Գյուղացիները դեմ են «Մեյմանդարի» շուկան փակելուն
Արարատի մարզի Գայ համայնքի վարչական տարածքում գտնվող «Մեյմանդարի» բնամթերքի մեծածախ շուկան ոստիկանները ցանկանում են փակել, սակայն գյուղացիներն ընդդիմանում են։
«Երկու ուսանող ունեմ, եկել եմ երկու տարի առաջ այս շուկան, իմ երկու ուսանողին, իմ ընտանիքը փրկել եմ։ Հիմա փակում են, ինչի՞ համար են փակում»,- զայրացած ասաց ակցիայի մասնակից տարեց մի տղամարդը։
«Քեզ ընտրեցինք, բերեցինք, սարքեցինք վարչապետ, դու էլ մեզ համար մի բան արա։ Սաղ մեր ուժերով ինքը դարձավ վարչապետ, մենք ենք իրեն ընտրել։ Նույնիսկ իր պատճառով տփոց ենք կերել, բայց իրան սարքեցինք վարչապետ, այսօր ուզում է մեզ սպանի»,- ասաց ակցիայի մեկ այլ մասնակից։
Նրանք նշում են, որ եթե պետք է ախտահանեն շուկան, պետք է շուկայի մի կեսը ախտահանեն, ապրանքը տեղափոխեն այդտեղ, այնուհետև մյուս հատվածն ախտահանեն, իսկ եթե Արտաշատի շուկայի համար են ճանապարհ հարթում, հարցի մյուս կողմն է։
«Մայիսի 30-ին, երբ Արտաշատի շուկան բացվեց, այդ օրվանից որոշեցին, որ այստեղ կորոնավիրուս կա ու պետք է փակվի։ Թող դրանից 15 օր առաջ անեին, 20 օր առաջ անեին, ոչ թե մայիսի 30-ին պետք է որոշեին, որ կորոնավիրուս կա այստեղ»,- ասաց ակցիայի մասնակիցներից մեկը։
Նրանք նշում են, որ վարկեր ունեն, պահեստներում մեծ քանակությամբ ապրանք ունեն, իսկ իրենք ասում են փակեք շուկան ու այդ ապրանքը տարեք, թափեք։
«Այդ մարդն, ով ասել է 24 ժամում փակեք, կարողանալո՞ւ է այդքան ապրանքի փողը տալ։ Հերիք եղավ գյուղացուն ուտեք»,- ասում են գյուղացիները։
«Ի՞նչ է արել այսօրվա կառավարությունը։ Կառավարիչ նշանակում է հոգ տանել։ Ոնց դրել ենք, տենց էլ կանենք, ուժեղից ուժեղ էլ կա»,- ասաց ակցիայի մասնակիցներից մեկը։
Նրանք ասում են, որ իրենց շուկայում կորոնավիրուսի դեպք չի հայտնաբերվել։
Ակցիայի մասնակիցների խոսքով, ոստիկաններին հրահանգ են տվել, որ գան ու փակեն, իսկ այս շուկայում առևտուր անցող գյուղացիներին ասում են՝ գնացեք Արտաշատի շուկան։
Հայտարարվեց, որ պարետի որոշում կա, մեկ օրով՝ 24 ժամով, պարտավոր են շուկան փակել ախտահանելու համար, քանի որ թերություններ են հայտնաբերվել։ Որոշմամբ, այսօր շուկան աշխատելու է, իսկ վաղը 10։00-ից մինչև հաջորդ օրը 10։00-ն շուկայում կատարվելու է ախտահանում։ Հունիսի 4-ի ժամը 10։00-ից շուկան բացվելու է։ Սակայն գյուղացիները դեմ են այդ որոշմանը։
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
