Ձեր վստահելի աղբյուրը

«Մինչև 1 միլիոն դրամի զրո տոկոսով վարկերի ծրագիրը, իմ գնահատմամբ, ես կհամարեմ չկայացած, քանի որ բանկերն արեցին այն, ինչ ուզեցին»,- խորհրդարանի Տարածքային կառավարման և տեղական ինքնակառավարման, գյուղատնտեսության և բնապահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում հայտարարեց «Իմ քայլը» խմբակցության պատգամվոր Սոֆյա Հովսեփյանը՝ դիմելով ՀՀ էկոնոմիկայի նախարար Տիգրան Խաչատրյանին:

Նկատելով, որ նախարարն էլ իր խոսքում շեշտել է, որ բանկերը մասնավոր կառույցներ են՝ պատգամավորն առաջարկեց, որ նման աջակցությունը մեկ այլ ճանապարհով և պետական երաշխիքներով տրամադրվի:

Սոֆյա Հովսեփյանը նկատեց, որ 3-15 մլն դրամով անասնապահության ծրագրերի վարկավորման գործընթացում նույնպես խնդիրներ կան:

Պատգամավորի խոսքով, երբ անձը դիմել և ստացել է ֆինանսավորման առաջին մասը՝ 3-5 մլն դրամը ու դիմում է երկրորդը ստանալու նպատակով՝ բանկում ասում են, որ շահառուն արդեն վարկ ունի և չեն կարող տալ:

Պատգամավորը նկատեց, որ վարկառուն չէր կարող մեկ տարում փակել 5 մլն-ի վարկը:

Հովսեփյանի հավաստիացմամբ, բանկերը վերջին շրջանում սերտիֆիկացված քաղաքացիներին նույնիսկ 3 մլն դրամի վարկ էլ չեն տրամադրում, այլ 1 մլն են տալիս, որով վերջիններս չեն կարողանում անգամ երկու տոհմային անասուն գնել:

Տեղեկացնելով, որ ԿԲ-ից իրեն հայտնել են, որ գյուղատնտեսական վարկերի դիմումները դեռ քննարկվում են՝ Սոֆյա Հովսեփյանը փաստեց, որ գյուղատնտեսական սեզոնի ավարտից հետո իմաստ չունի դիմումները նայել:

Տիգրան Խաչատրյանը նշեց, որ 8 հազար գյուղացիական տնտեսություն վարկավորվել է մինչև մեկ միլիոն դրամի վարկային ծրագրով:

«Եթե 15 հազարն էլ մերժվել է, կամ ասել են սպասի, դա այն պատճառով է, որ բանկերը այդքան էլ վստահ չեն, որ կվերադարձնեն»,- հայտարարեց նախարարը:

Ըստ Տիգրան Խաչատրյանի, մերժումների պատճառն այն է, որ գյուղացին լավ չի հաշվարկում և գնահատում վարկը վերադարձնելու իր կարողությունը, իսկ բանկը հաշվարկում է և գտնում, որ գյուղացին չի կարող վերադարձնել այն և մերժում է վարկի տրամադրումը:

Նախարարի խոսքով, Հայաստանում չվերադարձվող վարկերի հիմնական մասը բաժին է ընկնում գյուղատնտեսական տնտեսություններին:

Սոֆյա Հովսեփյանն առաջարկեց գյուղատնտեսությունը հաջորդ տարի վարկավորել փետրվարից, ինչի հետ համաձայնեց նաև նախարարը: