Ձեր վստահելի աղբյուրը

Հայաստանի Դեմոկրատական կուսակցության նախագահ Արամ Սարգսյանը մի քանի առաջարկներ է ներկայացրել, որոնք ըստ նրա, պետք է կատարվեն  ստեղծված տագնապալի իրավիճակում կոլապսից խուսափելու համար։

Տարածած դիմում-հայտարարության մեջ ասված է.

«Մինչ անտեսանելի վարակը կհասներ Հայաստան, թվում էր՝ երկրի դռներն ամուր փակելու և դրա տարածումն արագ կասեցնելու բոլոր հնարավորությունները կան: Սակայն երկրի օդային դարպասները բաց մնացին այնքան ժամանակ, մինչև որ Երևանում և Էջմիածնում վարակի օջախներ բռնկվեցին: Համակարգի ուշացած միջոցառումները չկանխեցին դրա շղթայական տարածումը երկրով մեկ:

Անվերահսկելի տարածման օջախներ դարձան արտադրական ձեռնարկությունները, որտեղ վարակված անձը վարակում է ընտանիքի անդամներին, հարևանին, բարեկամին, խանութի աշխատողին և, հետո, բուժանձնակազմին: Պատճառը՝ ախտորոշման ժամկետների լավագույն դեպքում 4-7 օրվա ուշացում, թեստավորման ենթակա ընտանիքի անդամների հերթագրում, արտադրամասում մեկ հիվանդի առկայության դեպքում ամբողջ կոլեկտիվի մեկուսացման և տոտալ թեստավորման բացակայություն և այլն:

Արդյունքում, առողջապահական համակարգը, որն առանց այն էլ չէր փայլում բուժօգնության աշխատանքների կազմակերպմամբ, կանգնած է կոլապսի ենթարկվելու վտանգի առաջ:
Բժիշկների, բուժքույրերի, սանիտարների, շտապ օգնության անձնակազմի հերոսական, անձնազոհ աշխատանքը ստվերվում է համակարգի կառավարչական անարդյունավետ, ուշացած գործողություններով:

Ստեղծված տագնապալի իրավիճակում անհրաժեշտ ենք համարում.

• Կառավարության անունից պաշտոնապես դիմել մի շարք պետությունների՝ Չինաստանին, Ռուսաստանին, Վրաստանին, նաև՝ Արցախի Հանրապետությանը՝ դեպի Հայաստան օգնության կարգով համակարգի կառավարչական աշխատանքների կազմակերպման փորձառու մասնագիտական խմբեր գործուղելու խնդրանքով:

• Պարետատան կողմից ամբողջական վերահսկողություն սահմանել արտադրական կոլեկտիվների նկատմամբ, կորոնավիրուսի ախտորոշման մեկ դեպքի պարագայում կանգնեցնել արտադրությունը, թեստավորել կոլեկտիվի մյուս անդամներին, համապատասխանաբար բուժման կամ ինքնամեկուսացման ուղարկելով վարակակիրներին: Միայն այսկերպ հնարավոր կլինի կանխել վարակի շղթայական տարածումը:

• Սեղմ ժամկետում բոլոր բուժհիմնարկներին ապահովել արդյունավետ թեսթերի խմբաքանակով՝ բացառելով անհարկի հերթերի գոյացումը:

• Ամփոփել և կիրառել այն երկրների փորձը, որոնք առանց պատվաստման, համապատասխան դեղորայքով, բուսական ծագման պրեպարատներով, վիտամիններով արդյունավետորեն կարողացել են բարձրացնել բնակչության իմունային համակարգի դիմադրողականությունը կորոնավիրուսի համավարակի պայմաններում:

• Պարետատան որոշմամբ արգելել բնակչության տեղեկատվական ահաբեկումն ընդհանրապես, օրինակ՝ կորոնավիրուսի «հնգամյա» տևողության սպառնալիքով: Եթե առողջապահության նախարար Արսեն Թորոսյանը չգիտի, որ վախը և խուճապը սթրես են առաջացնում, զրկում են մարդուն լավատեսական տրամադրությունից և, որպես արդյունք, առաջացնում դիմադրողականության անկում, ստիպված ենք հորդորել պարետին զրկել նրան բնակչությանը «խորհուրդներ» տալու իրավունքից:

• Երևանի պետական բժշկական համալսարանի ղեկավարությանը թախանձագին խնդրում ենք վերաբացել համաճարակաբաններ, վարակաբաններ պատրաստող ֆակուլտետը՝ համոզված լինելով, որ նախկինում գործող սանիտարա-համաճարակաբանական համակարգի վերականգնման անհրաժեշտությունը հրամայական է և այսօր, և վաղը:

Համոզված ենք, որ միայն առողջ հասարակական մթնոլորտի, հանրային համերաշխության պայմաններում է հնարավոր հաղթահարել ցանկացած վտանգ, առավել ևս՝ այսպիսի անհայտ վարակ, ինչպիսին  COVID-19-ը:

Չվարակվելու լավագույն պաշտպանիչ միջոցը կարող է լինել պատասխանատու, արհեստավարժ, փորձառու, բարդույթներից զուրկ իշխանությունը, ինչին դեռ կարոտ ենք»։