Ձեր վստահելի աղբյուրը

«Նույն դատախազը, որը ժամանակին ուզում էր Նիկոլ Փաշինյանին զրկել  պատգամավորական անձեռնմխելիությունից՝ կատարելով նախորդ իշխանության պատվերը, հիմա էլ կատարում է այս իշխանության պատվերը՝ զրկելով Գագիկ Ծառուկյանին պատգամավորական անձեռնմխելիությունից»,- ԱԱԾ դիմաց լրագրողների հետ զրույցում ասաց ԲՀԿ խմբակցության անդամ Նաիրա Զոհրաբյանը։

Նրա գնահատմամբ, տեղի ունեցածը միանշանակ քաղաքական է, իրավական գործընթաց  այստեղ ընդհանրապես չկա. «Առաջին պահից այս ամենը եղել է քաղաքական հետապնդում, քաղաքական վենդետա, քաղաքական հաշվեհարդար»։

Այնուհետև նա իր խոսքը կտրեց՝ դիմելով ոստիկաններից մեկին. «Հարգարաժ ոստիկան, մոտ եկեք, մոտից նկարեք, կարող է ձայնս վատ լսվի, հետո պետք է  ձեր մանուկ ԱԱԾ-ին  զեկուցեք, պրեմիայից ձեզ չզրկեն»։

Շարունակելով իր խոսքը՝ Ն. Զոհրաբյանն ասաց. «Սա շատ վատ տեղ է տանելու երկիրը,  որովհետև Հայաստանը բռնապետության ռեսուրս չունի, 21-րդ դարում ենք ապրում, որևէ մի իշխանություն չի կարող Հայաստանը բլոկադայի ենթարկել ու հավերժ երկարացնել արտակարգ դրության ռեժիմը, արգելել մարդկանց  ազատ ցույց անել։ Կարծում եմ՝ կարճ ժամանակից ավարտվելու է»։

Նա նշեց, որ իր հորդորն էր գլխավոր դատախազ Արթուր Դավթյանին չդնել իր մասնագիտական և բարոյական վերջակետը խորհրդարանում, ինչը, ցավոք, այսօր արեց։

Ն. Զոհրաբյանն ասաց, որ գլխավոր դատախազը որևէ  փաստ չներկայացրեց, որ Գագիկ Ծառուկյանը գումար է տվել որևէ մեկին, իսկ թղթի վրա գրելը փաստ չէ, փաստաթուղթ չէ։

«Ծիծաղելի է, շատ ցավում եմ, երբ որ երկիրը գնում է ռեպրեսիաների ճանապարհով,  այդ ամեն ինչը կարճ  ավարտ է ունենալու։ Ցավում եմ, որ  հեղափոխությունը շատ տխուր վախճան է ունենում։ Անկեղծորեն դա չէի  ցանկանա։ Մենք բոլորս մեծ ոգևորությամբ միացանք այդ ամենին, ողջունեցինք բարեփոխումները, ցավոք սրտի, այսօր միայն տեսնում են ռեպրեսիա, սուտ, համատարած ձախողում բոլոր ոլորտներում»։

Հարցին՝  փոշմանե՞լ եք, որ Նիկոլ Փաշինյանի օգտին եք քվեարկել, ԲՀԿ-ական գործիչն ասաց. «Անկեղծ ասած, չեմ էլ ցանկանում դրան անդրադառնալ, ինչ եղել, եղել է, ունենք այսպիսի իրավիճակ։  Արդեն մի քանի քաղաքական  ուժեր համատեղ հայտարարություն են տարածել ստեղծված անընդունելի իրավիճակի հետ կապված, հիմա պետք է գնա քաղաքական առողջ ուժերի  կոնսոլիդացիա, մենք մեր երկրում վերջապես պետք է ունենանք օրենքի իշխանություն»։

Ինչ վերաբերում է ԱԱԾ այսօրվա հաղորդագրությանը, որտեղ նաև իր անունն էր նշված, նա ասաց, որ ծիծաղելի է այդ ամենը, ենթադրում է, որ կոնտեքստից դուրս է ներկայացվել։

«Քրեական գործ հարուցելու դիմումն արդեն փոխանցել եմ գլխավոր դատախազին։ Ես չգիտեմ՝ ինչ կոնտեքստում է ասվել, կարող է ասել եմ՝ այս ժողովուրդն  ընտրակաշառք էր փաստորեն ակնկալում մեզանից,  ժողովուրդ ջան չենք տվել, դրա համար քիչ ձայն եք տվել»։  Նայելով այդ տեքստը, ենթադրում եմ այդ կոնտեքստն է եղել։

Այնքան ծիծաղելի է, ժողովուրդ, որ չգիտես, կարդում ես, ասում ես լավ՝ մինչև ուր   կարող է մասնագիտական ու  մարդկային դիլետանտիզմն ու բարոյականությունը հասնել։
Կամ՝ ժողովրդին ասել եմ աղանդավորականներ...  հիմա թվարկե՞մ  մեր հարգարժան  վարչապետի լեքսիկոնը,  թե ինչ է ասել ժողովորի տարբեր սեգմենտներին»։

Հարցին՝ Գագիկ Ծառուկյանին երբ հարցրեցին, եթե կալանավորվեք, ի՞նչ է լինելու, ասաց՝ կազկոմիտեն դրսում է, աշխատում է, ովքե՞ր են կազկոմիտեն, Ն. Զոհրաբյանն ասաց, որ կազմկոմիտեում կլինեն տարբեր քաղաքական ուժերի ներկայացուցիչներ։ Նա նշեց, որ իրենցից յուրաքանչյուրն իրենց անելիքը գիտի։

«Այս պահին չեմ ուզում  հրապարակել մեր կուսակցական և այլ կուսակցությունների հետ քննարկումների բովանդակությունը։ Հանգիստ եղեք, շարժումը շարունակվելու է, ում էլ մեզանից ձերբակալեն, պատրաստ ենք։ Ինձ արդեն դիմել են եվրոպական շատ լուրջ փաստաբաններ, իրավապաշտպաներ, առաջարկել են առանց որևէ վճարի ստանձնել իմ պաշտպանությունը, եթե որևէ մեկը կփորձի իմ նկատմամբ   նման ֆուտուրիստական իրավական իդեաներ ունենալ, բայց ոչնչից չեմ վախենում»,- ասաց նա։

Պատասխանելով հարցին, հնարավոր համարո՞ւմ եք, որ Գագիկ Ծառուկյանը նորից հայտարարի, որ հեռանում է քաղաքականությունից, Ն Զոհրաբյանը պատասխանեց, որ հնարավոր չէ, մնալու է քաղաքականության մեջ, այս փորձությունները քաղաքական գործիչների համար է. «Հարցնեք՝ ինչո՞ւ այս անգամ հնարավոր չեք համարում, կասեմ՝ հարցի պատասխանը գիտեմ, բայց այս պահին հարցի պատասխանը չեմ կարող եմ ասել»։

Նրա խոսքով, այս ամենի վերջը լինելու է մեր երկրում իրավունքի իշխանություն հաստատելը։