Ձեր վստահելի աղբյուրը

«ՄԻԵԴ արձանագրության նպատակը հստակ է՝ օժանդակել ներպետական դատարաններին մեկնաբանել ու կիրառել կոնվենցիայով սահմանված իրավունքներն ու ազատությունները»,- ՄԻԵԴ այսօր հրապարակած խորհրդատվական կարծիքի մասին խոսելիս բացօթյա ասուլիսում հայտարարեց ՀՀ երկրորդ նախագահ Ռոբերտ Քոչարյանի փաստաբանական թիմի անդամ Սարգիս Գրիգորյանը։

Նրա խոսքով, Եվրոպական դատարանն այդ որոշման մեջ տվել է այն նպատակներն ու սահմանները, ինչով Սահմանադրական դատարանը պետք է առաջնորդվի։

«Դա վերաբերում է թե 7-րդ հոդվածի հետադարձությանը, թե որոշակիությանը, որն առնչվում է 300.1 հոդվածին»,- ասաց փաստաբան Գրիգորյանը։

Նա չի բացառում՝ հետագայում կլինեն տարատեսակ մեկնաբանություններ, քանի որ կարծիքը գրված է բավականին մանրամասն ու իրավական բարդ տերմիններով, պետք է ուշադրություն դարձնել այն մեկնաբանություններին, որոնք կիրառվում են ՄԻԵԴ-ի կողմից։

Ասուլիսի մասնակից Արամ Վարդևանյանն էլ ընդգծեց, որոշակիության սկզբունքից ելնելով՝ ակնհայտ է, որ Ռոբերտ Քոչարյանի նկատմամբ քրեական հետապնդումը պետք է դադարեցվի։

«Այդտեղ երկրորդ կարծիք չկա։ Այս հարցի պատասխանը տրվելու է ՍԴ կողմից՝ հաշվի առնելով Եվրոպական դատարանի ելակետերը»,- ասաց փաստաբանը։