Ձեր վստահելի աղբյուրը

«2016 թվականի ապրիլյան պատերազմի շուրջ կան բազմաթիվ հորինված և իրական պատմություններ։ Բայց կա մեկ հասարակական կոնսենսուս, որը միավորում է բոլորին՝ ներկա, նախկին իշխանություններին, էքսպերտներին, հասարակությանը»,- ասում է Սուրբ Աթոռում Հայաստանի նախկին դեսպան Միքայել Մինասյանն հերթական տեսանյութում, որը վերնագրել է «Զենքի անօրինական վաճառք, «նախնադարյան» զենքի ձեռքբերման գործարք, կոռուպցիա և անտեսվող մահեր»։

Ըստ նրա, այն է՝  Հայաստանի Զինված ուժերը և Արցախի Զինված ուժերը չնայած պատրաստ էին մարտական տեսանկյունից թշնամու գործողություններին, ինֆորմացիոն տեսանկյունից անպատրաստ էին։

«Նշանակում է, որ հայկական Զինված ուժերը չգիտեին կոնկրետ երբ, կոնկրետ ոնց, ինչպիսի ուժերով թշնամին լինելու է նախահարձակ։ Այդ բացթողման պատճառով նախորդ իշխանություններն աշխատանքից ազատեցին մի անձնավորության, որը ի պաշտոնե պատասխանատու էր այդ բացթողման համար։ Խոսում եմ Հայաստանի Զինված ուժերի գլխավոր շտաբի գլխավոր ռազմական հետախուզության վարչության արդեն նախկին պետ գեներալ Արշակ Կարապետյանի մասին։

Ժամանակները փոխվեցին, Նիկոլ Փաշինյանը, որն այդ պատերազմը համարում էր մեծ պարտություն, Նիկոլ Փաշինյանը և իր ստի կայսրությունը, որը հորինել էին բազմաթիվ լեգենդեր, որ ունեցանք մեծ պարտություն, որովհետև տանկերում ջուր էր, ավտոմատները հին էին և չէին կրակում, զինվորներն անտռուսիկ էին, Նիկոլ Փաշինյանն արդեն նոր իրականության մեջ վերգտավ գեներալ Կարապետյանին և քանի որ ինքը սիրում է մարդկանց օգտագործել, ասաց, որ եթե ուզում ես դառնալ նոր Հայաստանի կարևոր անձնավորություն, դու պետք է քո ծառայությունները մատուցես»,- ասում է Մ. Մինասյանը։

Նախկին դեսպանը նշում է, որ գեներալ  Կարապետյանը սկսել է ծառայությունները մատուցել, սկզբնական շրջանում մատուցում էր «մարտի 1»-ի գործով, իսկ  հիմա  նա զբաղեցնում է  վարչապետի խորհրդականի պաշտոնը. «Բայց հիմա հարցնում եք՝ այս ամենը ինչ կապ ունի մեր նախորդ խոսակցությունների հետ։  Գեներալ Արշակ Կարապետյանն ամսի 23-ին գաղտնի գործուղվել է արդեն մեր կողմից սիրված, հարգված, արդեն հայկական միջազգային հետաքրքրությունների կենտրոն դարձրած Վորոնեժ»։

Նա հիշեցնում է, որ Հայաստանում, Ռուսաստանում գործում է  արտակարգ դրության ռեժիմ և գեներալ Կարապետյանը չէր կարող մեկնել Հայաստանից և հատել ՌԴ սահմանը որպես մասնավոր այց։

«Ուրեմն նա գնացել է որպես պետական պաշտոնյա, իսկ կառավարության կայքում դրա մասին ոչինչ չկա, հետևաբար նա գնացել է վարչապետի կամ գաղտնի հրամանով, կամ բանավոր հրամանով։ Իսկ ինչի համար է նա այդպես արել։ Շատ պարզ է, որովհետև Նիկոլ Փաշինյանը, որն արդեն վաղուց օգտագործում է գեներալ Կարապետյանին հատուկ և մութ գործերի համար, այս անգամ էլ ուղարկել է նրան Վորոնեժ, որպեսզի բանակցի Ռուսաստանի հատուկ ծառայությունների հետ, որպեսզի նրանք օգնեն Նիկոլ Փաշինյանին և Հայաստանի վարչապետի ընտանիքին վերաբերվող ամենամեծ սկանդալը կապված մաքսանենգ ծխախոտի հետ, անեն ծածկադմփոց, չհարուցվի քրեական գործ։

Բայց այդտեղ գեներալ Կարապետյանի միսիան չի ավարտվել, որովհետև Նիկոլ Փաշինյանին սպասվում է էլ ավելի մեծ սկանդալ, որի մասին ինքն արդեն տեղյակ է, ինչի հետ կապված  արել է Ազգային ժողովի վերջին հիստերիան։ Նա գիտի, որ արդեն կան փաստերն, որոնք խոսում են, որ Նիկոլ Փաշինյանն ուղիղ, ոմն Դավիթ Գալստյանի հետ միասին, ներգրավված են զենքի միջազգային առևտրի մեջ։ Դրա համար գեներալ Կարապետյանը Վորոնեժից մեկնում է Մոսկվա, որպեսզի այնտեղ բանակցի ՌԴ պաշտպանության նախարարության պաշտոնյաների հետ, որպեսզի նույնպես փորձեն ծածկադմփոց անել այն սկանդալը, որն ուղիղ կապ ունի Հայաստանի անվտանգության հետ»,- ասում է Մ. Մինասյանը։

