Ձեր վստահելի աղբյուրը

«Չեխիայից առայժմ չենք ունեցել ռեադմիսիայի (հետընդունման)  հայցեր, որը չի նշանակում, որ այդ գործընթացը չպետք է կանոնակարգենք»-ԱԺ արտաքին հարաբերությունների մշտական հանձնաժողովի նիստում հայտնեց ՀՀ տարածքային կառավարման և ենթակառուցվածքների նախարարության միգրացիոն ծառայության պետ Արմեն Ղազարյանը՝ ներկայացնելով ՀՀ Կառավարության և Չեխիայի Հանրապետության Կառավարության միջև «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման (ռեադմիսիա) մասին» համաձայնագիրը:

Ծառայության պետը հայտնեց, որ 2019 թվականի նոյեմբերի 8-ին  Չեխիայի հանրապետությունից ստացվել է ծանուցում արձանագրության ուժի մեջ մտնելու վերաբերյալ ներպետական ընթացակարգերի կատարման մասին և հիմա Հայաստանի պատասխան քայլի հերթն է:

Հանձնաժողովի անդամներին տեղեկացվեց, որ կառավարությունն այս տարվա փետրվարի 20-ին համաձայնություն է տվել արձանագրության վավերացմանը, իսկ մայիսի 19-ին էլ Սահմանադրական դատարանն այն ճանաչել է սահմանադրական:

Արմեն Ղազարյանի խոսքով, Հայաստանի և ԵՄ միջև  առանց  թուլտվության  բնակվող  անձանց   հետընդունման (ռեադմիսիայի) մասին  համաձայնագիրը  ստորագրվել է  2013թ.-ի ապրիլի 19-ին, և  ուժի մեջ է մտել 2014թ. հունվարի 1-ից: Համաձայնագրի նպատակն է փոխադարձության հիման վրա ստեղծել արագ և արդյունավետ ընթացակարգեր այն անձանց հայտնաբերման և անվտանգ ու կանոնակարգված վերադարձի համար, որոնք չեն բավարարում կամ այլևս չեն բավարարում, Հայաստանի կամ Եվրոպական միության անդամ պետություններից մեկի տարածք մուտք գործելու, այնտեղ գտնվելու, կամ բնակվելու համար պահանջներին և դյուրացնելու այդպիսի անձանց տարանցումը:

ԵՄ-ի հետ մայր համաձայնագրի սրորագրումից հետո Հայաստանն առանձին արձանագրություններ է ընդունում այլ երկրների հետ: Ծառայության պետի տեղեկացմամբ Ֆրանսիայի և Էստոնիայի հետ կա արդեն ուժի մեջ մտած արձանագրություններ, առաջիկայում նման փաստատթուղթ կներկայացվի Բուլղարիայի, Բենիլյուքսի երեք երկրների և Գերմանիայի հետ:

Արձանագրությամբ սահմանվում է հետընդունման գործառույթ իրականացնող իրավասու մարմինը, սահմանային անցակետերին և կոնտակտային անձանց վերաբերյալ տեղեկությունների փոխանակումը, ուղեկցությամբ վերադարձի պայմանները` ներառյալ երրորդ երկրի քաղաքացիների և քաղաքացիություն չունեցող անձանց ուղեկցությամբ տարանցումը, հետընդունման ձևերը` արագացված ընթացակարգերի ներքո:

Ըստ Արմեն Ղազարյանի, արձանագրությունն ուժի մեջ կմտնի ԵՄ հետընդունման հարցերի համատեղ կոմիտեին անհրաժեշտ ներքին ընթացակարգերի ավարտման մասին կողմերի ծանուցումից հետո երկրորդ ամսվա առաջին օրը:

Արձանագրության վավերացումը կապահովի Հայաստանի Հանրապետության Կառավարության և Չեխիայի Հանրապետության Կառավարության միջև կնքված Համաձայնագրի շրջանակներում չեխական կողմից ներկայացրած հետընդունման հայցերին պատշաճ կարգով և սահմանված ժամկետներում պատասխանելու հնարավորությունը:

Հանձնաժողովը դրական կարծիք տվեց 2019թ.-ի հոկտեմբերի 21-ին ստորագրված Հայաստանի Հանրապետության Կառավարության և Չեխիայի Հանրապետության Կառավարության միջև «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման (ռեադմիսիա) մասին» համաձայնագիրը կիրարկող արձանագրության վավերացմանը: