Ձեր վստահելի աղբյուրը

«ՍԴ-ում 2017 թվականին դիմումներին արձագանքում էին միջինը 12 օրվա ընթացքում, իսկ 2019 թվականին այդ ցուցանիշը դարձել է 15 օր»,- խորհրդարանում ասաց ԱԺ «Իմ քայլը» խմբակցության պատգամավոր Համազասպ Դանիելյանը՝ դիմելով ՀՀ սահմանադրական դատարանի աշխատակազմի ղեկավար Էդգար Ղազարյանին։

Պատգամավորը նշեց, որ դիմումների թիվը չի ավելացել, և հասկանալի չէ՝ ո՞րն է ուշ արձագանքելու պատճառը. «Արդյո՞ք դա ՍԴ աշխատակազմի ղեկավարի գրագիտության և կարողությունների հետ է կապված։ Շատ ուրախ եմ, որ դուք՝ որպես վարչական պաշտոնյա, ունեք ազատ ժամանակ՝ այդ թվում նաև աշխատանքային ժամին՝ Ձեր ազատ տեսակետները ներկայացնելու, բայց, այս դեպքում ՍԴ աշխատակազմում ինչ-որ մի բան սխալ է պլանավորվում՝ հանրային միջոցներով աշխատուժ ներգրավելու և նրանց պահելու համար գումարներ ծախսելու վրա»։

Արձագանքելով՝ Է. Ղազարյանն ասաց, որ չգիտի, թե ինչին է հղում անում պատգամավորը՝ ՍԴ-ում ստացվող դիմումների քանակի և դրանց պատասխանների ժամկետների վերաբերյալ խոսելիս։

«Անշուշտ, ՍԴ-ում ստացվող դիմումների պատասխանների ժամկետներն ու բովանդակությունը կարող են կապված լինել բոլոր աշխատակիցների՝ այդ թվում և աշխատակազմի ղեկավարի պրոֆեսիոնալիզմի, գրագիտության հետ։ Մենք 2019 թվականին ունեցել ենք 332 դիմում, որից  248-ը՝ սահմանադրական բովանդակությամբ։ Նախորդ տարի 307 նման դիմում է եղել։ Ձեր ասած ժամկետները վերաբերում են դիմումներին պատասխանելու համար նախատեսված ժամկետներին, բայց գործնականում մենք դիմումներին պատասխանում ենք առավելագույնը երկու օրվա ընթացքում։ Կարծում եմ դա ուղղակիորեն կապված է մեր բոլոր աշխատակիցների՝ այդ թվում և աշխատակազմի ղեկավարի գրագիտության հետ»,- շեշտեց ՍԴ աշխատակազմի ղեկավարը։

Ինչ վերաբերում է աշխատանքային ժամերին և պետական ռեսուրսների գործածությամբ հանրային տեսակետներ արտահայտելուն, ապա Է. Ղազարյանը տեղեկացրեց, որ իր պարագայում դա բացառվում է, և ինքը բոլոր դեպքերում հանրային կարծիք է հայտնում աշխատանքային ժամից դուրս և իր սեփական միջոցներով։

Անդրադառնալով ՍԴ-ի՝ տեխնիկապես հագեցվածությանը, նա նշեց, այդ ուղղությամբ ՍԴ-ին հատկացվել է 7 մլն 131 հազար դրամ, և այսօր ՍԴ բոլոր աշխատակիցներն ապահովված են տեխնիկական անհրաժեշտ միջոցներով, և այդ առումով որևէ խնդիր չկա։

Հ. Դանիելյանն էլ արձագանքեց՝ պարոն Ղազարյանը կարող է կարծիք ունենալ, թե ինչ պետք է ներկայացնել, ինչը՝ ոչ, բայց նա պետք է նաև իմանա, որ ՀՀ-ում ցանկացած գերատեսչություն պետք է ունենա ոչ ֆինանսական ցուցանիշներ.

«Ինչ վերաբերում է դիմումներին, ես չգիտեմ, թե դուք երկու օրանոց ցուցանիշը որտեղից եք վերցրել, բայց ես գիտեմ, որ իմ ձեռքի տակ է տեղեկանք, համաձայն որի՝ դիմումների ընդունման միջին ժամկետը 2019 թվականին 15 օր է, մինչդեռ 2017-ին՝ 12 էր»։

Է. Ղազարյանն էլ կրկին հստակեցրեց՝ նշված թվերը սահմանված ցուցանիշներն են, բայց ՍԴ-ն շատ ավելի արագ է պատասխանում նամակներին։

«Ինչ վերաբերում է ոչ ֆինանսական ցուցանիշներին, ապա կառավարման առանձին մարմիններ, այդ թվում ՍԴ մասով այդ մեթոդաբանությունը չի կարող լինել, և մենք չենք կարող ներկայացնել մանրամասն նկարագրություն՝ ՍԴ գործունեության վերաբերյալ, որովհետև ես իրավասություն չունեմ ՍԴ գործունեության մասին տեղեկատվություն տրամադրելու։ Մենք կարող ենք միայն ֆինանսական կատարողականի ցուցանիշի մասին ինֆորմացիա տալ»,- եզրափակեց խոսքը Է. Ղազարյանը։