Հիվանդանոցներից մարդիկ դուրս են գրվելու՝ հիվանդության ծանրության աստիճանի թեթևացումից հետո. Թորոսյան
«Դեռ վաղ է խոսել հիվանդության թվի անկման մասին, 612 նոր դեպք ունենք, որը ցածր թիվ չէ մեր նման երկրի համար»,- խորհրդարանում լրագրողների հետ զրույցում ասաց ՀՀ առողջպահության նախարար Արսեն Թորոսյանը։
Նրա խոսքով, կառավարության գործողությունները պետք է ինտենսիվորեն շարունակվեն՝ հենց թվերի զսպման ուղղությամբ, որովհետև միայն հզորությունների ուժեղացմամբ՝ նոր մահճակալների ներդրմամբ, սարքերի և բժիշկների ներգրավվմամբ հարցը չի կարող լուծվել։
«Հարցի լուծումը մեր բոլորի հավաքական վարքագծով թվերի զսպումն է։ Դա կարող է լինել նաև տարբեր տնտեսվարողների համար նոր կանոնների սահմանմամբ, գուցե և տնտեսության որոշ ոլորտների սահմանափակմամբ, թեև դրանից մենք փորձում ենք խուսափել։ Դրա համար պետք է կանոնների խիստ պահպանում լինի՝ սկսած դիմակ դնելու ձևից և վերջացրած մյուս միջոցառումներով՝ սոցիալական հեռավորություն, ձեռքերի ախտահանում, սենյակների օդափոխում։ Դա կբերի թվերի զսպման։ Մենք հիմա տեսնում ենք մեծ թվեր և լարվածություն է առաջանում, սակայն շատ դժվար է գնահատել, եթե վերջին օրերին դիմակ դնելու հետ կապված խստացումները չլինեին, էլի 600 դեպք կունենայի՞նք, թե՞, օրինակ՝ 800: Չեմ ուզում լավատեսական նոտաներ դնել, իրավիճակը պետք է կառավարենք, բայց ասել, որ միջոցառումները էֆեկտիվ չեն, չենք կարող»,- շեշտեց նախարարը։
Ըստ Ա. Թորոսյանի, նախնական գնահատականներով 15 հազար դեպքի մենք պետք է հասած լինեինք հունիսի 9-ին, բայց հասել ենք հունիսի 12-ին, ինչ շատ լավ է, բայց միևնույն է, դա մեծ թիվ է, որին պետք է անդրադառնալ զսպման ու իջեցման տեսանկյունից։
«Բացի այդ, հզրությունները մեծացնելուն զուգահեռ, մենք պետք է ծանր վիճակում գտնվող անձանց թվին մեծ ուշադրություն դարձնենք։ Այո, մենք կկարողանանք նոր ռեանիմացիոն մահճակալներ բացելուց հետո ևս 100-150 ծայրահեղ ծանր դեպք սպասարկել, բայց այդ դեպքերի մահացության տոկոսը շատ մեծ է, հետևաբար, ակամայից, մեծ թվերը բերում են մեծ մահացության։ Ուստի, միևնույն է, բոլոր գործողությունները պետք է ուղղված լինեն թվերի զսպմանը, ոչ թե միայն հզորությունների բարձրացմանը»,- նշեց նա։
Հարցին՝ արդյո՞ք այսօր խորը շերտավորում իրականացվում է, նախարարը պատասխանեց՝ ես սորտավորման մասին եմ խոսել, որը հենց սկզբից էլ իրականացվել է, երբ պացիենտի վիճակի գնահատականից հետո որոշվել է՝ ինչ բուժօգնություն պետք է նրան ցուցաբերվի։
«Տրիաժի սկզբունքներն այնպիսին են, որ թեթև և միջին ծանրության դեպքերը բուժում ստանալու են տանը, այո, նաև հիվանդանոցներից մարդիկ դուրս են գրվելու՝ հիվանդության ծանրության աստիճանի թեթևացումից հետո։ Եվ դա է մեր քաղաքականությունը։ Հիվանդները անհրաժեշտության դեպքում պետք է մնան տեղամասային թերապևտիկ բժշկի հսկողության տակ, իսկ եթե թեթև են, ոչ մի հսկողության կարիք չի լինելու։ Հսկողության վրա պետք է աշխատանեք, այդ ուղղությամբ պետք է աշխատեն նաև համայնքային պոլիկլինիկաները»,- վստահեցրեց Ա. Թորոսյանը։
Հարակից հրապարակումներ`
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
