Ձեր վստահելի աղբյուրը

ՀՅԴ Լիբանանի Կենտրոնական կոմիտեի ներկայացուցիչ, պատգամավոր Հակոբ Բագրատունին երեկ լիբանանահայ լրագրող Նշան Տեր Հարությունյանի նկատմամբ հարձակումների, դրանից հետո  ստեղծված հակահայ մթնոլորտի հարցով հեռախոսազրույց է ունեցել Լիբանանի  ներքին գործերի նախարար Մոհամեդ Ֆահմիի հետ։ Այս մասին տեղեկանում ենք պատգամավորի ֆեյսբուքյան էջից։

Պատգամավորը նախարարին ասել է, որ սոցիալական ցանցերում տարածված տեսանյութը կրում է համայնքային սադրանքի հրահրման բնույթ և կոչ է արել պետական մարմիններին անմիջապես նման մթնոլորտի առաջն առնել։

Ներքին գործերի նախարարը խոստացել է անհրաժեշտ միջոցառումների դիմել և ձերբակալել տալ հակահայ հայտարարություններ կատարած անձին: Պատգամավոր Բագրատունին նմանօրինակ պահանջով դիմել է նաև Լիբանանի ընդհանուր դատախազին, ինչպես նաև ներքին անվտանգության ուժերին և բանակի գաղտնի սպասարկությանը:

Մյուս կողմից, կազմվում է արդեն հայ և արաբ փաստաբաններից բաղկացած խումբ, որը պետք է ստանձնի հակահայ հայտարարություններ կատարող անձանց նկատմամբ լիբանանյան դատական իշխանութիւններին համապատասխան տեղեկանքը ներկայացնելու պարտականությունը:

Հակոբ Բագրատունին երեկ նաև խոսել է լրագրող Նշան Տեր Հարությունյանի հետ և նրան տեղեկացրել այս հարցով ձեռնարկված քայլերի մասին՝ դատապարտելով սոցցանցերում վերջինիս նկատմամբ հարձակումները։

Նշենք, լրագրողը դարձել է սպառնալիքների թիրախ, երբ հաղորդման ժամանակ  քաղաքական գործիչ Ուիամ  Ուահապի հետ  հարցազրույցի ժամանակ խոսել էր նաև Թուրքիայի բացասական  դերի  մասին։