Ձեր վստահելի աղբյուրը

Քաջարանցիների ձերբակալման, կալանքի, ազատությունից զրկելու հետ կապված տեղի են ունեցել աղաղակող խախտումներ։ Լրագրողների հետ հանդիպմանը հայտարարեց  Քաջարան քաղաքում տեղի ունեցած դեպքերով հարուցված քրեական գործի շրջանակում կալանավորված անձանցից մեկի  փաստաբան Արա Ղազարյանը։

«Աղաղակող խախտումները չեն տեղավորվում նոր կառավարության նոր քաղաքականության շրջանակում, կիրառողները, կարծես, ապրում են այլ իրականությունում»,-ասաց Արա Ղազարյանը։

Ասուլիսի մասնակից փաստաբան Կարեն Ղազարյանն ասաց, որ այս գործով իրենց դիմել էին այս գործով մեղադրյալների հարազատները հավաքից երկու օր առաջ։ Նրանց հասած տեղեկություններով, պատրաստվում էին  քրեական հետապնդում սկսել, նրանց ոստիկանություն տանել։

« Քաջարանում ոստիկանության հատուկ զորքերի ներկայությունը մտահոգություններ էին առաջացրել նրանց մոտ։ Մենք մյուս փաստաբանի՝ Կարեն Տոնոյանի հետ ուրբաթ օրը եղել ենք Քաջարանում, ունեցել ենք կոնսուլտացիաներ, եկել ենք ընդհանուր այն մտքին, որ սպասենք ծանուցման, կգնանք,  կմասնակցենք քննչական գործողություններին, չէինք բացառում նաև բերման ենթարկելու տարբերակը, բայց բացառում էինք այդ կերպ բերման ենթարկելը»,-ասաց փաստաբանը։

Արդեն կիրակի օրը նրանք իմացել են, որ երեք անձանց, որոնցից երկուսն արդեն իրենց պաշտպանյալներն են, բերման են ենթարկել ոստիկանության Կապանի բաժին։

«Ըստ մեր պայմանավորվածության, այդ անձինք պետք է ոստիկանությունում հայտարարեին, որ պահանջում են պաշտպանի հետ հանդիպում, սակայն նրանց մեզ զանգելու հնարավորություն չեն տվել, պաշտպանի հետ հանդիպելու պահանջներին չեն արձագանքել»,-մանրամասնեց նա։

Բաժին հասած փաստաբաններին էլ թույլ չեն տվել ոստիկանություն: Նրանք նաև ականատես են եղել, թե ինչպես ոստիկանության այդ շենքից դուրս են բերել քաջարանցիներից երկուսին ձեռքերը հետևում կապած, գլուխները՝ կռացրած ու տեղափոխել քննչական բաժին։ Այստեղ էլ միայն Երևանից ժամանած քննիչների հետ խոսելուց հետո թույլ են տվել որպես պաշտպան ներգրավվել։

«Մեզ տեղեկություններ էին գալիս, զանգեր, որ ոստիկանությունում նրանց նկատմամբ բռնություններ են կիրառվում։ Մենք ասացին, այս երկուսի նկատմամբ որևէ բռնություն չկա, մենք այստեղ ենք։ Մեր ժամանալու պահին բերվածների  6-10 ազգականներ բավականին հեռու կանգնած են եղել ոստիկանության շենքի դիմաց։ Հետո ես տեղեկություն ստացա, որ սխալմամբ բերված մի անձի նկատմամբ բռնություն է կիրառվել։ Ես ստացա լուսանկարը բռնության հետքերով, բայց ես այդ անձի պաշտպանը չեմ»,-նշեց պաշտպանն ու ավելացրեց, որ հենց այդ լուրերի տարածվելուց հետո է սկսել  մեծ բազմություն հավաքվել ոստիկանության դիմաց։

Նա նկատեց, որ գործը սկսել ու ընթանում է խախտումներով, այդպես վարվում են թե քննչական մարմինները, թե դատարաններն իրենց որոշումներով։

«Այդ անձանց ձերբակալեցին կոշտ, անհամաչափ ուժի կիրառմամբ, առանց ծանուցելու, առանց լսելու։ Ոստիկակական գործողություններն այս առումով ոչ իրավաչափ են եղել, կարծում եմ, որ մարդու իրավունքների պաշտպանն անելիք ունի, պետք է պարզել տեղի ունեցածքի հանգամանքները, քննվեն բռնության մասին ահազանգերը»,-նշեց փաստաբանը։

Ինչ վերաբերում է, այն հայտարարություններին, թե Սյունիքից սկսում է հակահեղափոխությունը, ապա փաստաբանը հայտարարեց՝ այդ ժողովուրդը քաղաքականության հետ կապ չի ունեցել։

«Նրանք հավաքվել են, երբ բռնության մասին ահազանգ է եղել։ Ինքնաբուխ հավաքը իրենց երիտասարդների, համաքաղաքացիների իրավունքների պաշտպանության համար էր։ Նրանք վանկարկում էին ոչ բռնությանը, թույլ չենք տա, որ նրանց Երևան տանեք։ Եթե ոստիկանությունը մեզ թույլ տար ոստիկանություն մտնել, ապա չէր լինի ենթադրյալ բռնություն, հավաք, անձրևի տակ։ Սա քաջարանցիների ըմբոստությունն էր անօրինականությունների դեմ»,-հայտարարեց Կարեն Ղազարյանը։