Ձեր վստահելի աղբյուրը

«Այս պահի դրությամբ մարզում կա կորոնավիրուսի 814 արձանագրված  դեպք»,- խորհրդարանում լրագրողների հետ զրույցում ասաց Արմավիրի մարզպետ Համբարձում Մաթևոսյանը։

Նրա խոսքով, հիվանդների ուղիղ կեսն արդեն իսկ առողջացած է, իսկ կորոնավիրուսային հիվանդության հետևանքով մահերի թիվը 21 է։

Ըստ մարզպետի, մարզում կորոնավիրուսի դեպքերի աճ կա, բայց չկան առանձնացված համայնքներ, որտեղ կենտրոնացված են վարակակիրները:

«Այս պահին հիվանդությունն ավելի արագ է տարածվում Տանձուտ և Փարաքար համայնքներում։ Բայց այդ համայնքներ ելումուտը սահմանափակված չէ, մենք սպասում ենք մասնագետների կողմից կարծիքի, և եթե պետք լինի, ապա կդիմենք պարետատանը, որպեսզի համայնքներում հատուկ սահմանափակումներ մտցվեն։ Այս պահին Տանձուտ համայնքում ունենք 30 վարակակիր, իսկ մարզում ինքնամեկուսացվածների թիվը հասնում է 1000-ի։ Եվ չենք կարող բացառել, որ մարզում չկա համայնք, որտեղ վարակվածներ չլինեն, եթե հաշվի առնենք, որ ասիմպտոմ դեպքեր էլ կան, և ինչպես մասնագետներն արդեն նշել են, ՀՀ-ում մոտ 100 հազար վարակակիր ունենք»,- ընդդծեց նա։ 

Հարցին՝ մարզի համայքներում կա՞ն մարդիկ, որոնք հրաժարվում են դիմակ դնել և չեն հավատում վիրուսի գոյությանը, մարզպետը պատասխանեց՝ դիմակ դնելը պարտադիր է հանրային վայրերում, և գյուղատնտեսական աշխատանքներ անելիս նման խնդիր չկա, քանի որ մարդիկ սոցիալական հեռավորության վրա են աշխատանք կատարում։

«Իսկ քաղաքներում մարզի հակահամաճարակային շտաբի աշխատակիցները, ոստիկանները և շրջիկ խմբերը շրջում են համայնքներում, արձանագրում են եղած խախտումներն ու արդեն վարչական տույժ կիրառում։ Ինչ վերաբերում է հարցին, թե մարդիկ հավատում են վիրուսի գոյությանը, թե ոչ, ապա ինձ նման խոսակցություններ չեն հասել, թե մարդիկ չեն հավատում։ Կարծում եմ, վերջին շրջանում մարդիկ ավելի զգուշությամբ են մոտենում խնդրին»,- շեշտեց մարզպետը։

Հ. Մաթևոսյանը չցանկացավ մեկնաբանել ընդդիմության այն պնդումը, թե իշխանությունները տապալել են կորոնավիրուսի դեմ պայքարը։ Իսկ ինչ վերաբերում է կորոնավիրուսի տարածմանը, ապա նրա խոսքով, այն միայն ՀՀ-ում չի այդքան մեծ թափով տարածվում.

«Ես լիազորված եմ խոսել մեր մարզի մասին, և այնտեղ, այո, հիվանդության թվի աճ կա, բայց վարակի տարածման կենտրոններ չունենք»։

Հարցին, թե մարզային հիվանդանոցներն ինչ ռեսուրսներ ունեն կորոնավիրուսով վարակված հիվանդներին բուժօգնություն տրամադրելու համար, Հ. Մաթևոսյանը պատասխանեց՝ մարզային ռեսուրսներն ամբողջությամբ ծախսվում են՝ հիվանդներին սպասարկելու համար։

«Մարզում չունենք առանձնացված հիվանդանոցներ, և ծանր հիվանդներին ուղղորդում ենք Երևանի հիվանդանոցներ։ Եվ եթե անհրաժեշտ լինի մարզում նման հիվանդանոցներ առանձնացնել, ապա մենք այդ հնարավորությունն ունենք։ Կարող ենք առանձնացնել Մեծամորի ինֆեկցիոն կենտրոնը։ Նման խոսակցություններ արդեն իսկ կան, և մենք այդ ուղղությամբ աշխատում ենք։ Բացի այդ, կարող ենք նաև կորոնավիրուսի դեմ պայքարին տրամադրել Վաղարշապատի ու Արամավիրի ԲԿ-ները»,- շեշտեց մարզպետը։