Ձեր վստահելի աղբյուրը

«Ես կխնդրեմ, որ բոլոր հասարակական գործիչները բարձր դատարանի հասցեին արտահայտվելիս լինեն զուսպ, հավասարակշռված և խուսափեն որևէ վիրավորական արտահայտությունից»,- խորհրդարանում լրագրողների հետ զրույցում ասաց ՍԴ աշխատակազմի ղեկավար Էդգար Ղազարյանը։

Նրա խոսքով, հատկապես պատգամավորները պետք է ավելի զուսպ լինեն ՍԴ-ի մասին խոսելիս, քանի որ հենց խորհրդարանը ՍԴ դիմող սուբյեկտ է հանդիսանում։ ՍԴ աշխատակազմի ղեկավարի պնդմամբ, յուրաքանչյուրը պետք է կոռեկտ գտնվի բարձր դատարանի և դատավորների հասցեին որևէ տեսակետ արտահայտելիս.

«ՍԴ-ն իրականացնում է իր բնականոն գործունեությունը, ստանում է դիմումներ, կայացնում որոշումներ։ ՍԴ-ն ոչ մեկի հույսից կախված չէ, և իրականացնում է իր առաքելությունը»։

Հարցին՝ բացի ՍԴ նախագահ Հրայր Թովմասյանից, կա՞ն էլի դատավորներ, որոնք իրենց աշխատավարձերը տրամադրել են կորոնավիրուսի դեմ պայքարի ֆոնդին, Է. Ղազարյանը պատասխանեց՝ պարոն Թովմասյանի խոստումը կատարված է, և նրա աշխատավարձն ամբողջությամբ փոխանցվել է առողջապահության նախարարության հատուկ հաշվեհամարին, իսկ մյուս աշխատակիցներն այս երկու ամիսներին ուղղակի պարգևավճարներ չեն ստացել։

Դիտարկմանը, որ ՍԴ-ում կան ազատ հաստիքներ, ո՞րն է պատճառը, որ դրանք չեն համալրվում, ՍԴ աշխատակազմի ղեկավարն արձագանքեց՝ աշխատակազմի կառուցվածքը բավականին երկար ժամանակ է՝ փոփոխությունների չի ենթարկվել, և հիմա ակտիվորեն քննարկվում է նոր կառուցվածքի հարցը։ Նա տեղեկացրեց, որն նոր կառուցվածքով պայմանավորված կլինեն և փոփոխություններ։

«Խոսքը կարող է լինել մեկ բաժնում մեկ թափուր հաստիքի մասին, որը ներքին կազմակերպական ռեսուրսով լրացվում է։ Կարծում եմ, որ բոլոր հիմարկներում էլ կան թափուր հաստիքներ, և աշխատանքները կազմակերպելիս դա հաշվի է առնվում։ Ի դեպ, այս տարվանից ՍԴ աշխատակազմն իրականացնում է նաև քաղաքացիական ծառայություն, և նաև դրանով պայմանավորված մենք կունենանք նոր կառուցվածք և նոր հաստիքացուցակ»,- շեշտեց նա։

Է. Ղազարյանը տեղեկացրեց, որ արտակարգ իրավիճակի պայմաններում ռիսկային խմբում գտնվող ՍԴ աշխատակիցները հեռավար են իրականացնում իրենց աշխատանքները։ Սակայն, հեռավար աշխատանքի անցնելուց հետո ևս ՍԴ գործունեությունը որևէ պայմանում չի տուժել։

Հարցին, թե որքանո՞վ է ՍԴ դատավոր Վահե Գրիգորյանը ներգրավված այդ աշխատանքներին, Է. Ղազարյանը պատասխանեց՝ դատավորների աշխատանքն արտահայտվում է նիստերին մասնակցելով, և պարոն Գրիգորյանը պաշտոնը ստանձնելու օրվանից ՍԴ որևէ նիստի չի մասնակցել՝ այդ թվում և աշխատակարգային նիստերին։

«Բայց մենք նրանք հանդիպում ենք։ Նա աշխատավարձ ստանում է, և մենք չենք կարող նրան զրկել աշխատավարձից։ Ես իր հետ չեմ զրուցել, թե ինչու նա չի մասնակցում նիստերին, նման իրավասություն էլ չունեմ։ Իմ կարգավիճակը թույլ չի տալիս, որ ես դատավորից բացատրություններ պահանջեմ իր գործունեության համար։ Իմ խնդիրը դատարանի բնականոն գործունեությունն ապահովելն է։ Իսկ ՍԴ շենքում հաճախ եմ տեսնում պարոն Գրիգորյանին, նրան հատկացված մեքենան ևս տեսնում ենք շենքի բակում, բայց դատարանի ֆունկցիոնալ գործունեությանը նա չի մասնակցում»,- ասաց Է. Ղազարյանը։

Նա նաև տեղեկացրեց, որ վերջին շրջանում Վահե Գրիգորյանին նյութեր չեն մակագրվում, քանի որ նա ինքն էլ է հայտարարել, որ չի մասնակցում ՍԴ աշխատանքներին, և որպեսզի գործը չտուժի, դատարանի նախագահը գործերը մակագրում է մյուս դատավորներին։

Հարցին՝ այդ դեպքում ինչու է նրան ծառայողական մեքենա տրամադրվում Է. Ղազարյանը պատասխանեց՝ մենք պարտավոր ենք բոլոր դատավորների համար հավասար պայմաններ ստեղծել։