Ձեր վստահելի աղբյուրը

«Պետության համար հիմնաքարային առումով շատ ծանր արարք է մեղսագրվում մի մարդու, ով կուսակցության ղեկավար է»,- խորհրդարանում ասաց ԱԺ նախագահ Արարատ Միրզոյանը՝ անդրադառնալով ԲՀԿ ղեկավար Գագիկ Ծառուկյանին անձեռնմխելիությունից զրկելու հարցին։

Նրա խոսքով, շատ հեշտ է ընկնել ծուղակը և քաղաքականացնել իրավական գործընթացը։ Ա. Միրզոյանն առաջարկում է տարանջատել հարցի քաղաքական և իրավական հատվածները։

«Անշուշտ, Գագիկ Ծառուկյան քաղաքական գործչի մասին յուրաքանչյուրս ունի իր գնահատականները, որոնք այս փուլում տալուց առնվազն զերծ պետք է մնալ, և հուսամ, այն կընդունեն մեր իմքայլական գործընկերները, որպեսզի որևէ մեկնաբանություն, որևէ պահի չդիտարկվի որպես իրավական համակարգի քաղաքական ուղղորդում, կամ անմեղության կանխավարկածի ոտնահարում։ Այնուհանդերձ, ինչ-որ քաղաքական բաների մասին պետք է խոսել»,- նշեց ԱԺ նախագահը։

Ըստ նրա, շատ հեշտ է հանդես գալ կառավարության հրաժարականի պահանջով, երբ տեղյակ ես, որ վաղուց հարուցված են իրավական գործընթացներ, որոնք կարող են հանգեցնել քո այս կամ այն կերպ մասնակցությանը՝ օրենքով արգելված որևէ արարքի։

«Բայց ականջահաճո՞ է մեր համար, որ որևէ մեկը պահանջում է կառավարության հրաժարականը, ոչ։ Բայց դրա իրավունքն ունեն ՀՀ բոլոր քաղաքացիները, մենք պայքարել ենք նրա համար, որ ՀՀ-ում լինի ժողովրդավարություն, և որևէ մեկը հետապնդվելուց չվախենալով չսահմանափակվի,  և կարողանա պահանջել կառավարության հրաժարականը։ Սա մեր հավատամքն է, և շատ լավ է, որ կարողանում են կառավարության հրաժարականը պահանջել տարբեր քաղաքական ուժերի ղեկավարներ»,- ասաց նա։

Արարատ Միրզոյանը նշեց նաև, որ իրենք լիահույս են՝ քննությունը կհանգեցնի նրան, որ կպարզվի Գագիկ Ծառուկյանը չունի մեղք իրեն մեղսագրվող արարքում, և այդպիսի զարգացման դեպքում իրենք իրենց պատգամավոր գործընկերոջը հետ կընդունեն խորհրդարանում։

«Բայց եթե պարզվեց, որ դա այդպես չի, ապա բոլոր քաղաքացիները պետք է կրեն այն պատասխանատվությունը, որը սահմանում է օրենքը։ Եվ պետք է քաղաքական մասը անջատել իրավական մասին։ Իսկ իրավական առումով չեմ կարող շատ բան ասել։ Ու հարցը պետք է թողնենք դատախազին ու փաստաբաններին։ Որևէ մեկը մյուսին ոչնչով թող չսպառնա, ամեն ինչ պետք է արվի ՀՀ օրենքներին ու Սահմանադրությանը համապատասխան։ Եվ տեղեկացնեմ, որ պարոն Ծառուկյանը իր կամքին հակառակ չի տարվել ԱԱԾ, նա ազատությունից չի զրկվել և չի կարող զրկվել քանի դեռ համաձայնություն չենք տվել»,- եզրափակեց խոսքը Արարատ Միրզոյանը։

«ԱԺ նախագահը կխորհրդակցի իրավաբանների հետ և պետաիրավական հանձնաժողովի  հետ կորոշի, թե արդյոք հնարավոր է երկարացնել նիստը, եթե լինի դրա հնարավորությունը»,-ԱԺ սրահում, պատասխանելով քվեարկության ժամկետի մասին լրագրողների հարցերին, հայտարարեց «Իմ քայլը» խմբակցության ղեկավար Լիլիթ Մակունցը:

Պատգամավորը հայտնեց, որ «Իմ քայլը» խմբակցությունը նախորդ օրվա նիստին որոշում է կայացրել, ուսումնասիրելով Դատախազության կողմից ներկայացված միջնորդությունը, ինչպես նաև հետևելով դատախազի ելույթին, պատգամավորներին հնարավորություն տալ իրենց խղճի և մտքի համոզմունքով փակ քվեարկության ժամանակ արտահայտել սեփական կարծիքը։

Լիլիթ Մակունցը հայտնեց, որ Սասուն Միքայելյանը ներկա չի լինի քվերակությանը և նախորդ քառօրյային էլ ներկա չի եղել, որովհետև առողջական խնդիրներ ունի։

«Անկախ նրանից, թե քանի խմբակցություն է մասնակցում քվեարկությանը, ԱԺ է բերվել Դատախազության միջնորդություն, որով ԱԺ պատգամավորները պետք է հայտնեն իրենց դիրքորոշումն այն մասին՝ արդյոք ԱԺ-ն համաձա՞յն է, որպեսզի իրավապահ մարմիններին հնարավորություն տրվի լիարժեք քննություն իրականացնել, թե՞ ոչ»,- անդրադառնալով ԲՀԿ առաջնորդ Գագիկ Ծառուկյանին անձեռնմխելիությունից զրկելու հարցին՝ նշեց  «Իմ քայլը» խմբակցության ղեկավարը։

Լրագրողները Մակունցին հայտնեցին, որ Ծառուկյանին ԱԺ-ի բակում ԱԱԾ աշխատակիցներ էին սպասում, այն դեպքում երբ Ծառուկյանը հայտնեց, որ ինքնակամ գնում է հարցաքննության, Մակունցն ասաց, որ Գագիկ Ծառուկյանն ինքն է հայտարարել, որ գնում է ԱԱԾ՝ նպաստելու գործի քննությանը, իսկ թե ովքեր են եղել ԱԺ-ի տարածքում, ինքը տեղյակ չէ։

Պատասխանելով հարցին,  թե ի՞նչ տարբերություններ կան, ԲՀԿ առաջնորդի և այն ժամանակ Նիկոլ Փաշինյանի անձեռնխելիությունից զրկելու գործընթացների միջև, պատգամավորն ասաց, որ եթե դիտարկում են իրավական, քաղաքական հարթության մեջ, ապա հնարավոր չէ պատասխանել։
«Տարբերվում են այնքանով, որ իրավական և քաղաքական պրոցեսներն իրարից անջատ են և որևիցե մեկը չի կարող ազդեցություն ունենալ իրավական գործընթացների վրա»,-հայտնեց Լիլիթ Մակունցը։