշկուհուն, ով ոչինչ չունի։  Հարցնում եմ՝ արտահագուստ ստացե՞լ եք։ Մարդիկ չեն ստացել արտահագուստ, ինչպե՞ս կարող են այցելել ու լսել իմ կամ մյուսների թոքերը, եթե պաշտպանված չեն։ Մինչև այդ հրամանի արձակումը, նախարարը պետք է բարի լիներ ու այդ ամեն ինչը կարգավորեր, որպեսզի հիվանդներն անելանելի վիճակում չհայտնվեին։ Մեզանից  վատ վիճակում հայտվել են պոլիկլինիկայի բժիշկներն ու բուժաշխատողները։ Բուժաշխատողներին չեն պատրաստել, որ իմանան, թե ինչպես իրենց դրսևորեն։ Լաբորատոր  հետազոտություն անելը չեն կարողանում կազմակերպել»,- ասում է նա։

Ի. Պետրոսյանն ասում է, որ ծնողներին, ամուսնուն թեստավորել են, բացասական է եղել, աղջիկը վատ է զգացել իրեն, արդեն պոլիկլինիկայի ցուցումով թեստավորվել է, սպասում են պատասխանին։
 
Բուժման ու դրանից հետո առաջացած խնդիրների մասին «Հետք»-ի հետ զրույցում պատմել է նաև կորոնավիրուսով հիվանդացած, 10 օր հոսպիտալացված և բուժումը կիսատ տուն տեղափոխված Արամ Բաբաջանյանը։ Ներկայացնելով իր հետ կատարվածը՝ նա վերջում հարցով դիմել է առողջապահության նախարար Արսեն Թորոսյանին. «Կուզեմ առողջապահության նախարարին հարց տալ։ Ինքը ռեալ պատկերացնու՞մ է՝ ինչ է կատարվում իր ենթակա հիմնարկներում։ Երբ որոշում են հիվանդներին ուղարկել ըստ բնակության վայրի, դա համաձայնեցրե՞լ են Երևանի քաղաքապետարանի հետ, որոնց ենթակայությամբ են գործում պոլիկլինիկաները, որ իրենք պետք է զբաղվեն այդ հիվանդներով։ Ես տեսնում եմ, որ աջ ձեռքը չի իմանում, թե ձախ ձեռքն ինչ է անում»։

Panorama.am-ն այսօր կրկին դիմեց առողջապահության նախարարության մամուլի խոսնակ Ալինա Նիկողոսյանին՝  ներկայացնելով ինչպե՞ս Ի. Պետրոսյանի կողմիչ հնչեցրած հարցերը, այնպես էլ այլ քաղաքացիների դժգոհություններն անելանելի վիճակում հայտնվելու ու լուծումների սպասելու վերաբերյալ։ Մասնավորապես՝ ինչպե՞ս կապ հաստատել բուժաշխատողների հետ, ինչպե՞ս  ինքամեկուսանալ տանը, եթե այդ տանը ապրում են մի քանի հոգով։

Ա. Նիկողոսյանն  ասաց, որ քաղաքացին ինքը պետք է տեղամասային պոլիկլինիկայի բժշկի հետ լինի կապի մեջ։

«Մենք ասել ենք, որ պոլիկլինիկայի բժիշկների հետ լինել կապի մեջ։ Եթե պոլիկլինիկայից ինչ-որ խնդրի պատճառով կապ չեն հաստատել իր հետ,  ինքը պետք է կապ հաստատեր»,- նշեց նա։

Նրա խոսքով, մոդելը նոր է, չեն կարող այդքան մեծ աշխատանքը մեկ օրում կազմակերպել. «Հազարավոր մարդկանց մասին է խոսքը։ Մի քիչ էլ մարդիկ պետք է կարողանան մեզ օգնել»։

Ա. Նիկողոսյանն ասաց, որ պոլիկլինիկաները գտնվում են քաղաքապետարանների ենթակայության տակ, եթե բողոքներ կան, կարող են զանգել այնտեղի թեժ գծերին, նաև նախարարության, կփորձեն կարգավորել բոլոր հարցերը։

ԱՆ մամուլի խոսնակի խոսքով, բուժաշխատողների հետ, նախքան թեթև կամ առանց սիմպտոմների կորոնավիրուսով վարակված  պացիենտներին տուն ուղարկելու համակարգին անցնելը, հինգ օր թրեյնինգ են անցկացրել, տեղյակ են՝ ինչպես պետք է իրենց գործողություններն անել, հաղորդագրություններ են տարածել, նախարարի հրամանը կա, որով կարգավորվում է այդ գործընթացը, իրենց անհատական պաշտպանիչ միջոցներով ապահովել են։ Ա. Նիկողոսյանն ասաց, որ իրենց կողմից քայլերն արվել են ու շարունակաբար անում են։ 

Ինչ վերաբերում է հաճախ բարձրաձայնվող հարցին՝ ինչպե՞ս կարող է դրական թեստով քաղաքացին շարունակել մնալ տանը՝ տան մյուս անդամների հետ, որոնց մոտ վիրուսը հաստատված չէ, նա պատասխանեց, որ պետք է ինքնամեկուսանալ սենյակում, ինքնամեկուսացման մասով տեսանյութ են տարածել, նաև առաջիկայում տնային բուժման մասին էլ հաղորդագրություն կլինի, թե ինչպես պահել կարգը։

Ա. Նիկողոսյանի խոսքով, հնարավորինս արված է ամեն ինչ տնային բուժումն ապահովելու համար։

Ա. Նիկողոսյանն արձագանքել էր նաև «Հետքի» հրապարակմանը՝ նշելով. «Տնային բուժումները հսկվում են պոլիկլինիկաների կողմից, ուստի անհրաժեշտ է, որ դրական դեպքերը կապի մեջ լինեն իրենց տեղամասային բժշկի հետ: Օրը երկու անգամ` հեռախոսազանգով, անհրաժեշտության դեպքում բժիշկները նաև պիտի այցելեն իրենց:

Հիվանդանոցներում բուժում են ստանում ծանր և ծայրահեղ ծանր պացիենտները, իսկ ովքեր դուրս են գրվել, նշանակում է, որ հիվանդանոցային բուժման անհրաժեշտություն չի եղել:

Տնային բուժումների մասին մենք հայտարարել ենք դեռ անցած շաբաթ:

Ինչ վերաբերում է մնացած մանրամասներին` առավոտյան կխոսեմ հիվանդանոցի անձնակազմի հետ և անհրաժեշտության դեպքում կհրապարակենք ողջ իրողությունը»: