Ձեր վստահելի աղբյուրը

«Փոխանակ պետությունն ասի՝ ես հարկերը չեմ ուզում, հետաձգում եմ, այս պահին արձակուրդ եմ տրամադրում, ասում է՝ եկեք վարկ վերցրեք, որպեսզի իմ հարկը տաք»,- ԱԺ տնտեսական ու ֆինանսավարկային և բյուջետային հարցերի մշտական հանձնաժողովների համատեղ նիստում 2019 թ. բյուջեի կատարողականի քննարկման ժամանակ հայտարարեց պատգամավոր Արկադի Խաչատրյանը և հավելեց, որ այն կառավարության կողմից առնվազը գործընկերային չէ:

Պատգամավորը հարց ուղղեց զեկուցող Տիգրան Խաչատրյանին, թե արդյոք վերջինս, որպես  էկոնոմիկայի նախարար կռիվ տվել, պայքարել է այդ սուբյեկտների համար։

«Շատ կարևոր է, որ նրանք հավատան և տեսնեն, որ իրենց նախարարն իրենց թիկունքին կանգնած է, և արդյունավետությունը զուտ այդ գոյատևման խնդրի լուծումն է, այլ ոչ թե ապագային հավատալը»,- նկատեց «Լուսավոր Հայաստան» խմբակցության պատգամավորը:

Վերջինս անդրադարձավ նաև կառավարության աջակցության երրորդ ծրագրին և բացասական գնահատեց այն փաստը, որ մի փոքր փչացած վարկային պատմությունը, կամ հարկի վճարման ուշացումը հիմք է համարվել, որպեսզի տվյալ սուբյեկտը դուրս մնա աջակցության ծրագրից:

Էկոնոմիկայի նախարար Տիգրան Խաչատրյանը հայտնեց, որ կառավարությունը մի քանի անգամ այդ չափորոշիչը մեղմացրել է:

Նախարարի խոսքով, կառավարությունը ի վերջո սահմանել է, որ եթե 2019 թ. վերջի դրությամբ հարկային պարտավորություններն ընդհանուր առմամբ կատարել է և տեխնիկական անճշտություններով շեղումը մի տոկոսի սահմաններում է, ապա  այդ ընկերությունները համարվել են օրինապահ հարկ վճարող:

«Ձեզ մի բան ասեմ, վերջին օրերի ընթացքում երրորդ միջոցառման համար դիմումները զրոյացվել են, այսինքն՝ դա նշանակում է, որ այն կազմակերպությունները, որոնք կարող էին դիմել և օգտվել այդ գործիքից՝ առավելագույն չափով դիմեցին»,- հայտարարեց Տիգրան Խաչատրյանը:

Էկոնոմիկայի նախարարը նշեց նաև, որ ինքը իր պաշտոնից պահանջվող ամեն ինչ արել է և, կարծում է, որ այն բավականաչափ է այդ տեսակետները պաշտպանելու համար:

Լրացնելով իր գործընկերոջը՝ ֆինանսների նախարար Ատոմ Ջանջուղազյանն էլ շեշտեց, որ կառավարությունը կռիվ տալու տեղ չէ, այլ հավասարակշիռ որոշումներ կայացնելու պահանջ ու անհրաժեշտություն ունի:

Վերջինս շեշտեց, որ պատգամավորի կողմից առնվազն չեն լսել որևէ հակափաստարկ, որը կհիմնավորեր հարկային արձակուրդի տրամադրման տարբերակը:

Ֆինանսների նախարաը նկատեց, որ պատրաստ են եղել քննարկել հարկային արձակուրդներ տալու տարբերակը, և հավելեց. «Բայց արդյոք վստահ ենք, որ այն լավագույն գործիքն է՝ չեղած, կամ սահմանափակ հնարավորություններն օգտագործելով ամենալավ արդյունքին հասնելու համար: Մեր կարծիքով՝ ոչ»:

Պատգամավոր Արկադի Խաչատրյանը շեշտեց, որ իրենք չեն խոսել համատարած արձակուրդի, կամ ռիսկերի բացակայության մասին, այլ ներկայացրել էին նախագիծ, որում ասվում էր, որ կառավարությունն ինքն է սահմանում առաջնահերթ տուժած ոլորտների և սուբյեկտների այն շրջանակը, որոնք այնքան են տուժել, որ արձակուրդը խիստ անհրաժեշտություն է այդ սուբյեկտների գործունեությունը փրկելու համար:

Հարկային արձակուրդն, ըստ պատգամավորի,  ընդամենը 3-6 ամսով հետաձգում է հարկային պարտավորությունների կատարումը և տասնյակ պետություններ գնացել են այդ ճանապարհով, ինչը  ճիշտ է: