Ձեր վստահելի աղբյուրը

«92.4% կատարողական ունենք և դա զգալիորեն կապված է հանգամանքի հետ, որ տարբեր վարկային գծով ծրագրեր, ըստ էության, ցածր կատարողական ունեն»,- խորհրադարանում ասաց ԱԺ «Իմ քայլը» խմբակցության պատգամավոր Գևորգ Պապոյանը։

Դիմելով Ֆինանսների նախարար Ատոմ Ջանջուղազյանին՝ պատգամավորը հետաքրքրվեց՝ ինչո՞ւ է արտաքին աջակցությամբ կատարվող ծրագրերի կատարողականը ցածր։

Պատասխանելով պատգամավորի հարցին՝ Ա. Ջանջուղազյանը նշեց, որ արտաքին աջակցությամբ իրականացվող ծրագրերի կատարողականը շուրջ 54% է, մինչդեռ ներքին ռեսուրսների հաշվին իրականացվող ծրագրերի կատարողականը՝ 96% է։

«Եթե թվերով արտահայտելու լինենք, ապա տարեկան ի սկզբանե հաստատված ծախսերի մեծությունը 1 տրիլիոն 508 մլրդ դրամ էր, բայց փաստացի մենք ունեցել ենք 1 տրիլիոն 553 մլրդ դրամ։ Բնական է, այն ճշտվել է տարվա ընթացքում, և 1 տրիլիոն 622 մլրդ դրամ է կազմել ճշտված ծրագիրը»,- ներկայացրեց Ա. Ջանջուղազյանը։

Նրա խոսքով, արտաքին աջակցությամբ իրականացվող ծրագրերի համար մենք ֆինանսական միջոցների խնդիր չունենք, քանի որ արտաքին աջակցությամբ իրականացվող ծրագրերի համար կան գործող համաձայնագրեր, և դրանց շրջանակում համաձայնեցված գումարներն ամբողջությամն հասանելի են։

«Այդ տեսակետից մեր խնդիրն ավելի շատ ծրագրերի իրականացման հետ է կապված, քան ֆինանսական միջոցների։ Իսկ այդ ծրագրերի կատարումը կախված է երկու հանգամանքից՝ տնտեսվարողների պատրաստվածությունից և ծրագրերի կառավարման կարողության աստիճանից։ Այս երկու հարցերը մեր համար օրակարգային են, և բնականաբար, դրանց միտված գործողություններ իրականացվում են»,- պատասխանեց ֆինանսների նախարարը։

Գ. Պապոյանն էլ արձագանքեց՝ այսինքն ֆինանսական խնդիր չունենք, խնդիրը մեր կարողությունների հետ է կապված. «Բայց այստեղ նաև ծագում է երկրորդ հարցը. արդյո՞ք այդ ֆինանսական միջոցների համար, որոնք կարողության բացակայության կամ կլանման հնարավորության սահմանափակ լինելու պատճառով մնում են չօգտագործված, մենք տոկոսավճարներ տալիս ենք։ Ո՞րն է խելամիտ սահմանը, որ մենք հասկանանք՝ ինչքան է մեզ պետք՝ այդքան վերցնենք, և ոչ ավելին»։

Պատասխանելով՝ Ա. Ջանջուղազյանը նշեց, որ կան որոշակի պարտավորություններ, և չօգտագործված միջոցների պարտավճարներ։

«Դոնորը, ով հանաձայնել է ֆինանսավորել ծրագիրը, միջոցները մեզ համար հասանելի է դարձնում, ինչը ենթադրում է որոշակի ծախսի իրականացում։ Երբ մենք դա օգտագործում ենք, այդ օգտագործման տոկոսներով ենք հատուցում այդ ծախսը, իսկ եթե չեն օգտագործում այդ միջոցներն, այնուամենայնիվ, դոնորն այդ ծախսը իրականացնում է, և անարդար կլինի, որ մենք ոչ միայն չօգտագործենք և այդ տոկոսներով ծախսը չհատուցենք, այլ նաև իր արած ծախսը չհատուցենք։ Քանի որ փողը գին ունի, և դրա՝ մեզ համար հասանելի դարձնելը, ենթադրում է, որ որևէ մեկը պարտավոր է այն վերադարձնել»,- շեշտեց Ա. Ջանջուղազյանը։

Ֆինանսների նախարարը տեղեկացրեց, որ մենք ունենք մոտավորապես 1.3 մլրդ դոլար միջազգային աջակցություն, բայց դրա համար մեր կողմից վճարվող պարտավճարներն անհամեմատ ցածր են։

«Այս պահին կդժվարանամ ինչ-որ թիվ ասել, բայց պատկերացրեք՝ մի քանի հարյուր հազար դոլարի մասին է խոսքը, որ էլի գին է, բայց եթե խոսում ենք 1.3 մլրդ դոլար հասանելի գումար ունենալու մասին, ապա այդ տեսակետից այդ պարտավճարը դժվար է բարձր համարել»,- նշեց Ա. Ջանջուղազյանը։