Ձեր վստահելի աղբյուրը

«Հանրային իրավունքի զարգացման և իրավական փորձաքննությունների բյուրո» ՀԿ համահիմնադիրներ Արթուր Ղամբարյանը և Թամար Շաքարյանը տարածել են համատեղ հայտարարություն «Իրավական ուղի» ՀԿ համահիմնադիր Ռուբեն Մելիքյանի վարչական ձերբակալման վերաբերյալ։

««Հավաքների ազատության մասին» ՀՀ օրենքի 2-րդ հոդվածի 1-ին մասի համաձայն` հավաքը երկու կամ ավելի անձանց խաղաղ և առանց զենքի ժամանակավոր ներկայությունն է որևէ վայրում` հանրային հետաքրքրություն ներկայացնող հարցերի շուրջ ընդհանուր կարծիք ձևավորելու կամ արտահայտելու մտադրությամբ: Իսկ 6-րդ հոդվածի 3-րդ մասի համաձայն` հավաքի մասնակից է այն անձը, որը հավաքի անցկացման ժամանակ գտնվում է հավաքի վայրում` հավաքին մասնակցելու նպատակով:
Փաստական հանգամանքների ուսումնասիրությունը թույլ է տալիս նշելու, որ իրավական տեսանկյունից առերևույթ բացակայում է հավաքի (երկու կամ ավելի անձանց...) անցկացման փաստը, հետևաբար այս պայմաններում նաև չի կարող լինել տվյալ հավաքի մասնակից, որին ներկայացվում է հավաքը դադարեցնելու պահանջ:

Ոստիկանության ծառայողի պահանջի օրինականության գնահատման համար անհրաժեշտ է այդ պահանջի համապատասխան իրավական հիմքերի և դրսևորված փաստացի վարքագծի համադրում. տվյալ դեպքում, եթե իրավասու մարմինը չհիմնավորի հավաքի անցկացման փաստը, ապա հավաքը դադարեցնելու պահանջը չի կարող լինել օրինական: Հետևաբար, ոչ օրինական պահանջին չենթարկվելու համար անձին ազատությունից զրկելը նույնպես կհամարվի ապօրինի:

«Հանրային իրավունքի զարգացման և իրավական փորձաքննությունների բյուրո» ՀԿ գտնում է, որ տվյալ իրավիճակում, այսինքն` հավաքի անցկացման փաստի առերևույթ բացակայության և ոստիկանության ծառայողի պահանջի օրինականության հիմնավորվածության համատեքստում անհրաժեշտ է անհապաղ ազատ արձակել ապօրինի ազատությունից զրկված Ռուբեն Մելիքյանին:

Միևնույն ժամանակ, դատախազությունը պետք է իրացնի սահմանադրությամբ և օրենքով վերջինիս վերապահված պատիժների և հարկադրանքի այլ միջոցների կիրառման օրինականության նկատմամբ հսկողության լիազորության շրջանակներում իրեն վերապահված` ազատությունից զրկվելու վայրում ապօրինի պահվող անձին անհապաղ ազատ արձակելու իրավունքը»,-ասված է հայտարարության մեջ։