Ձեր վստահելի աղբյուրը

Հայաստանի ազգային գրադարանի առցանց շտեմարաններն արդեն հասանելի են։ Լրագրողների հետ հանդիպմանը հայտարարեց գրադարանի տնօրենի պաշտոնակատար Հրաչյա Սարիբեկյանը՝ հիշեցնելով, որ այդ մասին խոստացել էին նախորդ ասուլիսում։

«Երկուշաբթի-երեքշաբթի մենք հասանելիության փորձարկումներ ենք արել, հիմա նորից 24 ժամյա ռեժիմով կապահովվենք սպասարկումը։ Սերվերներն աշխատում են, դրանք մանրակրկիտ կերպով, դետալ առ դետալ մաքրվել են, բովանդակային որևէ կորուստ չունենք»,- ասաց բանախոսը՝ շնորհակալություն հայտնելով գրադարանի կողքը կանգնած ՏՏ մասնագետներին։

Սարիբեկյանի խոսքով, ամենամեծ կորուստը եղել են այրված օդորակիչը, երկու ստեղնաշարն ու մոնիտորը։

Նա ասաց, որ թվայնացված արխիվը եղել է կրիչների վրա, անհիմն որակեց կանխակալ մեղադրանքները, հայտարարություններն ու շահարկումները։

«Դրանց պատասխանելու ոչ ժամանակ, ոչ էլ ցանկություն ունեինք, զբաղված էինք սերվերների վերականգնման աշխատանքով»,- նշեց նա։

Միաժամանակ տնօրենն ասաց, որ մամուլի հրապարակումների մոնիտրինգ են իրականացրել, դիտարկելով նույնիսկ դրանց կիսումներն ու հավանումները։

«Այդ ուսումնասիրությունները մեզ պետք էին։ Շարունակում ենք չբացառել, որ կատարվածը եղել է նաև հարձակում։ Մարդկային միջամտության գործոնը, դիտավորությունը չի հերքվել, փորձաքննությունն ընթանում է»,- ասաց Սարիբեկյանը։

Բանախոսը նշեց նաև, որ գրադարանում ընթանում է ծառայողական քննություն, ԱԻՆ-ը կապի մեջ է Դատախազության հետ, սպասում են քննության ու փորձաքննության ավարտին։ Ակնկալում են անաչառ ու մանրակրկիտ քննության իրականացում։