Ձեր վստահելի աղբյուրը

«Բավականին հիստերիկ արձագանքներ  էին, և որևէ աղերս չունեին պարոն Ծառուկյանի հայտարարության հետ»,- խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Արման Աբովյանն՝ անդրադառնալով ԲՀԿ խորհրդի նիստից հետո իշխանական թևի արձագանքներին։

Հիշեցնենք, որ ԲՀԿ առաջնորդ Գագիկ Ծառուկյանը կուսակցության խորհրդի նիստում նշել էր՝ իշխանությունը պետք է ամբողջ կազմով հրաժարական տա, քանի որ նա ձախողել է ամեն ինչ։

Ա. Աբովյանի խոսքով, որևէ նոր բան չկար իրենց հայտարարությունում, այլ վերլուծվել ու գնահատական էր տրվել բոլոր ուղղություններով արձանագրված տապալումներին՝ սկսած տնտեսական ոլորտից և վերջացրած արտաքին ոլորտով։

«Մենք ունենք շատ կարևոր խնդիր, և դա իշխանությունների ոչ ադեկվատ և ոչ համահունչ արձագանքն էր։ Իշխանությունը փոխարենը վերլուծի և հասկանա դառը իրողությունը, հրաժարվում է դրա հետ առերեսվել։ Նա հրաժարվում է ընդունել, որ բոլոր ծրագրերի տապալումն իր կողմից է տեղի ունեցել։ Դուք տեսնում եք՝ իրենց կողմից ինչ արձագանքներ կան՝ սկսած Գյուլնազ տատի ստահոդ հին քարոզչական հնարքներից, որոնք անընդհատ օգտագործվում են «ԲՀԿ»-ի հանդեպ, վերջացրած զավեշտալի և անհավասարակշռված արձագանքներով»,- շեշտեց պատգամավորը։

Նա պնդեց, որ իրենք ահազանգել են տնտեսական ահագնացող ճգնաժամի և տասնյակ հազարավոր մարդկանց գործազուրկ դառնալու, ինչպես նաև սոցիալական ահավոր իրավիճակի մասին.

«Պարզ է, որ իշխանությունները բովանդակային վեճի մեջ չեն փորձում մտնել, որովհետև ասելիք չունեն։ Իրենց մնում է մի կողմից սպառնալ, մյուս կողմից էլ՝ ամպագորգոռ հայտարարություններ անել, որոնք բացի հուզական ենթատեքստից ուրիշ ոչինչ չեն կրում»։

Հարցին՝ «Բարգավաճ Հայաստան» կուսակցության օրակարգում կա՞ իշխանափոխության թեման, Ա. Աբովյանը պատասխանեց՝ մեր օրակարգում կա ընդամենը մեկ հարց՝ չխնայել ոչ մի ռեսուրս, որ ՀՀ-ում այս խայտառակ իրավիճակը շտկվի։

«Մենք շատ ակտիվ հանդիպումների մեջ ենք թե՛ արտախորհրդարանական ուժերի հետ, և թե՛ անհատների ու քաղաքական ուժերի հետ։ Իհարկե, մենք հանդիպում ենք, քննարկումներ ենք ունենում, քանի որ ստեղծված իրավիճակը կոնսոլիդացիոն ներուժի կիրառում է պահանջում։ Մենք քննարկման թեմաներով սահմանափակված չենք, ամեն ինչի մասին էլ խոսվում է, ամբողջ տեղեկությունը վերլուծվում է։ Երեք օր է՝ ասում են, որ պետք է լինի կոնստրուկտիվ քննարկում, կներեք, բայց ասողին լսող է պետք։ 2020 թվականի սկզբից մեր խմբակցությունը հազար անգամ մատնանշել է խնդիրները, որոնց առաջ կանգնելու է պետությունը»,- տեղեկացրեց պատգամավորը։