Ձեր վստահելի աղբյուրը

«Դուք նկատել եք, որ իշխանությունները, հատկապես Նիկոլ Փաշինյանը ցանկացած քաղաքական ուժի, անհատի, որը փորձում է իրեն քննադատել, անմիջապես կապում է նախկինների հետ։ Նույնը եղավ իմ պարագայում, երբ հրաժարական տվեցի Ազգային անվտանգության ծառայության տնօրենի պաշտոնից»,-լրագրողների, համախոհների ու կուսակիցների հետ հանդիպմանը «Հայրենիք» կուսակցության Հրազդանի գրասենյակի բացումից հետ ասաց ԱԱԾ նախկին տնօրեն, «Հայրենիք» կուսակցության ղեկավար Արթուր Վանեցյանը։

Նրա խոսքով, իրականությունն այն է, որ իշխանությունները չունեն այլ եղանակ իրենց ապիկարությունն ու ապաշնորհությունը հիմնավորելու համար, ամեն ինչը գցում են նախկիների վրա, ամեն ինչի համար ման են գալիս մեղավորներ։

«Անգամ կորոնովիրուսի դեմ պայքրաի շրջանակում հասարակությունը բաժանում են երկու մասի, ասում են, կամ մի խումբ, որ ուզում են շութ հաղթահարել այս իրավիճակը, և կա խումբ, որ չի ցանկանում հաղթահարել։ Հիմա ես հարց եմ տալիս, կա՞ մեկ մարդ, որ չի ցանկանում հաղթահերլ այս իրավիճակը։ Իհարկե, չկա»,-ասաց նա՝ ընդգծելով, որ հասարակության մեջ առկա բաժանումները շարունակվում են։

Նա ընդգծեց՝ պետք է գիտակցել, կա մեկ հայրենիք, մեկ պետություն, ազգային մեկ շահ։

«Ինձ համար ամենակարևորը մեր պետության, պետական ու ժողովրդի շահն է։ Ես դուրս եմ եկել մի պաշտոնից, դիրքից, որ ունեի անսահմանփակ լիազորությունները, դրանք ավելի մեծացնելու տարբերակներ, բայց ես ասել եմ, թող իմ հրաժարականը լինի սթափեցնող քայլ։ Բայց տեսնում ենք, որ սթափեցնող չեղավ, ավելի վատ զարգացումներ եղան»,-նշեց նա։

Վանեցյանը հիշեցրեց, երբ հունվարին ինքը հայտարարեց Նիկոլ Փաշինյանի հրաժարականի անհրաժեշտության մասին, ծատերը զարմացան, բայց այսօր դրա մասին խոսում են բոլորը։

«Սա դարձել է մեր քաղաքացիների օրակարգային հարցերից մեկը։ Այդ օրակարգը պետք է ամրապնդվի, առաջ մղվի և դրա շուրջ պետք է լինի քաղաքական ուժերի համաձայնություն։ Պետք է լինի լայն կոնսոլիդացիա և պետք է նախանշենք մեր անելիքները։ Առաջիկայում մենք հասնելու ենք մեր պահանջին, որ Նիկոլ Փաշինյանը պետք է գնա, որովհետև նա ձախողվել է բոլոր ուղղություններով։ Կորոնավիրուսի դեմ պայքարը ցույց տվեց, որ իշխանությունները չեն կարողանում ճգնաժամային իրավիճակում կառավարել երկիրը»,-ասաց նա։