Ձեր վստահելի աղբյուրը

Համավարակի հաղթահարումից հետո, և նույնիսկ դրանից առաջ, մենք քննության պետք է առնենք շատ քաղաքական ուժերի պահվածքը՝ քննելով , թե հանրայնորեն նրանց գործողությունները  որքանո՞վ են նպաստել երկրում համավարակի  կանխարգելմանը և որքանո՞վ են նպատասել համավարակի տարածմանը: Այս մասին պարետատան նիստից հետո ճեպազրույցի ընթացքում անդրադառնալով Լուսավոր Հայաստան խմբակցության հնչեցրած մեղադրանքներին, որ Կառավարությունը ձախողել է կորոնավիրուսի դեմ պայքարում, ասաց ՀՀ վարչապետ Նիկոլ Փաշինյանը:

«Իմաստ կունենա որոշակի քննություն ծավալել  հասկանալու համար, թե արդյոք որոշակի քաղաքական շրջանակներ կապ  ունեն որոշակի կեղծ լուրերի տարածման հետ : Ուզում եմ ասել, որ ցանկացած պատերազմական իրավիճակում, նույնիսկ ամենաժողովրդավար երկրներում, պատերազմի ժամանակ քայքայիչ գործողություն ծավալող անձիք և ուժերը արժանանում են համապատասխան գնահատականի: Եվ , որևէ մեկը չկասկածի, որ այն ուժերը, որոնց քայքայիչ գործունեությունը կլինի ապացուցելի,   արժանանալու են կոնկրետ վերաբերմունքի»,-ասաց վարչապետը:

Շարունակելով մեկնաբանել հարցը, թե որքանով է ձախողել Հայաստանի Կառավարությունը՝ կորոնավիրուսի դեմ պայքարում, Փաշինյանն ավելացրեց.

«Հայաստանի կառավարությունը կորոնավիրուսի դեմ պայքարում  պարտվել  է այնքան, որքան պարտվել է աշխարհը՝  ԱՄՆ-ն Ֆրանսիան, Բելգիան, Մեծ Բրիտանիան Գերմանիան Ռուսաստանը և աշխարհի բազմաթիվ զարգացած ու գերզարգացած երկրները: Եթե Հայաստանի հանրապետության կառավարությունը  պարտվել է  կորոնավիրուսի դեմ պայքարում, ուրեմն պարտվել է մարկությունն ու ընդհանրապես քաղաքակրթությունը»:

Փաշինյանի խոսքով՝քաղաքական ուժերը կորոնավիրուսով պայմանավորված իրավիճակում փորձում են  վերածնվել:

«Արդյոք այսօր Հայաստանը կորոնավիրուսի դեմ պայքարում ունի խնդիրներ, այո ունի, ճիշտ նույնքան, որքան ունեն աշխարհի բազմաթիվ երկրներ: Արդյոք   որոշ քաղաքական  ուժեր ունեն  խնդիրներ  կորոնավիրուսի ընթացիկ  իրավիճակում, կան ուժեր ,որոնք ոչ միայն պրոբլեմ չունեն, այլև կյանքը նրանց համար դարձել է ավելի լուսավոր կամ ավելի  բարգավաճ: Եվ նրանք այս վիրուսային իրավիճակում տեսնում են  վերածնվելու հնարավորություն»,- ասաց վարչապետը: