Ձեր վստահելի աղբյուրը

Հայաստանյան հիվանդանոցներից, հյուրանոցներից տուն ուղարկված կորոնավիրուսով հիվանդներն այդպես էլ չեն հասկանա՝ իրենք ամբողջությամբ բուժվե՞լ են, թե՞ ոչ։ Բանն այն է, որ առողջապահության նախարարությունը որոշել է մեկուսացման ժամկետի ավարտից հետո չթեստավորել նրանց՝ դա համարելով անիմաստ բան։

Առողջապահության նախարարի մամուլի խոսնակ Ալինա Նիկողոսյանը Panorama.am-ի հետ զրույցում ասաց, ինքնամեկուսացման մեջ գտնվող քաղաքացիների տվյալները մուտք են արվում համակարգ, նրանք լինում են պոլիկլինիկաների հսկողության ներքո։

«Երբ համակարգից դուրս են գալիս, իրենք համարվում են առողջացած, քանի որ 14 օր հետո վիրուսը դուրս է գալիս մարդու օրգանիզմից»,- ասաց ԱՆ խոսնակը։

Panorama.am-ին հայտնի են դեպքեր, երբ քաղաքացիների մոտ՝ հյուրանոցում 14-օրյա մեկուսացումից, ևս մեկ ամիս հիվանդանոցում լինելուց հետո թեստերը դրական են եղել։ 60 օր հիվանդության հետ կռիվ տալու մասին հրապարակում եղավ նաև մամուլում։ Այսինք, չի բացառվում, որ ինքնամեկուսացման 14 օրերից հետո վիրուսը չնահանջի ու մնա մարդու օրգանիզմում։

Ի դեպ, այս մարդիկ դուրս են գրվել միայն այն բանից հետո, որ երկու հաջորդաբար արված թեստերի արդյունքը բացասական է եղել։

«Մենք էլ ենք հիվանդությունը ճանաչում, ժամանակ էր պետք հասկանալու։ Վերջին չորս ամիսների փորձը ցույց է տալիս, որ 14 օր անց հիվանդն արդեն վարակակիր չէ, նա չի կարող վարակել դիմացինին»,- ասաց նախարարության ներկայացուցիչը։

Չթեստավորելու վերաբերյալ այս որոշումը նախարարությունը կայացրել է կորոնավիրուսային հիվանդության թեթև դեպքերի տնային բուժման անցնելուն համատեղ։ Ո՞րն է եղել նման որոշման պատճառը։

«Թեստավորումը դառնում է անիմաստ։ Արդեն պարզ է, որ 14 օր անց նրանք առողջ են։ Եկել ենք այն եզրակացության, որ 14 օր անց կորոնովիրուսն ամբողջությամբ դուրս է եկել օրգանիզմից»,- որոշումն այսպես հիմնավորեց նա։

ԱՆ խոսնակը հավատացնում է, որ Հայաստանում թեստերի պակաս չկա, շուտով կսկսվի դրանց տեղական արտադրություն։

Հիիշեցնենք, որ COVID-19 թեթև դեպքերի տանը բուժման կազմակերպման ժամանակ առողջության առաջնային պահպանման օղակի (պոլիկլինիկաներ) բուժաշխատողների կողմից կատարվում է ռիսկի գնահատում, պացիենտին տրամադրում է խորհրդատվություն վարակի փոխանցումը կանխելու և նախազգուշական միջոցառումների վերաբերյալ:

Բժշկի ցուցումով օրական 2 անգամ կատարվում է պացիենտի և խնամողի ջերմաչափում: Բժիշկը հեռախոսազանգերի կամ այցելությունների միջոցով գնահատում է պացիենտի և խնամողի առողջական վիճակը: Եթե մարդն ունի ջերմություն ու այլ ախտանիշներ, այդ դեպքում է բժիշկը ուղեգրում ախտորոշիչ հետազոտությունների (ռենտգեն, թեստավորում):