Ձեր վստահելի աղբյուրը

ԲՀԿ մամուլի խոսնակ Իվետա Տոնոյանը լրագրողներին հայտնեց, որ ԲՀԿ առաջնորդ Գագիկ Ծառուկյանի հարցաքննությունն ԱԱԾ-ում շարունակվում է, արդեն չորս ժամ ներսում է։ 

Նա նշեց, որ այս ընթացքում պարբերաբար բերման են ենթարկում հասարակ քաղաքացիների, ավագանու անդամների, անգամ պատգամավորների են փորձել բերման ենթարկել։

«Պատգամավորների նկատմամբ կոնկրետ անհամաչափ ուժ է կիրառվել, գոնե սոլիդարնությունից  ելնելով իշխանական խմբակցության որևէ ներկայացուցիչ որևէ կերպ չի արձագանքել այս ամեն ինչին։ Բումերանգի էֆեկտն աշխատելու հատկություն ունի, որևէ մեկը թող այսօրվա իրադարձություններից  չուրախանա, երբ որ իրենց գործընկերներին քարշ են տալիս Խանջյան փողոցով ասֆալտի վրայով, որևէ մեկը ծպտուն չի հանում, որովհետև թքած ունեն, թե ինչ է տեղի ունենում ընդդիմադիրների հետ»,- ասաց Իվետա Տոնոյանը։

Նա նշեց, որ բոլոր այն բիզնեսները, որտեղ Գագիկ Ծառուկյանն ունի բաժնեմաս, հավատարմագրային կառավարման են հանձնված, անձամբ չի զբաղվում ոչ ֆինանսական հարցերով, ոչ մենեջմենթով։

«Իշխանությունը որևէ դեպքում չի կարողանալու իր ձեռքի տակ եղած գործիքներով ճնշել ընդդիմության ձայնը, չի ստացվելու»,- ասաց Ի.Տոնոյանը։