Ձեր վստահելի աղբյուրը

«Սցենարը շատ դառն է ընթանում, պետք է հետևել կանոներին»,- պարետատան նիստից հետո բրիֆինգում ասաց «Սուրբ Աստվածամայր» ԲԿ-ի ինֆեկցիոն մասնաճյուղի կլինիկական ղեկավար Հայկ Անտոնյանը։

Նա նշեց, որ վերակենդանացման բաժանմունքներն ու հիվանդանոցները միջազգային բոլոր նորմատիվներին համապատասխան հագեցած են և դեղանյութերով, և սարքավորումներով։

«Խնդրում եմ՝ վստահել մեզ, և մենք ջանք չենք խնայի, որ պայքարենք ձեր հարազատների առողջության համար»,- նշեց Հ. Անտոնյանը։

Բրիֆինգին ներկա վարչապետ Նիկոլ Փաշինյանն ասաց, որ պարետատան նիստի ժամանակ արձանագրվել է, որ  շատ ծանր է անցնում կորոնավիրուսը շաքարային դիաբետ ու բարձր զարկերակային ճնշում ունեցող քաղաքացիների շրջանում, իսկ սրանք չափազանց տարածված հիվանդություններ են Հայաստանում։

Վարչապետը նշեց, որ Հանրապետության կորոնովիրուսային վերակենդանացման բաժանմունքներն աշխատում են խիստ ծանրաբեռնված ռեժիմով, ծանր և ծայրահեղ ծանր հիվանդների թիվը բավականին շատ է, վերջին օրերի դինամիկայի հետ մեծացել է. երեկվա դրությամբ ծանր վիճակում գտնվում է 358 պացիենտ, ծայրահեղ ծանր՝ 58, թոքային օդափոխման սարքին միացված է 15 պացիենտ։

Անդրադառնալով թեստավորումներին՝ վարչապետն ասաց, որ ամեն օր արվում է այնքան թեստ, ինչքան առաջանում է ըստ ցուցումների։

Ինչ վերաբերում է հայկական արտադրության թեստերին, նա նշեց, որ Մոլեկուլային կենսաբանության ինստիտուտն ավարտել է լաբորատոր փորձարկումները, դիմել է առողջապահության նախարարությանն անկախ փորձակումները կազմակերպելու համար, մի քանի օրվա ընթացքում այս պրոցեսն ավարտին կհասցնի ու հնարավոր կլինի սկսել թեստերի արտադրությունը։ Նախատեսված է 100 հազար թեստերի արտադրություն, օրական 1000-2000 թեստի արտադրություն։

Երևանի թիվ 13 պոլիկլինիկայի տնօրեն Ռուզաննա Դուրգարյանն ասաց, որ դրական թեթև դեպքերը հսկվում են տեղամասային թերապևտի կողմից, անընդհատ կապ է հաստատվում հեռախոսազանգի միջոցով, անհրաժեշտության դեպքում այց է կազմակերպվում տուն, եթե վատթարացում է նկատվում, քննարկվում է հիվանդի ստացիոնար տեղափոխելու հարցը։

«Մեր բնակչության շրջանում նկատվում է ոչ միայն դեպքերի, նաև ծանր դեպքերի շատացում։ Հիմա արդեն ընտանիքներով են դիմում պոլիկլինիկա սիմպտոմներով ու հաստատվում է վարակը»,- ասաց Ռուզաննա Դուրգարյանը։

Նա նշեց, որ իրենց պոլիկլինիկայում հսկվում է մոտ 50 մարդ, ստացիոնար բուժման պայմաններում գտնվում է մոտ 50-ը, ունեն նաև ծանր վիճակում գտնվող պացիենտներ։

Պատասխանելով հարցին՝ Վրաստանի հիվանդությունների վերահսկման ազգային կենտրոնի ղեկավար Ամիրան Գամղրելիձեն հայտարարել էր, որ եթե Հայաստանի հիվանդությունների վերահսկման կենտրոնը հարց բարձրացնի իրենց աջակցության համար, ապա իրենց կենտրոնն ունեցած կոմպետենցիաների շրջանակներում պատրաստ է օգնել, հնարավոր համարո՞ւմ եք ՀՀ կառավարությունը դիմի Վրաստանին, որ դեպքում դրա անհրաժեշտությունը կառաջանա, կոնկրետ ի՞նչ տեսակի աջակցության համար կդմի ՀՀ կառավարությունը Վրաստանին, Ն. Փաշինյանը պատասխանեց.

«Կորոնավիրուսի դեպքերի հաստատման առաջին օրվանից սերտորեն համագործակցել ենք Վրաստանի կառավարության հետ՝ վարչապետից մինչև մասնագետներ, այդ համագործակցությունը շատ արդյունավետ ենք համարում։ Վրաստանը մեզ համար եղբայրական երկիր է, շատ ջերմացնում է մեզ նման պատրաստկամությունը։ Բնականաբար, եթե նման անհրաժեշտություն ծագի, կարող են լինել քայլեր։ Հույս ունենք, որ նման անհրաժեշտություն չի ծագի։

Մենք պետք է պատրաստակամություն ունենանք փոխադարձաբար, առավելապես Հայաստանն ու Վրաստանն իրար օգնելու։ Պետք է մշատապես իրար կողքի լինենք, աջակցենք։ Համաճարակները մեր ընդհանուր օրակարգի հարց են, ընդհանուր սպառանալիք են։ Մեր հարևաններ Վրաստանի, Իրանի, միջազգային գործընկերների հետ պատրաստ ենք սերտորեն համագործակցել»։