Մ. Մինասյանը նախ ներողություն է խնդրում, որովհետև առաջին անգամ լինելու է ոչ բաց մինչև վերջ, որովհետև, ըստ նրա, այս պատմության մեջ կան բաներ, որոնք կարող են վնասել մեր երկրի անվտանգությանը, պաշտպանական համակարգին, դրա համար լինելու է շատ զգույշ.  «Բայց պարտավոր եմ բացել այս խայտառակ պատմությունը, որովհետև Նիկոլ Փաշինյանն իր գրպանների պատճառով արդեն, բացի որ խաղում է մեր իմիջի հետ, նաև խաղում է մեր անվտանգության հետ։

Իսկ պատմությունը շատ պարզ է։ Նիկոլ Փաշինյանը ծխախոտից և ադամանդից հետո Հայաստանը ներքաշել է միջազգային զենքի առևտրի սև շուկա»։

Մ. Մինասյանի խոսքում ասում է, որ Հայաստանն իրավունք ունի գնել զենք և զինամթերք Ռուսաստանից ռուսական ներքին գներով, այսինքն՝ ՀՀ և ռուսական բանակը կարողանում են առնել Ռուսաստանի արտադրողներից զինք-զինամթերքը նույն գներով,  և այդ գները տարբերվում են միջազգային գներից մինչև 65 տոկոսով։

«Հետևաբար Նիկոլ Փաշինյանը հենց իմանում է, որ նախորդ իշխանությունները կարողացել էին բանակցել իր կողմից այդքան սկզբում չսիրված, հետո այդպես մոլագար ձևով  սիրված Ռուսաստանի հետ, այդ նրբությունը, միանգամից իր նոր ընկերոջ, ոմն Դավիթ Գալստյանի, նույն ինքը՝ պատրոն Դավիթ, միջոցով, մտածում են և իրականացնում են մի սխեմա, որի հիմքում հետևյալն է. Հայաստանի վարչապետ Նիկոլ Փաշինյանը լիազորում է Դավիթ Գալստյանին պաշտպանության նախարարության  միջոցով և տալիս է արտոնություն, որպեսզի նա Հայաստանի անունից պատվիրի, կոչենք դա 100 միավոր զենք, այնուհետև Հայաստանը գնում է Դավիթ Գալստյանի օֆշորից այդ 100 տեսակից ընդունենք 60-ը։ Այդ 60-ի համար վճարում է, 60 հատ զենքը գալիս է Հայաստան։ Թղթերով ամեն ինչ նորմալ է, կա մի բացառություն, որ այն 40-ը, որը սկզբնականում պատվիրել են, բայց չեն վճարել, Դավիթ Գալստյանը, որն արդեն ուներ պայմանավորվածություն երրորդ երկրների հետ, ուղիղ Ռուսաստանից ուղարկում է երրորդ երկիր։

Օրինակի համար՝ Արաբական Էմիրություններ։ Հասկանում եք ինչի՞ մասին է խոսքը, հասկանում եք՝ սա ի՞նչ է։ Սա խայտառակություն չէ, խայտառակությունը սիգարետն ու ադամանդն  է։ Սա արդեն ստորություն է։ Որովհետև այդ երրորդ երկրից զենքը հայտնվում է չորրորդ երկրում։ Չորրորդ երկրում կրակելուց հետո, իսկ բոլոր մասնագետները գիտեն, որ համարներով հնարավոր է զենքի ամբողջ նախորդ պատմությունն իմանալ։ Ես հնարավորինս փորձում եմ լինել դիվանագետ, մնալ առանց անունների։

Չորրորդ երկրում զենքն օգտագործելուց հետո Ռուսաստանում իմանում են, որ հայկական, Հայաստանին վաճառված զենքը հայտնվում է չորրորդ երկրում։ Որպեսզի չփչացնեն հարաբերությունները Հայաստանի հետ, որովհետև Հայաստանն իրենց համար Նիկոլ Փաշինյան չէ, Հայաստանը՝ Հայաստանի Հանրապետությունն է ու հայ ժողովուրդը, որոշում են պատժել այս մաֆիոզներին իրենց ձևով, հայտարարում են պերսոնա նոն գրատա Դավիթ Գալստյանին և տաս տարով արգելում ենք մուտքը Ռուսաստանի Դաշնություն՝ զրկելով Հայաստանի մոնոպոլիստին հնարավորությունից զենք և զինամթերք առնել Ռուսաստանի Դաշնությունից»,- ներկայացնում է Մ. Մինասյանը։ 

Նա տեսանյութում ցույց է տալիս մի փաստաթուղթ, որն ապացուցում է այս պատմությունը՝ Դավիթ Գալստյանի մուտքը ՌԴ արգելված է մինչև 2029 թվական։

«Երբ Նիկոլ Փաշինյանն իմացավ, որ Դավիթ Գալստյանի միջոցով այսուհետ չի կարող փող աշխատել և զենք ծախել երրորդ երկրներին Հայաստանի հաշվին, նոր ձև գտավ, թե ոնց շարունակել օգտվել Հայաստանի պաշտպանության նախարարության բյուջեից»,- ասում է Մ. Մինասյանը։

Շարունակությունը ու մանրամասն՝ տեսանյութում.