Ձեր վստահելի աղբյուրը

«Կան իրավական գործընթացներ, և դրանց նկատմամբ կա քաղաքական միջամտություն ու ազդեցություն»,- խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով երեկ ԱԱԾ կողմից Գագիկ Ծառուկյանի Առինջի տանն իրականացված խուզարկությանը և դրան հարջորդած բողոքի ցույցերին։

Նրա խոսքով, իշխանության կողմից իրավական գործընթացներ են սկսվում, երբ ընդդիմախոսները սուր քննադատություններ են անում, այսինքն՝ ժամանակագրական տեսանկյունից տեսանելի և ակնառու է գործողությունների հաջորդականությունը։

«Մենք տեսնում ենք, որ պաշտոնյաների կողմից բարձր մակարդակով տարածվում են նախաքննության գաղտնիք պարունակող փաստաթղթեր։ Մենք տեսնում ենք նաև, որ բարձրաստիճան պաշտոնյաները արդեն որոշում են՝ անձը մեղավոր է, թե անմեղ, և սոցցանցերում դատավճիռ են իրականացնում։ Այս ամենը ցույց է տալիս, որ կա քաղաքական միջամտություն իրավական գործընթացներին։ Մենք չենք ասում, որ որևէ մեկը չպիտի ենթարկվի պատասխանատվության, այո, բոլոր նրանք, ովքեր հանցանք են կատարել պետության նկատմամբ, պիտի կրեն պատասխանատվություն, բայց այն, ինչ կատարվում է այսօր՝ նպատակահարմարության միտմամբ է արվում։ Այսինքն՝ երբ անհրաժեշտություն է առաջանում, այդ ժամանակ է իշխանությունը սկսում իրավական գործընթացներ իրականացնել, որոնք չգիտես ինչու, համընկնում են այն ժամանակաշրջանի հետ, երբ քաղաքական ուժը քննադատում է իշխանությանը»,- ասաց Ա. Սամսոնյանը։

Ըստ պատգամավորի, եթե իշխանությունները պնդում են, որ այն եղանակներն ու մեթոդները, որոնք օգտագործում է ոստիկանությունը, իրավաչափ են, նշանակում է՝ նախկինների ոստիկանությունը ճիշտ էր աշխատում։

Նա նշեց, որ ոստիկանությունն անհամաչափ ուժ է կիրառում, ինչը խնդիր է.
«Ոստիկանությունում բարեփոխումներ ոչ միայն չեն կատարվում, այլ նաև իշխանության կողմից խրախուսվում են ոստիկանության կիրառած ոչ իրավաչափ մեթոդները, ինչը ծիծաղելի է։ Դուք տեսե՞լ եք՝ ինչպես էին քարշ տալիս ընդդիմադիր կին պատգամավորներին։ Իսկ իշխանական կին պատգամավորները ոչ մի հարթակ բաց չեն թողնում՝ նշելու, որ կանանց իրավունքները պետք է պաշտպանվեն»։

Պատգամավորի խոսքով, այն մեթոդները, որոնք իշխանությունը գործադրում է կին ընդդիմախոսների նկատմամբ, խոսում է իշխանության երեսպաշտության մասին։

Դիտարկմանը, որ երեկ անցկացված հավաքների առնչությամբ քրեական գործ է հարուցվել, այն հիմքով, որ արտակարգ դրության պայմաններում կազմակերպված և ուղղորդված հավաք է եղել, Ա. Սամսոնյանն արձագանքեց՝ եթե այդպես է, թող ապացուցեն, որ հավաքներն ուղղորդված են եղել, և մեղավորները պատժվեն։

«Իսկ ընդհանուր առմամբ, հավաք լինելու համար պետք է լինի նաև ընթացակարգ, որը երեկ չի եղել։ Իսկ ակցիա անելն արգելված չէ, և առհասարակ, հավաքները բացարձակ չեն կարող  սահմանափակվել, քանի որ դրանք կազմակերպելը մարդու հիմնարար իրավունքներից է։ Ի՞նչ կապ ունի՝ 5 հոգով իրազեկման ակցիա են անում, թե բողոքի ձայն բարձրացնում»,- ասաց պատգամավորը։

Հարցին, թե հնարավո՞ր է «Լուսավոր Հայաստան» խմբակցությունը քննարկումներ սկսի «Բարգավաճ Հայաստան» խմբակցության հետ, Ա. Սամսոնյանը պատասխանեց՝ իրենք դեռևս նման հարց չեն քննարկել։