Ձեր վստահելի աղբյուրը

Բժիշկ ռեանիմատոլոգ Արսեն Մանուկյանը  թողնելով աշխատանքը Գերմանիայում, վերադարձել է Հայաստան և ներգրավվել կորոնավիրուսի դեմ պայքարի աշխատանքներին:  Պարետատան նիստից հետո տեղի ունեցած ճեպազրույցի ընթացքում բժիշկը պատմեց, թե ինչ պայմաններում է  կայացրել որոշումը:

«Աշխատում եմ Գերմանիայի Բավարիա երկրամասում գտնվող Սանա կլինիկայում:  Դեռևս մարտ-ապրիլ ամիսներին այնտեղ ունեցանք մեծաքանակ  covid19-ով պացիենտներ՝ ինտենսիվ թերապիայի բաժանմունքներում:  Մայիս ամսին, վարակը խլելով բազմաթիվ մարդկային կյանքեր և թողնելով ահռելի սոցիալ-տնտեսական հետևանքներ, որոշակիորեն նահանջ ապրեց: Իմ կարծիքով բնակչության բարձր սոցիալական պատասխանատվության հետևանքով: Այդ ժամանակ հայրենիքում սաստկացող իրավիճակն ամեն օր մտորումների տեղիք էր տալիս ՝ իմ անելիքների մասին: Մայիսի վերջին կարդացի ՀՀ առողջապահության նախարարի հայտարությունը, որ պահանջվում են մասնագետներ և հասկացա, որ ենթագիտակցորեն արդեն կայացրել եմ որոշումս: Քննարկեցի կնոջս հետ և իմացա , որ նա ևս կողմ է, պատրաստ է անհայտ ժամկետով միայնակ մնալ  և խնամել տասն ամսական որդուս: Գործատուից համաձայնություն կորզելուց հետո գնեցի ինքնաթիռի տոմս և եկա Երևան»,-ասաց բժիշկը շարունակելով. «Նույն օրն առավոտյան միացա Ս.Գր.Լուսավորիչ հիվանդանոցի ինտենսիվ թերապիայի բաժանմունքի թիմին: Այն աշխատանքը , որ արվում է այստեղ աննկարագրելի է: Սա սարսափելի աշխատանք է՝ հոգեբանական, ֆիզիկական և առողջության տեսակետից: Ամբողջ թիմը կռիվ է տալիս մահվան դեմ  և դա անում է մեծ պատվով և պրոֆեսիոնալիզմով»:

Բժիշկ ռեանիմատոլոգ Արսեն Մանուկյանը, որը հազիվ էր զսպում հուզմունքը, քաղաքացիներից խնդրեց ՝ օգնել իրեն  մասնակցել որդու առաջին տարեդարձին:

«Հուլիսի 18-ին որդիս կդառնա մեկ տարեկան: Հուսով եմ, որ մինչ այդ համաճարակի զարգացման այնպիսի տեմպ կունենանք, որ ես կկարողանամ մասնակցել որդուս առաջին տարեդարձին: Բոլորիդ խնդրում եմ օգնեք ինձ այս հարցում»-ասաց բժիշկն ու  կոչ արեց  հայրենակիցներին՝ պահպանել  հակահամաճարակային կանոնները ՝ բացառելով ոչ անհրաժեշտ շփումները:  Նրա համոզամբ՝ այս հիվանդության դեմ պայքարում միակ արդյունավետ տարբերակը կանխարգելումն է: