Ձեր վստահելի աղբյուրը

Ֆեյսբուքյան օգտատեր Տարոն Առաքելյանը գրում է. «Երկար տարիների ուսանողական ընկերս՝ Գեորգի Հակոբյանը խնդրում է, որ իրեն շտապ տանեն հիվանդանոց և փրկեն կյանքը: COVID 19 տեստը հաստատված է, ունի երկկողմանի թոքաբորբ և հիմա շնչահեղձ է լինում: Ասաց, որ շտապ օգնությունից ասել են, որ տեղ չկա, ու միայն ծայրահեղ հիվանդների մոտ են գալիս, բայց իր վիճակն էլ հենց ծայրահեղ վատ բնութագրեց, քանի որ ուժ չունի շարժվելու և չի կարողանում շնչել: Կինը և երեխան նույնպես վարակված են: Անգամ կոմպյուտերային տոմոգրաֆիայի համար ստիպված է եղել մի կերպ ինքնուրույն գնալ բուժ հաստատություն, վճարել ու նկարել թոքերը: Կաթիլային ներարկում միացնող բուժքույր, կամ բժիշկ էլ չկա, որ գան օգնեն իրենց:

Խնդրում եմ առողջապահական համակարգի բոլոր ընկերներիս, նախարարության աշխատակիցներին - փրկեք մեր ընկերոջ կյանքը՝ ՏԱՐԵՔ ՀԻՎԱՆԴԱՆՈՑ!!!»։ 

Գեորգի Հակոբյանը Panorama.am-ի հետ զրույցում ասաց, որ դիմել է պոլիկլինիկայի իր բժշկին, քանի որ ջերմություն է ունեցել, ռենտգեն են արել, պարզվել է թոքաբորբ է իր մոտ, ուղեգիր են տվել թեստ հանձնելու համար։ 

«Հինգ օր անց թեստավորեցին։ Պատասխանը եղավ դրական։ Յոթ օր ջերմում եմ։ Ուրիշ բժիշկ ասաց, որ թոքերի կատե պետք է անել։ Երրորդ  կարգի հաշմանդամ եմ, դիմեցի, որ անվճար անեն։ Ասացին արտակարգ իրավիճակ է, իսկ այդ ժամանակ չի կարելի ուղեգիր  տալ։ Չհասկացա՝ արտակարգ իրավիճակ հայտարարում են բնակչությանը օգնե՞ն, թե՞ բնակչությանը կամաց-կամաց սպանեն»,- ասաց Գեորգի Հակոբյանը։ 

Նա ասաց, որ նշանակել են հակաբիոտիկներ, բայց օր-օրի իրեն ավելի վատ է զգում, այդ մասին հայտնել է պոլիկլինիկայի իր բժշկին։ Մեր խոսակցության պահին Գ.Հակոբյանն ասաց, որ իրեն զանգահարում է բժիշկը և զրույցն ընդհատվեց։