Ձեր վստահելի աղբյուրը

«Առավոտյան, երբ ես տանն էի, ինձ զանգեց մի մարդ, ով շատ բարեկիրթ ձևով ասաց, որ իմ աշխատասենյակի դիմաց են, որոշում կա խուզարկություն իրականացնելու, բայց դուռը փակ է, և իրենք ստիպված են լինելու դուռը ջարդել»,- խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը, որն առավոտյան հայտնել էր, թե իր աշխատասենյակը խուզարկելու որոշում կա։

Պատգամավորը նշեց, որ ինքն ասել է՝ գալիս է ԱԺ, սպասեն, կհասնի, դուռը ջարդելու անհրաժեշտություն չկա։

«Իմ միակ աշխատասենյակը խորհրդարանում է, կուսակցության գրասենյակի աշխատասենյակում ես չեմ եղել մի քանի տարի, որովհետև այն տրամադրված է մեր երիտթևին։ Եվ երբ իմ ֆեյսբուքյան էջում հայտարարություն տեղադրեցի և դիմեցի իրավապաշտպաններին, ու իմ փաստաբաններն արդեն գալու էին այստեղ, իրենք հայտարարություն տարածեցին, որ ես սխալ եմ հասկացել, իրենք մտադիր են խուզարկելու Հանրապետության 47 հասցեում գտնվող ԲՀԿ գրասենյակի իմ աշխատասենյակը»,- տեղեկացրեց պատգամավորը։

Նա նշեց, որ քիչ առաջ զրուցել է քննիչի հետ, և նա ասել է՝ իրենք ԲՀԿ գրասենյակի դիմաց են, և այդտեղ գտնվող իր աշխատասենյակում պետք է իրականացնեն խուզարկություն.

«Ասել եմ՝ բարի խուզարկություն, ես չեմ գալու, իմ փաստաբանները խուզարկության ողջ ընթացքում կլինեն Հանրապետություն 47 հասցեում գտնվող ԲՀԿ գրասենյակի իմ աշխատասենյակում։ Նորից դիմում եմ ՀՀ-ում հավատարմագրված միջազգային բոլոր կազմակերպություններին և դեսպաններին՝ սա քաղաքական բեսպրեդել է։ Սա քաղաքական հաշվեհարդար է, միջազգային կառույցնե՛ր, հույս ունեմ, որ ձեր լռությունը երկար չի տևի։ Իսկ ինձ լռեցնել հնարավոր չէ, մտածել, որ Նաիրա Զոհրաբյանի նկատմամբ կարելի է հարուցել ինչ-որ գործեր, ֆուտուրիստական սյուռեալիզմ է»,- ընդգծեց նա։