Ձեր վստահելի աղբյուրը

«Այսօր մեր երկրում տիրում է մեղմ ասած քաոս՝ սկսած  կառավարումից մինչև արհեստական գործերի ստեղծում, քրեական հետապնդումներ։ Մեր երկրում դժվարությունների, դժգոհությունների ու դրա հետևանքների առաջին պատասխանատուն իշխող քաղաքական ուժն է»,- ԱԺ-ում հայտարարեց «Բարգավաճ Հայաստան» խմբակցության անդամ Կարինե Պողոսյանը։

Պատգամավորը նկատեց՝ արդյունքում ունենք այն, ինչ ունենք. ներքաղաքական կյանքում երկփեղկված հասարակություն, թշնամանքով ու ատելությամբ լցված մթնոլորտ, տնտեսական-սոցիալական և այլ բազում խնդիրներ, իսկ այսօրվա իրավիճակն ավելի է խորացնում առկա ճգնաժամը։

«Հարգելի գործընկերներ, անկեղծ ասած ես երեկ համոզվեցի, որ մենք ժողովրդավարություն ասածի հետ լուրջ խնդիրներ ունենք այս երկրում։ Կարելի՞ է ժողովրդավար համարել այն երկիրը, որտեղ ոստիկանները ուժ են գործադրում ԱԺ պատգամավորների նկատմամբ, կին պատգամավորներին ասֆալտին քաշ տալիս, դրա հետևանքները մինչև հիմա էլ ինձ վրա են։ Այս ամենը ինչի՞ համար»,- ասաց նա։

Պատգամավորը հիշեցրեց, կիրակի իրենք դուրս էին եկել աջակցելու  ԲՀԿ առաջնորդ Գագիկ Ծառուկյանին։

«Ի՞նչ է ստացում, որ Հայաստանի հպարտ քաղաքացին իրավունք չունի աջակցել պարոն Ծառուկյանին, ոչ միայն քաղաքացին, այլև նրա կուսակցության պատգամավորները, քանի որ բերման են ենթարկվում, քանի որ տեղի է ունենում քաղաքական տեռոր»,- ասաց նա։

Պողոսյանի խոսքով, այն, ինչ տեղի է ունենում, չի կարելի իրավական համարել։ Նա հորդորեց գլխավոր դատախազին ու «Իմ քայլ»-ի պատգամավորներին զերծ մնալ անօրինականություններից, քանի որ ինչքան էլ կոսմետիկ վերանորոգում արվի, պատերն ու հիմքը փտած են, իսկ փլուզումն անխուսափելի։