Ձեր վստահելի աղբյուրը

«Կառավարությունը կորոնավիրուսի դեմ պայքարն ուղղակիորեն ձախողել է»,- խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության պատգամավոր Մանե Թանդիլյանը։

Նրա խոսքով, յուրաքանչյուր միջոցառում անհրաժեշտ էր անել պատեհաժամ, ճիշտ այն պահին, երբ դրա կարիքը կար. 1-2 օր ուշացումը եղավ ճակատագրական։

«Այն միջոցառումները, որոնք անում է կառավարությունը, պետք է արվեին ավելի վաղ, ճիշտ ժամանակին և ճիշտ ձևաչափերով։ Իսկ եղավ այն, որ կորոնավիրուսի նկատմամբ անլուրջ վերաբերմունքը տարածվեց ժողովրդի մեջ։ Այդ վերաբերմունքը կառավարությունից եկել և տարածվել է քաղաքացիների մեջ։ Ես հույս ունեմ, որ քաղաքացիները խոհեմ կգտնվեն, քանի որ կառավարությունը ժամանակին հեգնում էր վիրուսի տարածումը, և հիմա խուճապի մեջ է։ Այս առումով մենք արդեն պետք է դիմենք ժողովրդին և խնդրենք՝ պահպանել կանոնները»,- շեշտեց Մ. Թանդիլյանը։

Նրա խոսքով, այժմ տեսանելի է կառավարության անհանգստությունը, բայց դա որևէ կերպ չի արդարացնում ժամանակին ճիշտ ահազանգ չտալու և քաղաքացիների ուշադրությունը չգրավելու հանգամանքը։

Հարցին, թե արդյո՞ք վարչապետի ֆեյսբուքյան էջում տեղադրված ֆոտոշարքերն ու տեսանյութերը ազդեցություն կունենան, Մ. Թանդիլյանը պատասխանեց՝ երբ կա կարգադրություն, դրա կատարման համար պատասխանատու է կառավարությունը։ Նրա խոսքով դա հեշտ չէ, բայց ոչ ոք չէր ասել, որ հեշտ է լինելու, և չէր ասել, որ հայտարարություն անելու պահից սկսած բոլորն անելու են այն, ինչ ասվում է։

«Այս պահին պատասխանատվությունը դնել միայն քաղաքացիների վրա, անկարելի է, դա սեփական անկարողության ցուցադրում է։ Այս պարագայում որոշում ընդունողը պետք է ապահովի դրա կատարումը։ Ես հարց եմ բարձրացնում՝ տեղյա՞կ է արդյոք կառավարությունը, որ բավականաչափ քանակով ավտոբուսներ չկան Վանաձոր քաղաքում։ Երբ մենք միջոցներ ենք պարտադրում, դիտարկում ենք՝ հնարավո՞ր է արդյոք դրանց կիրառումը, թե՞՝ ոչ։ Այստեղ կառավարությունն անկարողություն ունի»,- ասաց պատգամավորը։

Ըստ Մ. Թանդիլյանի, միայն այն հանգամանքը, որ տևական ժամանակ է՝ քաղաքացիները չեն հետևում ցուցումներին, դա անվտսահություն է առոջապահության նախարարի հանդեպ։ Նրա խոսքով, երբ մեկ անգամ խաթարվում է վստահությունը, շատ դժվար է դառնում այն վերականգնելը․ հետևաբար վերաբերմունքը, որ Ա. Թորոսյանն ուներ վիրուսի նկատմամբ, շատ քաղաքացիներ չեն կարողանում հաղթահարել, ու չեն կարողանում լուրջ վերաբերել նրա մյուս հայտարարություններին։

Անդրադառնալով վարչապետ Նիկոլ Փաշինյանի հայտարարությանը, թե եթե կառավարությունը մեղավոր է, ապա մեղավոր է նաև ժողովուրդը, քանի որ նա է կառավարությանն իշխանության բերել՝ Մ. Թանդիլյանն ասաց, որ քաղաքացիները գնացել են ընտրության իրենց պատկերացումներով և այն ամենի հիման վրա, ինչ լսել են թեկնածուներից։ Ըստ պատգամավորի, հիմա էլ ժողովրուրդը տեսնում է այն, ինչ կա։

«Ես չեմ կարծում, որ այդ հայտարարությունը նրա մասին է, որ վարչապետը մեղավորություն չունի, և միակ մեղավորը ժողովուրդն է։ Ընտրությունների ընթացքում իշխանությունն ունեցել է ժողովրդի աջակցությունը, և դրանից հետո պարտավոր էր ապահովել այդ ժողովրդի անվտանգությունը։ Այժմ ժողովուրդն ականատես է, որ կառավարությունն ունակ չէ պաշտպանելու իրեն, և աստիճանաբար օտարում է այդ պատասխանատվությունն իրենից»,- շեշտեց Մ. Թանդիլյանը։