Դիտավորությա՞մբ եք ինֆորմացիայի արտահոսք կազմակերպել. Թանդիլյանը՝ դատախազին
«Խուզարկությունների շրջանակում միայն 2017 թվականի ընտրություններին վերաբերող ընտրակաշառքի նյութե՞ր եք գտել, և միայն ա՞յս քաղաքական ուժի մասո՞վ եք ընտրակաշառքի փաստերի տիրապետում»,- խորհրդարանում նման հարց հնչեցրեց ԱԺ «Լուսավոր Հայաստան» խմբակցության պատգամավոր Մանե Թանդիլյանը՝ դիմելով ՀՀ գլխավոր դատախազ Արթուր Դավթյանին։
Հիշեցնենք, որ գլխավոր դատախազը խորհրդարանին է ներկայացրել ԱԺ «Բարգավաճ Հայաստան» խմբակցության ղեկավար Գագիկ Ծառուկյանին անձեռնխելիությունից զրկելու, նրա նկատմամբ քրեական հետապնդում հարուցելու և նրան որպես մեղադրյալ ներգրավելու միջնորդությունը։
Պատգամավորը հետաքրքրվեց նաև՝ ինչպե՞ս են նախաքննական գաղտնիք պարունակող փաստաթղթերը հայտնվել իշխող քաղաքական ուժի պատգամավորների և նախարարների ֆեյսբուքյան էջերի պատերին. «Կարծեք թե այդ թղթերը թափված էր մի տեղ, նրանք հավաքել, տեղադրել էին։ Ինչպե՞ս է ստացվում, որ ձեր փաստաթղթերը հայտնվում են տարբեր մարդկանց անձնական տիրույթներում։ Եվ սա առաջին դեպքը չէ»։
Պատասխանելով Մ. Թանդիլյանի հարցին՝ Ա. Դավթյանը նշեց, որ իրենք չենք փնտրում որևէ քաղաքական ուժի վերաբերյալ փաստաթղթեր։
«Քրեական գործերը երթադրում են քրեադատավարական գործողություններ, և երբ այդ գործողությունների ընթացքում ձեռք են բերվում այս կամ այն դեպքի, այդ թվում ընտրակաշառք բաժանելու վերաբերյալ տեղեկություններ, ոչ մի դեպքում անալիզ չի արվում, թե դա որ քաղաքական ուժին է վերաբերում, կամ որ ժամանակահատվածին է վերաբերում։ Եթե նայեք միջնորդագիրը, ապա այլ քրեական գործի շրջանակում են բացահայտվել այն փաստաթղթերը, որոնց մասին ես արդեն խոսեցի։ Եթե այլ գործով խուզարկությունների ընթացքում հայտնաբերվեն այլ քաղաքական ուժերի որևէ այլ ժամանակահատվածի ընտրությունների ժամանակ ունեցած փաստաթղթեր, հավաստիացնում եմ, որ նույն ճակատագիրը կլինի»,- ասաց Ա. Դավթյանը։
Նրա խոսքով՝ նախաքննական գաղտնիքի հրապարակման օրենսդրական կարգավորումն այն է, որ վարույթ իրականացնող մարմինն ինքն է որոշում՝ ինչ ծավալով տեղեկություն պետք է հրապարակի։
«Նախաքննական մարմնի իրավունքն է այս կամ այն տեղեկությունը պաշտոնապես հրապարակելը։ Դա նաև այդ մարմնի պարտականությունն է՝ հասարակությանը իրազեկելու տեսանկյունից։ Իսկ բոլոր այն դեպքերում, երբ իմ ասած աղբյուրներից զատ, այլ կերպ է տվյալների արտահոսք լինում, ապա յուրաքանչյուր նման դեպքում մեր հստակ պահանջն է պարզել այդ փաստը»,- շեշտեց նա։
Արձագանքելով՝ Մանե Թանդիլյանը նշեց. «Այսինքն՝ դուք դիտավորությա՞մբ եք ինֆորմացիայի արտահոսք կազմակերպել և տվյալները տրամադրել իշխող քաղաքական ուժին՝ համարելով, որ դա նույնիսկ պետք է հասանելի դարձնել հանրության համար։ Այնինչ, դուք այդ փաստաթղթով եք եկել ԱԺ, հետևաբար, այն դեռ ապացուցման ենթական փաստաթուղթ է։ Եվ պարոն դատախազ, ինձ հիշեցրեք՝ ո՞վ էր 2017 թվականին ՀՀ գլխավոր դատախազը, երբ ես լայվով Արարատյան թաղամասում լայվով ներկայացնում էի ընտրական կաշառք բաժանելու դեպք»։
Պատասխանելով՝ Ա. Դավթյանն ասաց, որ իր խոսքից հետո պատգամավորի կատարած եզրակացությունները համարժեք չեն. «Ես չեմ ասում, որ մենք հատուկ արտահոսք ենք կազմակերպել, վարույթ իրականացնող մարմինն ինքն է որոշում, ինչ ծավալի տեղեկություններ է պարտավոր տրամադրել։ Իսկ 2017 թվականին ես եմ եղել գլխավոր դատախազը, աննախադեպ ծավալի քրեական գործեր են քննվել, ես կոնկրետ Ձեր վկայակոչած դեպքը չեմ հիշում, բայց բացառված է, որ այդ դեպքով վարույթ իրականացված չլինի»։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
