Ձեր վստահելի աղբյուրը

«2019 թվականին զգալիորեն աճել է ԵՄ-ի կողմից Հայաստանին տրամադրվող ֆինանսական աջակցությունը»,- խորհրդարանում այսօր հայտարարեց ՀՀ արտաքին գործերի նախարար Զոհրաբ Մնացականյանը։

Նրա խոսքով, վերջին շրջանում հատկապես գնահատելի է ԵՄ-ի կողմից ՀՀ-ին տրամարվող աջակցությունը՝ կորոնավիրուսի և դրա բերած սոցիալ-տնտեսական հետևանքների դեմ պայքարի ուղղությամբ։

Այս առնչությամբ, նախարարն առանձնացրեց ոչ միայն եվրոպական երկրների հետ հարաբերությունների զարգացման դինամիկան, այլ նաև Հայաստան-Հունաստան-Կիպրոս համագործակցության եռակողմ հարթակի ձևավորումը, որն արդեն իսկ գործնականում ի ցույց է դրել իր ներուժն ու կարողությունները։

Նախարարը տեղեկացրեց, որ ՀՀ-ին տրամադրվող օժանդակությունը 2019 թվականին շուրջ 40%-ով մեծացրել է նաև ԱՄՆ-ը։

«Մեզ համար շատ կարևոր է նաև մեր երկու անմիջական հարևանների՝ Վրաստանի և Իրանի հետ հարաբերությունների և համագործակցության զարգացումը։ Վերջինս նպաստվում է էներգետիկ և տրանսպորտային փոխկապակցվածության ընդլայմանն ու դիվերսիֆիկացմանը։ Այս համագործակցությունն առավել կարևորվում է կորոնավիրուսի դեմ պայքարի այս ժամանակաշրջանում՝ ի ցույց դնելով մարտահրավերների հասցեագրման գործում մեր փոխկապակցվածությունը»,- ներկայացրեց Զ. Մնացականյանը։

Նրա խոսքով, տարին ակտիվ է եղել նաև Ասիա-խաղաղօվկիանոսային տարածաշրջանի երկրների հետ բարձրաստիճան շփումների և բազմաբնույթ համագործակցությունների առումով.

«Հատկապես կարևոր է մեր համագործակցությունը Չինաստանի, Հնդկաստանի և Ճապոնիայի հետ։ Այս պետությունների հետ համագործակցության ոլորտում ունենք շոշափելի արդյունքներ»։

Ըստ նախարարի, Մերձավոր արևելքի երկրների հետ հարաբերությունների զարգացումը ևս ՀՀ-ի համար օրակարգային է։

Նրա խոսքով, այդ տարածաշրջանում տեղի ունեցող քաղաքական իրադարձությունները ՀՀ-ի հետաքրքրությունների շրջանում են։

«Մենք պաշտոնապես արձագանքել ենք Սիրիայի շուրջ ստեղծված իրավիճակին։ ԱԳՆ կողմից օրերս եղավ պաշտոնական հաղորդագրություն նաև Լիբիայում տեղի ունեցող իրավիճակի վերաբերյալ»,- շեշտեց ՀՀ ԱԳ նախարարը։

Հիշեցնենք, որ խորհրդարանը քննարկում է արտաքին հարաբերություններին ուղղված 2019 թվականի պետական բյուջեի կատարողականը։