Ձեր վստահելի աղբյուրը

Այսօր, Երևանի ավագանու Քաղաքաշինության և հողօգտագործման հարցերի ու Մշակույթի, կրթության և սոցիալական հարցերի մշտական հանձնաժողովների համատեղ արտահերթ նիստում քննարկվեց Երևանի 33-րդ (Ֆիրդուսի) թաղամասի կառուցապատման հարցը։

Մշակույթի, կրթության և սոցիալական հարցերի մշտական հանձնաժողովի նախագահ Սաթենիկ Մկրտչյանը նիստի բացմանը նշեց, որ Երևանի ավագանին որոշման կայացման կողմ չէ և լիազորություն չունի, բայց հանրային իրազեկման և մտքեր փոխանակելու համար կազմակերպել են նիստը, որից հետո հանձնաժողովները կհրապարակեն եզրակացություններ՝ ուղերձների տեսքով:

Նիստին ներկա են Երևանի քաղաքապետը, փոխվարչապետի օգնական Վարագ Սիսեռյանը, Քաղաքաշինության կոմիտեի նախագահի պաշտոնակատար Արմեն Ղուլարյանը, Երևանի գլխավոր ճարտարապետ Արթուր Մեսչյանը, ԿԳՄՍ փոխնախարար Նարինե Խաչատուրյանը /հեռակապով/, ինչպես նաև «Երևանի պաշտպանության կոմիտե» նախաձեռնության ներկայացուցիչներ և այլ հրավիրվածներ:

Վարագ Սիսեռյանը նկատեց, որ 33-րդ թաղամասի համար 2015 թվականին մշակվել է կառուցապատման հայեցակարգ, որը հաստատվել է ՀՀ քաղաքաշինության նախարարության և Երևանի քաղաքապետարանի կողմից: 2018 թվականին կառավարությունը վերահաստատել է տարածքի հանրային գերակահ շահ՝ նոր մոդելի համաձայն տարածքը բաժանելով 19 տարբեր լոտերի:

Ըստ բանախոսի, 2019 թվականին կնքվել է եռակողմ պայմանագիր ներդրողների կապալառուների և կառավարության միջև, որտեղ կառավարությունը երաշխավորություններ է տվել ներդրողներին, իսկ վերջիններս էլ ներկայացրել են բանկային երաշխիքներ, որպեսզի նախկինի նման սնանկության դեպքեր չլինեն:

Վարագ Սիսեռյանի խոսքով ներդրողներն արդեն վճարել են 70 մլն դոլար հողի ձեռքբերման համար և ստացել սեփականության վկայականներ: Բանախոսը նկատեց, որ նոր բաց մրցույթ չի հայտարարվել, քանի որ ծրագիրն արդեն մեկնարկած է եղել, ներդրողները գումարները փոխանցել էին և դրանցով հարյուրավոր բնակիչների բնակարանային հարց է լուծվել:

«2018 թվականից 100-ից ավելի բնակիչ ստացել են նոր հարդարված բնակարաններ, կամ դրամական փոխհատուցում՝ միջինը 1200-1300 ԱՄՆ դոլար քառակուսի մետրի դիմաց»,- հայտնեց փոխվարչապետի օգնականը և շեշտեց, որ մինչև 2018 թվականը այդ գումարը կազմում էր 600-700 դոլոր:

Ըստ Վարագ Սիսեռյանի, ծրագրով նաև Գինու կոմբինատի 331 ընտանիքի և Կոնդ թաղամասի 107 ընտանիքի բնակարանի տրամադրման հարցը է լուծվել:

Թաղամասի տարածքում առկա են 8 հուշարձան-շենքեր, որոնք, Սիսեռյանի հավաստիացմամբ,  փոխվարչապետի որոշմամբ արդեն դուրս են բերվել ծրագրից և մեկ ամսվա ընթացքում էլ կառավարության որոշմամբ դուրս կհանվեն գերակա շահ համարվող գույքերի ցանկից:

Սիսեռյանը հայտնեց, որ հայտնի աղյուսաշեն շենքը երբևէ չի եղել հուշարձանների շարքում, բայց այդ շենքի քարերը կհամարակալվեն և կպահպանվեն շենքերի ֆասադներից մեկում, նույնը կարվի նաև Ֆիրդուսի 80 շենքի հետ: Իր խոսքի վերջում փոխվարչապետի օգնականը հավաստիացրեց, որ նախագծի քննարկման ժամանակ եղել է միայն մեկ բացասական կարծիք:

Քաղաքաշինության կոմիտեի նախագահի պաշտոնակատար Արմեն Ղուլարյանը ներկայացրեց թաղամասի պատմությունը և շեշտեց, որ կառուցապատման արդյունքում տեղում կստեղծվեն խաղահրապարակներ, ջրային մակերեսներ, կանաչ գոտիներ և տեղաշարժման խնդիր ունեցող մարդկանց համար կարգավորումներ:

Ղուլարյանի խոսքով՝ նախագծի վերաբերյալ որևէ քննադատություն ՀԿ-ների կողմից չի լսել:

ԿԳՍՄ փոխնախարար Նարինե Խաչատուրյան հեռակապով միանալով նիստին, չհամաձայնեց Վարագ Սիսեռյանի հետ և տեղեկացրեց, որ տարածքում կա 9 հուշարձան, իսկ թիվ 80 շենքը նույնպես կներառեն հուշարձանների ցանկում:

Հիշեցնելով, որ Սիսեռյանն իր խոսքում խոսեց քննարկումների ժամանակ ծրագրի վերաբերյալ հայտնած մեկ անհամաձայնության մասին, փոխնախարարն էլ նկատեց, որ ինքը երկու անգամ իր անհամաձայնությունն է արտահայտել այդ քննարկումների ժամանակ:

«Որպես հուշարձանների պաշտպանության համար պատասխանատու գերատեսչություն պետք է ժամանակին ստացած լինեինք նախագիծը, որը չենք ստացել»,- հայտնեց Նարինե Խաչատուրյանը և հավելեց, որ նախագծի վերաբերյալ 2019 թվականին ստացել են ընդամենը մեկ գրություն Շրջակա միջավայրի նախարարությունից՝ 46 շենքի հետ կապված ազդեցության գնահատման խնդրի վերաբերյալ։ 

Ըստ նրա, տվել են բացասական կարծիք՝ տարածքի ինտենսիվ կառուցապատման հիմքով:

Փոխնախարարը նկատեց, որ երկու իրար հակասող փաստաթուղթ կա Երևանի կառուցապատման հետ կապված՝ գոտիավորման հիմնավորումը և հատակագիծը: Վերջինս պետք է բխի գոտիավորման հիննավորումից, ինչը չի արվում: